Geliefde mentor, poetsbakker gegroet

Elvira Hattingh - “Vir my, Sonja, sy enigste kind, was hy my ‘hero’. “Ek was sy agterryer en het orals saam met hom op die plaas geboer. Só het hy my alles geleer van praktiese dinge, tot hartsdinge en menswees.”So skryf Sonja (Robberts) Spyron oor haar pa, die legendariese oom Rop Francois Robberts, wat verlede week begrawe is op sy plaas Graniet – dieselfde plek waar hy gebore is. Hy is op 7 Junie in die ouderdom van 84 oorlede en word onthou as ‘n voortreflike boer, ‘n mentor en “mense-mens”, wat veral bekend is vir die staaltjies wat oor hom vertel is. “Dit is en bly vir ons ongelooflik hartseer, maar hy was só siek en het só swaar gekry die laaste paar maande dat ons hom die ewige rus gun. Ons seer sal met die tyd beter word, maar ons het die mooiste herinneringe van hom,” het Spyron aan Republikein gesê. Spyron sê die gevreesde Alzheimer se siekte het hom in die laaste 10 jaar van sy lewe “bekruip” en “sy kloue al dieper in hom geslaan”.Robberts laat ook sy vrou, Cynthia, drie kleinkinders, Willem Smith, Rop Smith en Thia Mostert, asook vier agterkleinkinders, Caitlyn, Wilhelm, Georgie en Alaura-Mae, na. Hy is in 1957 met Cynthia getroud. “Hy was my ma se beste maat en sielsgenoot. Vir haar kon hy terg en en treiter en ook die mooiste briewe skryf. Hy was ook die wonderlikste man, pa en oupa,” het Spyron gesê.“Vir sy kleinkinders het hy altyd gelag en gesê dat ‘n oupa soos ‘n ‘elke-dag-Vader-Krismis’ moet wees en dat die presente wat hy bring ‘stories, liedjies, baie speel en lag’ moet wees. “Saans het hy stories vertel en só aangelas en aangedik totdat een van die kleintjies sou sê ‘issie oupa!’“Hy het my altyd vertel dat mens eers na ‘n man se hart moet kyk en hoe hy jou en die mense rondom hom behandel. “Hy was ‘n voortreflike en suksesvolle boer en sy beesboerdery was sy trots. Elke dag van sy lewe het hy by poste om gery om net tussen die bees te stap of sit.”Ná sy dood het boodskappe van familie, vriende en kennisse ingestroom. Hulle het gesê ‘n groot boom het geval, “‘n legende wat onthou sal word vir sy mensliewendheid, grappies en streke”.Nog iemand het gesê oom Rop was “iemand wat hom nie veel gesteur het aan rykdom en aansien nie, maar eerder aan mense se wel en weë”.Ander sal hom onthou as ‘n “mense-mens met ‘n oop hand wat baie meer gegee het as wat hy ooit wou ontvang” en ander vir sy “onmoontlike streke en poetse op Torrabaai”.“Hy was ‘n mentor by wie almal iets kon leer, ‘n voortreflike boer in die Kamanjab-omgewing met baie wysheid, raad en planne, wat almal rondom geïnspireer en gehelp het. Ons onthou hom as die oom wat ons jong kinders baie laat lag het met al die strepe wat hy getrek het,” het nog geliefdes gesê.

Geliefde mentor, poetsbakker gegroet

Kommentaar

Republikein 2026-07-27

Meld asseblief aan om kommentaar te lewer

Geliefde mentor, poetsbakker gegroet

Kommentaar

Republikein 2026-07-27

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.