Geingob oorhandig huise in Walvisbaai

Otis Finck – President Hage Geingob het Vrydag twee van 300 huise op Walvisbaai aan hul nuwe eienaars oorhandig wat gebou is op erwe wat as deel van die Massiewe Stedelike Gronddiensprojek (MULSP) gediens is. Die huise vorm deel van die eerste groep van 760 huise wat in Uitbreidings 5, 6 & 7 in Kuisebmond (520) en Uitbreiding 7 in Narraville (220) deur 42 kontrakteurs gebou word. Mnr. John Tjituka en sy gesin het die sleutel tot hul tweeslaapkamerhuis van president Geingob ontvang, terwyl mnr. Werner Nangolo en sy gesin die trotse eienaars van ’n nuwe drieslaapkamerhuis in Kuisebmond is. Volgens Geingob is die uitvoering van die projek ’n vertoonstuk van Harambee in aksie en ’n voorbeeld van wat bereik kan word wanneer mense ’n visie en toewyding deel en in dieselfde rigting beweeg. “Dit is verblydend om te sien dat, wyl die diens van die grond deur die sentrale regering gefinansier is, die konstruksie van die huise deur die private sektor gefinansier is. Dit is ’n voorbeeld van die wen-wen openbare-private-vennootskap wat deur die regering bepleit word. Ek hoop dié tipe vennootskappe sal landwyd ondersteun word,” het Geingob gesê.Volgens die president is daar baie Namibiërs wat ’n behoefte aan grond en ordentlike behuising het. Hy het die hoop uitgespreek dat MULSP in Oshakati en Windhoek soortgelyke suksesse sal toon. “Hoewel ons ’n massiewe uitdaging in die gesig staar om voldoende en bekostigbare gedienste stedelike grond, behuising en verbeterde sanitasie te voorsien, moet ons besef dié uitdagings is nie onoorkombaar nie. Ons moet hande vat en op koers bly, wetend dat hoewel dit tyd en baie hulpbronne gaan vat om die behoeftes van inwoners aan te spreek, ons deur ons gedeelde doelwitte sal voortgaan om dit te voorsien.”Geingob het die regering en die private sektor aangemoedig om voort te gaan om saam te werk. Hy het voorts ’n beroep op alle rolspelers gedoen om hulself opnuut tot die ontwikkelingsdoelwitte en die skep van ’n Namibiese huis te verbind waarin niemand uitgesluit voel nie. “Laat ons voortgaan om in eenheid vorentoe te beweeg, met ywer en ’n sin van dringendheid en om alles in ons vermoë te doen om in die maatskaplike behoeftes van ons mense te voorsien.”Hy het voorts beklemtoon dat uitdagings soos swak sanitasie, die agterstand in die voorsiening van gedienste residensiële erwe, sowel as behoorlike en bekostigbare behuising in beide landelike en stedelike gebiede ’n daadwerklike poging vereis. “Dit is in die lig hiervan wat ek alle Namibiërs in die konsep van Harambee oproep om kragte saam te snoer om nasionale uitdagings te takel. Ons nasionale oplossing in dié verband is vervat in ons Nasionale Ontwikkelingsplanne, sowel as die Harambee-voorspoedplan waar dié drie gebiede as prioriteite vir ontwikkeling geïdentifiseer is.” Volgens Geingob het die regering verskeie beleidsinisiatiewe van stapel gestuur en gaan voort om hulpbronne toe te ken om die voorsiening van en verbeterde toegang tot bekostigbare grond, behuising en sanitasie te verseker. “Met ’n enkele ingryping of projek soos die MULSP kan ons verskeie van ons ontwikkelingsdoelwitte takel.”Geingob het ook lof gehad vir die Walvisbaaise munisipaliteit wat die slaggate van ander behuisingsinisiatiewe vermy het waar huise onbewoon bly en deur vandale geteister word.“Die munisipaliteit het sy waglys van aansoekers gefinaliseer en verkoopskontrakte met gekwalifiseerde aansoekers onderteken. Dié model moet deur ander plaaslike owerhede en agentskappe gevolg word wat met die voorsiening van behuising beopdrag is.”Die president het voorts gesê hy sien uit na soortgelyke tasbare resultate van die Shack Dwellers Federation of Namibia wat 100 erwe ontvang het om bekostigbare huise vir sy lede op Walvisbaai op te rig. Die regering het die MULSP in 2015 van stapel gestuur om voortgesette pogings te bespoedig in terme van die diens en lewering van residensiële en bekostigbare behuising in stedelike gebiede.

Geingob oorhandig huise in Walvisbaai

Kommentaar

Republikein 2026-09-17

Meld asseblief aan om kommentaar te lewer

Geingob oorhandig huise in Walvisbaai

Kommentaar

Republikein 2026-09-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.