Geen verlenging van registrasie

Denver Kisting – Die Verkiesingskommissie van Namibië (ECN) sê by monde van me. Lina Ndengu, sy woordvoerder, in dié stadium is ’n verlenging van die aanvullende registrasieproses nie op die tafel nie.

Dié agt dag lange tydperk verstryk môre.

Mnr. Theo Mujoro (foto), die hoofkiesbeampte, sê voorts ongeveer 96 247 stemgeregtigde Namibiërs het tussen 7 en 12 September aan die proses deelgeneem.

Van dié getal is 34 270 nuwe voornemende kiesers wat vir die eerste keer geregistreer het, sê hy. “Die verskil is mense wat registreer weens ’n verandering van adres en die vervanging van verlore of beskadigde kieskaarte.”

Volgens die kieskalender vir 2020 sal ’n voorlopige kiesersregister tussen 30 September en 5 Oktober by strategiese plekke in alle kiesafdelings en plaaslike owerhede vertoon word, sê Mujoro.
[email protected]