Gevalle steek 8 000-kerf verby, vier nuwe sterftes

Die minister van gesondheid en maatskaplike dienste, dr. Kalumbi Shangula, sê uit 1 630 weefselmonsters wat getoets is, het 238 positief vir Covid-19 getoets. Hiervan is 126 mans en 112 vroue. Die jongste is twee maande oud en die oudste 65 jaar oud. Uit die 238 nuwe gevalle is 145 in Windhoek, nege in Walvisbaai, vier in onderskeidelik Swakopmund en Usakos, sewe in Tsumeb, ses elk in onderskeidelik Onandjokwe en Otjiwarongo, vyf in Okahandja, ses in Keetmanshoop, drie in Karasburg, ses in Rehoboth, drie in Mariental, nege in Rundu, agt in Oshakati, vyf in Eenhana, een in Engela, een in Okongo, sewe in Katima Mulilo en drie in Gobabis. Dit bring die totaal op 8 082 te staan.

Shangula het ook vier nuwe sterftes aangekondig wat die totaal vir die land op 86 te staan bring. Dit sluit twee in Windhoek ('n 64-jarige man en 'n 41-jarige man, beide met onderliggende mediese toestande), een in Oshakati ('n 49-jarige man met geen onderliggende mediese toestande) en 'n 32-jarige vrou op Walvisbaai met onderliggende mediese toestande in. Volgens die minister het nog 29 mense herstel wat die totaal op 3 483 te staan bring.

Uit die 4 513 aktiewe gevalle is 21 gevalle baie ernstig tot kritiek. Tot op hede is 65 899 weefselmonsters getoets, terwyl 8 762 kontakte gemonitor word. Huidig is 1 522 mense in kwarantyn in geriewe oraloor in die land.