Gimnasium weer 2017 se kampioene

Andrew Poolman - Die eerste rugbyspan van Ricoh Windhoek Gimnasium het dié skool se derde oorwinning in vier jaar in die Momentum onder 19 Superliga verseker. Die Leeus was in Saterdagaand se finaal met 31-9 net te afgerond vir 'n moedige Namib Diesel Walvisbaai Privaat Hoërskool wat deurgaans sy rol gespeel het in 'n aanskoulike hoogtepunt vir die skolerugbyseisoen.Afrigter Jaco Engels sê hy is baie trots op sy Windhoek Gimnasium seuns. “Met al ons uitdagings en beserings vanjaar was hierdie oorwinning die kersie op die koek. “Ons het geweet Walvis het baie groot en sterk baldraers, maar ons seuns het soos besetenes verdedig. Selfs ons agterspelers het onder hul stutte ingeseil. Elkeen het sy lyf op die spel gesit. “Aan die einde van die wedstryd kon 'n mens sien daar is seer lywe op die veld en beide kante moes vars bene op die veld kry. Ons seuns het kopgehou en nooit die druk op Walvis verlig nie en hulle tot foute gedwing. Ek is baie trots op hierdie groep spesiale seuns.”Gimnasium was weereens baie sterk in die skrums, wat een van hul sterkpunte vanjaar was. Hul stutte Gerhard Opperman en Adriaan Vermeulen is heelwat korter en ligter as Walvisbaai se twee invloedryke manne, Patrick Schickerling en Ethan Thiart, maar het geensins teruggestaan nie en het 'n hoë werktempo gelewer. Gerhard is die seun van Jood Opperman, terwyl Adriaan se pa Gielie en oom Danie ook beide op nasionale vlak rugby gespeel en afgerig het.Gimnasium se agtsteman en kaptein Franco Opperman het ná die wedstryd gesê hy kon nie glo hoe toegewyd sy span in elke faset was nie.“Walvis was fisiek verskriklik hard en het baie hard geveg en goeie rugby gespeel.”Gimnasium se binnesenter Chrischen Olivier het vir die eerste deurbraak gesorg toe hy die bal van 'n vyfmeterskrum gekry en sy direkte opponent Randall Maasdorp afgestamp het om by die pale te gaan druk. Met losskakel Denzo Bruwer se doelskop was die telling 7-0.'n Verdere terugslag vir Walvisbaai was toe sy linkervleuel Bryan Gordon ná elf minute 'n geelkaart vir 'n onwettige duikslag gekry het.Bruwer het kort daarna met 'n lang strafskop misluk, maar 'n ongedwonge fout aan Walvis-kant met die kwartlyninskop, toe hul spelers voor die bal was, het vir Gimnasium sy volgende kans vir 'n drie geskep. Losskakel Bruwer het van die middelskrum af met 'n gevaarlike breekslag vorendag gekom en bygedra om die gaping te skep sodat sy regtervleuel Morgan Esterhuizen van die volgende fase af deurgejaag kon word.Dié keer het Bruwer met die skuins skop geslaag en ook ná 23 minute 'n verdere strafdoel van die tienmeterlyn af oorgejaag om die telling tot 17-0 te rek.Net voor die halfuurmerk het Walvisbaai eindelik op die telbord gekom met 'n strafdoel deur losskakel Juvan Pitout. Die kusspan het sy bes gegee om voor die rustyd die telling verder te laat krimp en is met twee verdere strafdoele deur Pitout beloon.Walvisbaai het die vorige naweek sy bekendheid as 'n span vir die tweede helfte onderstreep toe hulle WHS se keel toegedruk het, maar hierdie keer sou Gimnasium nie ruimte vir 'n terugvegpoging laat nie.Die rustydtelling van 17-9 het ses minute later met sew punte aangegroei toe Gimnasium se plaasvervanger agterspeler Jay Cee Steenkamp voordeel uit 'n los bal getrek het om 'n drie te druk wat Bruwer verdoel het.Die telling het lank 24-9 gebly voordat Walvisbaai weer 'n strafskop binne trefafstand gekry en kantlyn toe gemik het, maar niks het daarvan gekom nie. Gimnasium se kaptein Franco Opperman het die uitslag bo twyfel gestel toe hy binne Walvisbaai se halfgebied 'n aangee onderskep en los deur pale toe gehardloop het vir Bruwer om die laaste spyker in te slaan.Die binnesenter van Gimnasium, Chrischen Olivier, is as die speler van die wedstryd én beste agterspeler aangewys, terwyl die eindstryd se beste voorspeler-prys aan Walvisbaai se stut Patrick Schickerling oorhandig is. PLATTELANDVerskeie van die ander uitslae het gewys dat skole in die plattelandse streke steeds baie moeite doen om ondanks die uitdagings, soos klein getalle kinders, goed afgerigte spanne op te lewer.Die prys vir die algehele beste voorspeler van die eindstryde is aan Keetmanshoop Privaatskool se agtsteman Hendrik Steenkamp toegeken.Die uitslae was soos volg:O.19 Superliga bronsfinaal: Samsung Windhoek Hoërskool klop JCC/KMC Windhoek Gimnasium met 60-17. Speler van die wedstryd en topspeler van die eindstryde: WHS se senter Elmarco Beukes, met vier drieë. O.19A-eindstryd: Supersand Elnatan klop Rubicon Tsumeb Gimnasium met 32-17. Speler van die wedstryd: Elnatan se senter Louis Meyer.O.19B-eindstryd: Pro-Ed Akademie klop Keetmanshoop Privaatskool met 29-27. Speler van die wedstryd: Pro-Ed se heelagter Donell Gonteb.O.19C-finaal: M+K Gertze klop Otji's Rugby met 52-22. Speler van die wedstryd: M+K Gertze se buitesenter Isadore Jansen.O.19D-finaal: Windhoek Gimnasium IV klop Rehoboth Hoërskool met 46-21. Speler van die wedstryd: Windhoek Gimnasium se slot en kaptein Ruan Hechter.O.15A-finaal: Windhoek Gimnasium klop WHS met 19-11. Speler van die wedstryd: WHS se heelagter Jeandre Loubser.O.15B-finaal: Moria klop Danie Joubert met 27-7. Speler van die wedstryd: Moria se agtsteman Niel Holtzhuasen.O.14A-finaal: Windhoek Affies klop WHS met 12-10. Speler van die wedstryd: Windhoek Affies se losskakel Demar Opperman.O.14B-finaal: WHS B klop Maurits Devenish met 22-14. Speler van die wedstryd: WHS se senter en kaptein Jason Beukes.Steers o.13 Superliga-finaal: Walvisbaai Privaat Hoërskool klop Pionierspark met 57-32. Speler van die wedstryd: Jurenzo Julius (WBPHS), met vier drieë.Steers o.13B-finaal: Orban klop Origo met 36-7. Speler van die wedstryd: Orban se losskakel Denver Beukes.Steers o.12-finaal: JTL Beukes en Rehoboth Primêre Skool speel met 10-10 gelykop en deel die trofee. Speler van die wedstryd: JTL Beukes se senter Enzo van Rensburg.Steers o.11A-finaal: Windhoek Gimnasium klop Pro-Ed Akademie met 13-12. Speler van die wedstryd: Windhoek Gimnasium se losskakel Waldré Kotze.

Gimnasium weer 2017 se kampioene

Kommentaar

Republikein 2025-12-16

Meld asseblief aan om kommentaar te lewer

Gimnasium weer 2017 se kampioene

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.