Geingob draai briek aan

Estelle de Bruyn - Dit is terug na die tekenbord vir die ministerie van armoede-uitwissing en maatskaplike welsyn, nadat pres. Hage Geingob sy voet neergesit het en sy kommer oor die buitensporige koste vir die oprigting van ’n voedselbank uitgespreek het.
Die kwessie het tydens vandeesweek se kabinetsitting ter sprake gekom.
Volgens ’n verklaring deur die mediasekretaris in die kantoor van die president, mnr. Albertus Aochamub, is Geingob van mening dat die hoë koste van die beplande voedselbank nie strook met die doel van die projek nie. Hierbenewens moet die voedselbank op munisipale grond opgerig word wat deur die regering aangekoop moet word.
“Die president het die noodsaaklikheid beklemtoon dat alle instansies, veral streek- en plaaslike owerhede ’n bydrae tot die inisiatief moet lewer ten einde die administratiewe en logistieke koste te besnoei. Die projek is daarop gemik om armoede en hongersnood te verminder soos in die Harambee-plan vir voorspoed uiteengesit word,” lui die verklaring.
Die kabinet het gevolglik besluit om weer na te dink oor die oprigting van ’n voedselbank en meer kwotasies aan te vra vir die bou daarvan. Die minister van armoede-uitwissing en maatskapike dienste, biskop Ze­phania Kameeta, is ook opdrag gegee om met die minister van werke en vervoer, mnr. Alpheus !Naruseb, te skakel ten einde bekostigbare bou-opsies vir die voedselbank te ondersoek.
Geingob het ook gewys op die behoefte om, as ’n besparingsmaat­reël, met ondernemings soos Woermann Brock, Pick n Pay, Checkers en ander te onderhandel oor die stoor van voedsel wat vir die voedselbank bedoel is.
Daar moet ook met hierdie groothandelaars in gesprek getree word oor maniere waarop hulle betrokke kan raak om bystand te verleen met die verspreiding van voedsel aan straatkomitees, wat nou gevorm en opgelei word.
As tussentydse maatreël is besluit om stoorkamers van die kantoor van die eerste minister te gebruik om voedsel te stoor. Sekere kiesafdelings in Windhoek moet ook geïdentifiseer word vir ’n program wie voordeel uit die voedselbank sal trek.
Die president het voorts die ministerie van armoede-uitwissing en maatskaplike welsyn aangemoedig om ’n modelstruktuur van die voedselbanke aan die kabinet voor te lê. ’n Kabinet-dinkskrum oor die voedselbankprojek sal ook in die eerste of tweede week in Junie belê word.
Geingob het reeds voelers na nagenoeg 4 000 kommersiële boere uitgesteek om beeste en lewende hawe vir die voedselbank te skenk. Baie van die boere wat genader is, het gunstig gereageer op die versoek om vrywillige skenkings te maak.
Die ministerie van die omgewing en toerisme is voorts versoek om wild in nasionale parke te identifiseer wat tydens die natuurlike uitdunningsproses, wanneer dit volhoubaar is, aan die voedselbank geskenk kan word. Die ministerie van visserye en mariene hulpbronne is ook versoek om met die vissersgemeenskappe in verbinding te tree om vis as deel van hul maatskaplike verantwoordelikheidsprogram aan die voedselbank te skenk.