Gemeenskap huil saam oor Dee Thakur

Andrew Poolman – Ná amper 'n kwarteeu van diens aan Namibiese krieket op verskeie vlakke word swaar gesluk aan die heengaan van Dayanand (Dee) Thakur.Op die jeugdige ouderdom van 54 jaar het dié gerespekteerde voormalige afrigter van die nasionale span nog veel meer gehad om Namibiese krieket te bied.Covid-19 het Woensdagaand die laaste sê gehad nadat Thakur in die voorafgaande klompie dae in diehospitaal was.Toe hy in Augustus 2015 as afrigter van die Eagles aangestel is, was die nasionale span in 'n sukkelperiode vasgevang waarin meerdagwedstryde in die Suid-Afrikaanse provinsiale kompetisie dikwels met vernederende beurtnederlae prysgegee is.Stelselmatig is die draaipunt bereik en die prestasiekurwe het geklim totdat die Eagles die buurland se opposisie tuis en weg begin opdons en selfs tot die eindstryde in die verskillende formate begin deurdring het.Thakur se gemoedelike karakter en verbintenis tot Namibië het ook geblyk deurdat hy nooit omstrede uitsprake gemaak het of protes aangeteken het toe Pierre de Bruyn as sy opvolger aangestel is en hy in ander rolle ontplooi is nie. Mees onlangs was hy Krieket Namibië se hoëprestasiebestuurder en koördineerder van die uiters integrale rol om krieketafrigters landwyd op te lei. Hetsy op dié manier, of as spanbestuurder van die nasionale span, het hy sonder ophou bly bydra tot die suksesvlakke wat De Bruyn en die Eagles die afgelope maande bereik het.Thakur, gebore in Guyana, het in 1997 in Namibië aangekom waar hy met sy Namibiese vrou Natasha, 'n onderwyseres, getroud is. Oor jare het hy die land deurkruis om krieket te help ontwikkel. HULDEBLYKE VAN ORALJohan Muller, uitvoerende hoof van Krieket Namibië, sê in 'n nuusverklaring: “Ons sal vir Dee waarlik mis. Hy was een van ons ware staatmakers en het 'n groot rol in tallose spelers en afrigters se lewens gespeel. Ons meegevoel is met sy vrou en kinders.Dr. Rudie van Vuuren (president van Krieket Namibië): “Dee Thakur: Vriend van vele, vyand van niemand.”Laurie Pieters (voormalige president van Krieket Namibië): “Dee was 'n gawe, vriendelike, vrygewige, lieflike persoon. Hy laat verseker 'n goeie nalatenskap in Namibiese krieket.”Daneel van der Walt, huidige uitvoerende lid van Krieket Namibië, was ook 'n spanmaat van die Namibiese Ouer as 50-span waarvan Thakur onlangs die kaptein was: “Wat 'n wonderlike en saggeaarde vriend om te verloor. Dit was 'n voorreg om hom deur krieket te leer ken en die lewe met hom te deel.”Helga Volschenk (huidige uitvoerende lid van Krieket Namibië): “Die hemel het 'n engel ryker geword.”Pierre de Bruyn (Eagles-afrigter): “RIV Dee. Jy was 'n trotse Eagle wat soveel geïnspireer het deur jou onselfsugtige benadering tot die lewe. Die laaste twee weke het jy soveel dapperheid gewys. Ons sal jou in die kleedkamer mis, my vriend.”Craig Williams, die nasionale rekordhouer vir meeste lopies in elke formaat en die mees ervare lid van die huidige Eagles-span: “'n Man wat Namibië se krieket en sy mense tot die einde op sy hart gedra het. Dee, ek gaan ons geselsies oor krieket en die lewe soveel mis. Jy was 'n massiewe deel van my lewe en ek het soveel by jou geleer. “Jy is gans te vroeg weg, maar jou nalatenskap sal altyd voortleef. My meegevoel met jou mooie familie. Rus in vrede my vriend.Sarel Burger (jarelange Eagles-kaptein): “Ons sal jou mis, my vriend. Jy was 'n uitsonderlike mens met 'n hart van goud, Dayanand Thakur! Mooi loop partner.”Deon Kotzé (oudkaptein en later sameroeper van die nasionale keurkomitee): “Dee was eenvoudig 'n wonderlike man. Sy nalatenskap strek ver verby bloot die krieketveld. Bo enigiets anders, sal die manier hoe hy mense hanteer het, sy ferm dog gedempte dissipline en die manier waarop hy 'n ganse generasie jongmense geïnspireer het, die langste in ons geheues voortleef. Namibië verloor 'n wonderlike dienaar van die spel en 'n ware heer.”Andre Schmidlin, spanbestuurder in Thakur se era as afrigter: “Jy ontmoet dalk net een keer in jou lewe iemand wat soveel lewens aangeraak het. Iemand wat jou energie aanvuur en jou inspireer om beter te wees as wat jy ooit gedroom het jy kan wees. “Soveel kinders sê vandag dankie, Coach. Een van die beste mense wie ek die voorreg gehad het om 'n vriend te kan noem. Dankie vir alles wat jy vir elke individuele krieketspeler en vir ons land gedoen het.”Polly Negongo, voorsitter van Thakur se jarelange klub CCD Tigers: “Dee, jou kennis, harde werk en kalm maniere – as speler, afrigter en mentor – het ons gebring waar ons klub vandag is. Dit is 'n harde slag vir ons klub en ons land. Rest easy, legend.”FOTOWyle Dee Thakur. Foto Tielman van Lill

Gemeenskap huil saam oor Dee Thakur

Kommentaar

Republikein 2025-12-16

Meld asseblief aan om kommentaar te lewer

Gemeenskap huil saam oor Dee Thakur

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.