Geveg oorsee by venster uit

Tielman van Lill – Namibië se 32-jarige nasionale weltergewigkampioen, Emmanuel (The Lion) Mungandjela, moes 'n uitnodiging van die hand wys om aanstaande maand in Belo-Rusland deur die toue te klim.The Lion kon op 26 Julie in Minsk vir Nursultan Zhangabayev (Kazakstan) oor tien rondes om die internasionale gordel van die Wêreldboksvereniging (WBA) gepak het. Volgens die promotor Nestor Tobias het dié uitnodiging van die WBA egter te laat op sy lessenaar beland om sy bokser na behore voor te berei.Mungandjela is van 'n gulde kans ontneem om sy grootste geveg nóg en sy eerste buite die landsgrense te ervaar.Tobias verduidelik: “Gedurende die grendeltydperk kon geen van ons boksers behoorlik oefen nie. Om 'n geveg op so 'n kort kennisgewing te aanvaar, sou onverantwoordelik wees. “Die welstand en veiligheid van ons boksers is 'n prioriteit en daar is nie 'n manier dat ons Emmanuel onvoorbereid in Minsk gaan laat veg nie. Met die nuwe fase in ons hokreëls wat binnekort van krag word, sal ons sorg dat ons boksers weer hul beste peil bereik om Namibië in die kollig te plaas.”Mungandjela, wat sedert Junie 2013 professioneel boks, het 17 gevegte agter die blad waarvan hy 13 gewen het (7 uitklophoue). Vroeg in sy loopbaan was hy drie keer aan die verloorkant (insluitend met punte teen Mikka Shonena) en het een keer gelykop geboks. Hy is sedert Oktober 2017 die Namibiese weltergewigkampioen toe hy Ebenestus Kaangundue geklop het. Hy het sy titel intussen drie keer suksesvol verdedig en spog met tien oorwinnings op 'n streep. Van sy beste vertonings was teen sy landgenote Tommy Hango, Peter Malakia en Steven Shimbonde.Die 27-jarige Zhangabayev se rekord spel eweneens gevaar. Hy is onoorwonne in agt gevegte en het reeds in sy sesde geveg in Desember 2018 die vakante WBC Asiatiese superweltergewigtitel teen Arnel Tinampay van die Filippyne, in Moskou met 'n eenparige puntebeslissing opgeraap. In Maart 2019 moes Ivan Matute (Venezuela) dit ontgeld toe Zhangabayev hom om die vakante WBA interkontinentale kroon verniel het. In Augustus het hy die titel teen Australië se Steve Gago in Sydney en met sy eenparige puntesege ook die vakante WBO Asiatiese titel bygevoeg.- tielman@republikein.com.na

Geveg oorsee by venster uit

Kommentaar

Republikein 2026-02-04

Meld asseblief aan om kommentaar te lewer

Geveg oorsee by venster uit

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.