Geingob vra respek en verdraagsaamheid

Estelle de Bruyn - In ‘n tyd wat die wêreld besig is om verswelg te word in onverdraagsaamheid en haat moet Namibiërs dankbaar wees vir harmonie, vrede en liefde in gemeenskappe en dit deur kulturele vieringe beoefen, sê pres. Hage Geingob.Hy het die afgelope naweek die tradisionele Omagongo-fees by die Onamega-nedersetting in die Elim-kiesafdeling in die Omusatistreek geopen.Geingob vra dat Namibiërs deur kulturele feesvieringe die wêreld moet wys dat hier kulturele harmonie en vrede is en dat menslike waardigheid en respek bevorder word.Hy het op die belangrikheid van respek binne die Namibiese- en Afrika-kultuur gewys - veral wat die ouer geslag betref.“Ons hoofmanne, kapteins, hompas, gaubs en omukwaniilwas is ons grotes en as jong Afrikane wat die weg na ons eie grootheid wil baan, moet ons hulle respekteer.“Om dié rede moedig ek alle Namibiërs aan om dispute rakende tradisionele owerhede in ‘n atmosfeer van respek te benader. Laat ons getrou aan ons kultuur en tradisies wees en eeue oue praktyke navolg om verskille uit die weg te ruim, sonder om ons tot disrespekvolle gebruike soos die belastering van ons bejaardes te wend,” het Geingob gesê.Hy het ook na ‘n Afrika-slagspreuk verwys wat lui: “Die beste manier om teen vreemde en onderdrukkende kulture te veg is om jou eie te omhels.” Geingob sê deur die jare van stryd van die mense van Afrika, is altyd staatgemaak op die kultuur en erfenis om vasberadenheid te versterk.“In die lig van vreemde en onderdrukkende kulture is ons gebuig, maar nooit gebreek nie, ons het gestruikel, maar nooit geval nie, ons het na ons asem gesnak, maar nooit ophou asemhaal nie. Ons gedeelde identiteit, gekenmerk deur ons Afrika-kultuur en erfenis, was en sal altyd ons versekering en inspirasie wees om in die aangesig van teenspoed te oorleef,” het Geingob gesê.Hy het Namibiërs ook aangemoedig om na verskillende streke van die land te reis om verskillende kulturele feeste by te woon sodat mense kan leer om eenheid in verskeidenheid te herdenk.Hy wys daarop dat kultuur en erfenis integrale komponente van nasiebou is wat volkere en nasies van doelwitte en identiteit verseker. Wanneer dit binne die konteks van eenheid in verskeidenheid, kultuur en erfenis gevier word, word dit volgens Geingob instrumente vir maatskaplike en ekonomiese vooruitgang.Hy sê die Bantustan-beleid van apartheid in Suid-Afrika het meegebring dat mense kultureel afgesonder was, wat weer daartoe gelei het dat wantroue in die Namibiese psige posgevat het. Dít het weer tot onenigheid gelei.“Vandag in ‘n onafhanklike en vrye Namibië begin Namibiërs uiteindelik van mekaar se kulturele tradisies leer. “Soos ons oë begin oopgaan en ons harte vir mekaar verwarm, begin ons uiteindelik wantroue met vertroue vervang, onverdraagsaamheid met verdraagsaamheid en haat met liefde. Namibiërs kan nou eenheid in verskeidenheid waardeer wat van ons een Namibië, een nasie maak,” het hy bygevoeg.Hy het ook daarop gewys dat die Omagongo-fees twee jaar gelede by Unesco se lys van ontasbare kulturele erfenisse ingesluit is. Volgens die 2003-konvensie vir die behoud van ontasbare kulturele erfenis (ICH) waarborg lewende erfenis die behoud van die mensdom se voortgesette kreatiwiteit.

Geingob vra respek en verdraagsaamheid

Kommentaar

Republikein 2025-05-13

Meld asseblief aan om kommentaar te lewer

Geingob vra respek en verdraagsaamheid

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie