Geskorste Salini-werkers voel verwerp

Catherine Sasman – Geskorste werkers van die Neckartaldamprojek sê hulle voel die regering het sy rug op hulle gedraai omdat daar nie ingegryp is om die onuithoubare arbeidsverhoudinge tussen die Italiaanse bestuurders van Salini Namibia en die werkers op te los nie.
’n Geskorste werker, wat anoniem wil bly, het gesê ’n volledige verslag oor die werkstoestande by die projek is in Oktober verlede jaar na pres. Hage Geingob se kantoor gestuur, maar dat geen reaksie daarop ontvang is nie.
“Die redes vir die staking is in die verslag aan die president uiteengesit. Ons het om hulp by hom aangeklop, maar niks gekry nie,” het die werker gesê.
Die 40 werkers wat verlede week aan die staking deelgeneem het, is Maandag oor hul skorsing ingelig en meegedeel hulle word van “industriële sabotasie” aangekla.
Die takbestuurder van die Metaal- en Verwante Werkersunie (Manwu), me. Emmarentia Riekcert, het gesê alle vakbondverteenwoordigers, met die uitsondering van een, is ook geskors.
Teen gister het hulle nog met Salini se bestuur onderhandel.
Die voorsitter van die Nama Tradisionele Leiersvereniging (NTLA), mnr. Lazarus Kairabeb, het gesê hy is bekommerd oor die “algehele oorhand” wat Salini Namibia het in die arbeidsverhouding tussen die buitelandse bestuur en Namibiese werkers.
Hy meen dit sou verstandig gewees het vir ’n party met gelyke status om by die " disfunksionele verhouding" tussen die bestuur en die werkers in te gryp.
“Ek hoop die mense in beheer sal meer druk toepas om vas te stel wat die werklike oorsaak vir die arbeidsonrus is. Soveel soos wat daar ’n probleem met Salini se bestuur is, is daar ook ’n probleem met die werkers,” het Kairabeb gesê.
Hy het Salini se gebruik van die woord “sabotasie” in die klagtes teen die geskorste werkers bevraagteken.
“Wat beteken sabotasie as mense kla? Dit is hierdie soort denkwyse wat ongevraagd is. Dit is ook ’n teken dat iets skort,” het Kairabeb gesê.
Hy het voorts gesê die unie maak nie gebruik van 'n klousule soos opgeteken in die Projek se Arbeidsooreenkoms (PLAN) van 2014 nie, wat voorsiening maak vir die opleiding van plaaslike personeel in alle dissiplines.
Salini se woordvoerder, mnr. Gilles René Castonguay, het gesê die maatskappy gaan nie in hierdie stadium kommentaar lewer nie.