Gemeenskap en polisie jag moordenaar

Jemima Beukes op Stinkwater ‘n Twee-en-dertig-jarige man moes gister vir sy lewe vlug ná ‘n grumoord op Stinkwater net buite Dordabis.Dit nadat die geskende liggaam van die vermoorde me. Lydia !Kharises (23) Maandagoggend op die oewer van die rivier hier ontdek is.Inwoners, hoofsaaklik oumense en kinders, het die verdagte heen en weer deur die loop van die Schaaprivier tot in die heuwels aan die voet van die Auasberge gejaag. ‘n Polisiehelikopter is ontplooi om met die soektog te help.Die man is voor dit opgemerk waar hy glo uitdagend met sy hande voor in sy broek ‘n ent vanaf sy slagoffer se huis na haar familie staan en staar het.Hy het haar vermoedelik Vrydagaand, op Menseregtedag, vanaf ‘n troue op die nedersetting weggelok. !Kharises is na bewering verkrag voordat sy vermoor is en haar liggaam is daarna wreed geskend.Volgens haar moeder, me. Katrina !Kharises, het sy Lydia die laaste keer omstreeks 20:00 Vrydagaand gesien toe sy by haar ouma se blikkieshuis tabak kom vra het “om ‘n zol te swaai”. Sy het hulle vertel sy gaan die bruilof bywoon.Volgens me. Imelda Hochobes is Saterdag en Sondag oral na Lydia gesoek.‘n Manlike kollega van Katrina het Maandagoggend die lyk op die oorkantse oewer van die rivier aangetref.Lydia en haar twee kinders, onderskeidelik twee jaar en tien maande oud, het sowat twee weke gelede na Stinkwater teruggekeer nadat sy as ‘n ontbosser iewers in die omgewing van Daan Viljoen gewerk het. Sy het gekla dat sy ongelukkig was by die werk.Die verdagte het na bewering al iemand in Windhoek verkrag en ‘n paar maande gelede ook iemand anders op Stinkwater verkrag.“Ons leef in absolute vrees,” het Hochobes gister gesê. “Hierdie ouens vermoor ons en verkrag ons, maar hulle is net in en uit die tronk uit. Ons kan nie snags slaap nie want ons vrees vir onsself en ons dogters.”Die verdagte is glo bekend vir sy aggressie en tieners op Stinkwater lewe volgens bure in vrees vir hom.Volgens die man se swanger meisie, me. Katrina Esmerelda Rooi, het hy Saterdag eers in die vroeë oggendure, tussen 04:00 en 05:00, tuisgekom. Hy het toe gaan bad; volgens haar iets uiters ongewoon.Later het hy ook self die klere gewas wat hy na die troue gedra het - iets wat volgens haar selfs nog vreemder is. “Ek doen gewoonlik sy wasgoed vir hom,” het sy gister gesê.“Hy het Vrydagaand dronk by die huis gekom en met my begin baklei,” het Rooi vertel, “maar ek het hom ignoreer en omgedraai en daardie tyd toe vat hy die knopkierie en slaan my op my rug. Hy is toe weg en het na die trouhuis geloop.”Volgens Rooi het haar kêrel Saterdagaand toe sy by haar tannies gekuier het hul huis se sleutels kom vra en toe die klere gaan uittrek wat hy sedert Vrydagaand gedra het.Rooi het vertel haar tannie het Maandag eerste van die moordtoneel na die nedersetting teruggekeer en toe gesien hoe die man klere was en ophang. Toe die vroue koppe bymekaargesit het, is die vreemde gedrag geopper“Ek het toe teruggegaan huis toe en die huis begin deursoek,” het Rooi gesê. “Die klere was weg en hy ook.”Die man is daarna eers weer gister gewaar – net voordat hy op vlug geslaan het.Volgens hoofinsp. Kauna Shikwambi, nasionale woordvoerder van die polisie, was die verdagte gisternamiddag steeds op vrye voet. Sy kon nie kommentaar lewer oor beweerde ander klagte van verkragting teen hom nie.

Gemeenskap en polisie jag moordenaar

Kommentaar

Republikein 2025-05-01

Meld asseblief aan om kommentaar te lewer

Gemeenskap en polisie jag moordenaar

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie