Geen vergadering vir RDP se sentrale komitee

Jacqueline Louw Die president van die Rally for Democracy and Progress (RDP), mnr. Jeremiah Nambinga, het aan die einde van Oktober 'n dringende aansoek by Windhoek se hoërhof ingedien in 'n poging om 'n mosie van wantroue in sy leierskap ter syde te stel en ongeldig te laat verklaar.In dié aansoek het Nambinga die RDP en 18 lede van die party se nasionale uitvoerende komitee gedagvaar. Hy het die hof versoek om 'n besluit van die nasionale uitvoerende komitee nietig en ongeldig te verklaar om 'n mosie van wantroue in hom te aanvaar.Die mosie van wantroue was op die agenda van die sentrale komitee se vergadering wat oor die naweek sou plaasvind.Hy wou ook hê die hof moes 'n besluit van die uitvoerende komitee ongeldig verklaar om 'n vergadering van die party se sentrale komitee vir die naweek te belê.Die nasionale uitvoerende komiteelede wat deur Nambinga gedagvaar is, sluit in die party se visepresident, mnr. Steve Bezuidenhout, hul sekretaris-generaal, mnr. Mike Kavekotora, en me. Agnes Limbo, adjunk-sekretaris-generaal.Nambinga voer in 'n beëdigde verklaring aan die komitee se besluit op 'n vergadering van 12 Augustus om 'n mosie van wantroue in hom te aanvaar, is nietig omdat die komitee nie die outoriteit het om sy magte as RDP-president te herroep nie. Volgens hom is 'n mosie van wantroue 'n onbekende prosedure in die RDP se dissiplinêre reëls en daar word ook nie in die RDP se grondwet daarvoor voorsiening gemaak nie. Hy sê verder die besluit om die mosie van wantroue te aanvaar, is geneem sonder dat dit op die komiteevergadering se agenda was.Adv. Albert Strydom het namens die respondente aangevoer die mosie van wantroue in Nambinga is tydens 'n bespreking van 'n item op die agenda van die vergadering geopper. Nambinga het verkies om nie aan die bespreking deel te neem nie en het uit die vergadering gestap.Strydom sê verder die mosie van wantroue is nie deur die nasionale uitvoerende komitee op 12 Augustus aanvaar nie. Volgens Strydom poog Nambinga deur sy hofaansoek om verdere bespreking en wettige besluitneming deur lede van die RDP te verhoed.Strydom het in sy argument verwys na 'n brief deur die RDP se regsverteenwoordigers aan Nambinga waarin hy daarvan verwittig is dat die uitvoerende komitee hom nie geskors het nie en dat die mosie verwys is na die vergadering wat vir die naweek beoog was.Regter Shafimana Ueitele het die afgelope Vrydag 'n tussentydse interdik uitgereik waarvolgens die RDP se sentrale komitee daarvan weerhou word om voort te gaan met die vergadering wat vir die naweek geskeduleer is.Die regter het verder 'n bevel nisi uitgereik waarvolgens die respondente onder meer op 8 Desember moet aandui hoekom die mosie van wantroue wat deur die RDP se uitvoerende komitee op 12 Augustus aanvaar is, nie ongeldig verklaar behoort te word nie.

Geen vergadering vir RDP se sentrale komitee

Kommentaar

Republikein 2025-11-05

Meld asseblief aan om kommentaar te lewer

Geen vergadering vir RDP se sentrale komitee

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.