Gesondheid: Regering dra grootste las

Henriette LamprechtNamibië moet strategieë ontwikkel vir die volhoubaarheid van die finansiering van gesondheid.Volgens die ministerie van gesondheid en maatskaplike dienste se gesondheidsrekening vir die 2014-'15 finansiële jaar het skenkers se finansiering van prioriteitsprogramme soos MIV/vigs, tuberkulose en malaria afgeneem. Dit terwyl dié siektes voortgaan om 'n beduidende impak op Namibië se gesondheidstatus te hê. Boonop ervaar die land 'n beduidende afname in ekonomiese groei.Volgens die verslag het bogenoemde, gekombineer met faktore soos die feit dat die helfte van die bevolking onder die armoedelyn leef en die huidige gesondheidsfinansieringstelsel belastinggebaseerd is, toenemend druk op die fiskale ruimte vir gesondheid geplaas.Terselfdertyd styg die aanvraag vir en koste van gesondheidsdienste danksy 'n verouderende bevolking, die toenemende voorkoms van nie-oordraagbare siektes en die voortgesette bedreiging van oordraagbare siektes.Volgens die verslag sal Namibië moet fokus op die billike toewysing van beskikbare hulpbronnne, sowel as op die doeltreffende gebruik hiervan om bekostigbare toegang tot kwaliteitgesondheidsorg te verseker terwyl finansiering krimp en koste styg. Dit sal glo help om die verlies van vordering wat reeds op die gebied van gesondheid gemaak is, te voorkom. Die verslag sê voorts die Namibiese regering se vermoë om hulpbronne deur die algemene belastinginkomstestelsel te mobiliseer, is met die huidige stand van die ekonomie 'n uitdaging - een wat selfs tot besnoeiing van die begroting gelei het.Omdat die regering se vermoë om inkomste te genereer as gevolg van 'n stadiger ekonomie en verminderde ekonomiese groei beperk word, staar hy struikelblokke in die gesig om sy algemene toedeling aan gesondheid te verhoog.Die totale gesondheidsbesteding (THE) in 2014-'15 het sowat N$12 miljard beloop waarvan 94% aan lopende uitgawes bestee is. Die oorblywende 4% was vir bedryfskapitaal.Gesondheidsverwante items soos maatskaplike sorg vir MIV-positiewe inwoners word nie by die totale bedrag vir gesondheidsbesteding ingereken nie en beloop 'n bykomende N$159 miljoen.Tydens die 2014-'15 finansiële jaar het die regering die grootste bydrae (64%) tot gesondheidsbesteding gelewer. Dit is meer as 2012-'13 se 54%. Dié aansienlike regeringsbydrae tot gesondheidsbesteding het 13% van die regering se totale besteding beloop.Die sentrale regering bestuur 51% van die totale gesondheidsbesteding, terwyl mediesefondsskemas 36% bestuur. Die oorblywende deel van die koek is deur huishoudings (9%), nieregeringsorganisasies 3% en maatskappye en donateurs opgeneem wat albei minder as 1% bestuur. Sowat 49% van gesondheidsfondse is aan sekondêre sorg in staats- en private hospitale bestee, terwyl besteding aan primêre gesondheidsorg sowat 17% beloop het. Die meerderheid fondse (59%) is aan genesende sorg bestee, met slegs 5% van fondse wat aan voorkomende sorg bestee is. Administrasie het 10% van die totale gesondheidsbesteding opgeslurp, terwyl die aankoop van medisyne en mediese goedere 8% van die totale besteding behels het. Aansteeklike en parasitiese siektes het die hoogste toekenning van fondse (25%) gehad, gevolg deur reproduktiewe gesondheid (22%) en nie-oordraagbare siektes (21%). Met verwysing na aansteeklike siektes was die besteding die hoogste op MIV/vigs (10%), gevolg deur lugweginfeksies (6%) en diarreeverwante siektes (4%). Byna 2% van die totale gesondheidsbesteding was op tuberkulose (TB), met minder as 1% op malaria.Besteding op TB en malaria was soortgelyk aan wat dit in 2012-'13 was, toe 1% aan elk van die siektes bestee is. Tussen toe en die mees onlangse ronde van gesondheidsrekeninge het die besteding op MIV/vigs van 14% tot 10% gedaal.

Gesondheid: Regering dra grootste las

Kommentaar

Republikein 2026-03-11

Meld asseblief aan om kommentaar te lewer

Gesondheid: Regering dra grootste las

Kommentaar

Republikein 2026-03-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.