Gesondheidsministerie sê oor 'vermiste voertuie'

Die ministerie van gesondheid en maatskaplike dienste sê die verskil tussen die aantal voertuie in diens van die ministerie en die meesterlys van voertuie in sy besit is weens gevalle waar aansoeke deur sommige eenhede gemaak word vir die afskryf van voertuie wat onbruikbaar en of beskadig is.
Die uitvoerende direkteur, mnr. Ben Nangombe, sê in normale gevalle word die voertuie wat afgeskryf is, van die meesterlys verwyder die oomblik wanneer tesourie goedkeuring daarvoor verleen. Weens beperkte hulpbronne om nuwe voertuie te koop en die vloot voertuie te hernu, het sommige eenhede, "gemotiveer om meer met minder te doen", verkies om eerder die voertuie te herstel en voertuie te gebruik wat andersins afgeskryf sou word. Dit is gedoen om mobiliteit te verseker en dienslewering te verbeter in 'n omgewing wat reeds deur 'n tekort aan hulpbronne geteister word.
Volgens Nangombe sou verifiërings tydens die 2020/21 finansiële jaar gedoen word, maar weens die uitbreek van die Covid-19-pandemie en 'n tekort aan hulpbronne, is dit tot die huidige finansiële jaar uitgestel. Hy het die versekering gegee dat die ministerie die verskille in syfers sal oplos soos wat in die ouditeurs-verslag deurgegee is.