Gelekte vraestelle kos ministerie miljoene

Elizabeth Joseph – Die nadraai van die grootste eksamenbedrog in Namibië se geskiedenis kos die ministerie van onderwys, kuns en kultuur sowat N$14 miljoen om reg te stel.Einde verlede jaar het eksamenvraestelle in verskeie vakke bestem vir graad 11’s en 12’s uitgelek en die eksamens is gevolglik tot vanjaar uitgestel.Die ministerie se uitvoerende direkteur, Sanet Steenkamp, sê die ministerie sal sowat N$14,1 miljoen vir die herskryf van die eksamens vir beide die Senior Sekondêre Sertifikaat gewone vlak (NSSCO) en graad 12 bestee.Die landwye vervoer van die vraestelle vir tien vakke wat vir graad 11 gedruk en na al 14 streke versprei is, het die ministerie N$8 miljoen uit die sak gejaag.Die herdruk van die vraestelle vir vyf vakke vir graad 12 het N$2,5 miljoen gekos. Die totale vervoerkoste van die vraestelle uit Brittanje na Namibië was N$3,6 miljoen.Volgens Steenkamp moes die ministerie nog nooit tevore so ’n groot dilemma en “skande” hanteer nie.“Dit sluit akademiese diefstal en ander korrupte praktyke soos die verkoop van vraestelle in,” het sy gesê. Volgens haar is die nasionale eksamens ’n omvattende proses wat verskeie fases behels en wat verskeie kundiges of rolspelers op beide plaaslike en internasionale vlak insluit.Sy het beklemtoon die ministerie reken die veiligheidsmaatreëls wat sedertdien ingestel is, word noukeurig toegepas.“Ons het onmiddellik stappe gedoen om die kwessie te hanteer. Ten spyte van die finansiële implikasies is ons tevrede dat al die nodige stappe gevolg sal word om die beweerde skuldiges verantwoordbaar te hou,” het Steenkamp gesê.Die herskryf van vakke vir graad 11 het Maandag begin en duur tot 21 Januarie. Die graad 12-vakke kom vanaf 7 tot 15 Februarie aan die beurt.Steenkamp het beklemtoon die ministerie het die nodige hulpbronne toegewys om te verseker enigiets wat die nasionale eksamens kan kortwiek, word in die kiem gesmoor.“Die ministerie sal voortgaan om beheermaatreëls te ontleed. Die risiko- en beheergrafiek is reeds van nuuts af deurgewerk om die snellerpunte te identifiseer en alle moontlike skuiwergate toe te maak. Ons slaan die beginsels van integriteit en uitnemendheid hoog aan,” het Steenkamp gesê.Die beweerde meesterbrein agter die uitgelekte vraestelle, ’n onderwyseres verbonde aan die Hoër Tegniese Skool (HTS) in Windhoek, me. Maria Toivo (47) se eerste hofverskyning was kort voor Kersfees in Windhoek saam met haar medebeskuldigde, Namutenya Hamukuto (26). – elizabeth@myzone.com

Gelekte vraestelle kos ministerie miljoene

Kommentaar

Republikein 2025-05-01

Meld asseblief aan om kommentaar te lewer

Gelekte vraestelle kos ministerie miljoene

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie