Geliefde fietsryer sterf tragies

Tielman van LillDie 38-jarige me. Ingrid van Wyk-Scholtz, ’n bekende in fietsrykringe, is Vrydagnamiddag laat noodlottig op die westelike verbypad by Windhoek deur ’n minibus getref.Sy is met ’n ambulans na ’n privaat hospitaal in Olympia geneem waar mediese personeel vergeefs om haar lewe geveg het.Van Wyk-Scholtz, wat saam met twee vriende vir die 2019 Nedbank Desert Dash geoefen het, was net ná sononder naby die Universiteit van Namibië (Unam) op pad huis toe. Marion Schonecke en John Titus het saam met haar gery, maar Schonecke het dié twee alleen gelos en huiswaarts gekeer.Titus het voor Van Wyk-Scholtz gery waar hulle aan die linkerkant van die pad in die noodbaan gery het. Die minibus wat in die rigting van Olympia op pad was, het die verkeer aan die linkerkant in die noodbaan verbygesteek en haar getref. Die bestuurder het na bewering van die toneel gevlug en is nog soek.Titus het glo nie die voorval sien gebeur nie, maar onmiddellik iemand gekontak wat die nooddienste ontbied het.Van Wyk-Scholtz, wat op 24 Oktober verjaar het, word as ’n vasbyter en ’n wonderlike vriendin beskryf. Dat sy geliefd onder haar vriende was, is nie te betwyfel nie. Sy het in 2017 haar eerste Dash as ’n soloryer voltooi nadat haar spanmaat onverwags weens ’n swangerskap moes onttrek.Alhoewel sy nie erkenning vir haar moed en dapperheid ontvang het nie, het sy die afstand suksesvol voltooi. Verlede jaar het sy weer die Dash as ’n soloryer aangedurf, maar nadat sy weens swak sig nie kon klaar maak nie, het sy besluit om vanjaar die moordende marathon van meer as 360 kilometer saam met Karin Brockmann aan te pak.Brockmann was ten tyde van die tragedie in Suid-Afrika en het eers Saterdagaand laat die slegte nuus ontvang."Ons het verskriklik baie daarna uitgesien om die Dash saam te doen en was vol vertroue dat ons lekker gaan ry. Dit is ‘n geweldige groot verlies vir die fietsrygemeenskap. Sy was ‘n besondere mens en baie gewild onder haar medefietsryers en almal wat haar geken het,” het Brockmann aan Republikein gesê.Nedbank Namibia, wat die Desert Dash borg en nou betrokke by fietsry is, het ook op haar dood gereageer.“Soos almal in die fietsrygemeenskap is ons die getref deur die ontydige heengaan van Ingrid. Sy en haar seun, Jaden, het altyd al ons Nedbank-fietsrybyeenkomste ondersteun. Ons treur saam met haar geliefdes. “Ons sal haar breë glimlag in die groepe mis waar sy haar merk gemaak het. Sy gaan gemis word. Mag haar familie en vriende troos vind in die mooi herinneringe wat sy nalaat. Ons sal soos altyd ons stem by elkeen voeg wat vir die veiligheid van ons fietsryers veg,” het die bank in sy verklaring gesê.Cycling Buddies het op Facebook ’n pleidooi gerig.“Beste bestuurder (van die bussie), jy het Vrydag nie net die lewe van ’n medefietsryer geneem nie, maar ook die ma van ’n jong seun, ’n dogter van ’n moeder, iemand se suster, skoonsuster en ‘n niggie gesteel. Jy het iemand se tannie, ’n kollega en ’n geliefde vriend van ons weggeneem.“Dit alles weens jou onverantwoordelike en sinnelose verontagsaming van die padreëls van ons land. Jy het ’n kans om jouself aan Nampol te oorhandig. Ons rig ’n pleidooi aan die passasiers in die bussie of enige ander ooggetuie om na vore te kom sodat ons geregtigheid vir Ingrid kan laat geskied,” lees die plasing.Inligting kan aan sersant Petrus by 081 237 2089 gegee word.Familielede het reeds Saterdagnamiddag vir Ingrid ’n roudiens by die VGK Kerk in Khomasdal gehou. Van Wyk-Scholtz word deur haar man, Herman, seun Jaden (14 jaar), haar moeder en twee broers oorleef.

Geliefde fietsryer sterf tragies

Kommentaar

Republikein 2026-08-03

Meld asseblief aan om kommentaar te lewer

Geliefde fietsryer sterf tragies

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.