Geen saak ná polisie sloer

Henriette Lamprecht Maande ná 'n motorongeluk wat die lewe van 'n matriekleerling van Windhoek geëis het, is die saak teen die bestuurder van die voertuig teruggetrek en van die hofrol geskrap omdat die ondersoek steeds nie afgehandel was nie. Van 'n nadoodse verslag tot verklarings van getuies was agt maande later steeds nie ingedien nie. Die 19-jarige Jacobus van Schalkwyk van Windhoek is van strafbare manslag aangekla en dat hy op 15 Oktober 2016 in of naby Mandume Ndemufayo-rylaan “onregmatig en deur nalatigheid die dood van Dunja von Dewitz veroorsaak het”.Alternatiewelik tot die eerste klagte is Van Schalkwyk ingevolge die Padverkeerswet van roekelose of nalatige bestuur aangekla. Die 18-jarige Von Dewitz se vriend, RJ Visser, is ernstig in die ongeluk beseer.Van Schalkwyk het op 12 Desember, byna twee maande ná die ongeluk op 15 Oktober 2016, vir die eerste keer in die hof verskyn. Hy is op borgtog van N$8 000 vrygelaat en die saak is tot 26 Januarie vanjaar uitgestel. In Januarie is die saak uitgestel tot 31 Maart vir verdere ondersoek omdat daar vir verklarings en 'n fotoplan gewag word en Van Schalkwyk se regsverteenwoordiger, mnr. Jan Wessels, op dié dag by 'n saak in die landdroshof op Otjiwarongo betrokke is. Op 31 Maart is die saak weer uitgestel, dié keer tot 29 Junie. Met Van Schalkwyk se verskyning in Junie was die ondersoek steeds nie afgehandel nie. Volgens hofdokumente erken die staatsaanklaer, mnr. Joseph Andreas, die nadoodse verslag is onder meer nie geliasseer nie, terwyl twee verklarings van getuies sowel as 'n fotoplan uitstaande is. Die aangeleentheid is volgens Andreas met die beheer-aanklaer bespreek wat hom aanbeveel het om die aanklag teen Van Schalkwyk “voorlopig terug te trek”. Wanneer die ondersoek gefinaliseer is, sal die saak volgens die hofdokument “weer terug op die rol geplaas word”. Landdros Vanessa Stanley het gevolglik beveel die saak teen Van Schalkwyk moet teruggetrek en sy borgtog van N$8 000 aan hom terugbetaal word. Republikein het 'n dag ná die ongeluk berig dit het omstreeks 01:30 plaasgevind toe die bestuurder van 'n sedanvoertuig beheer oor die motor verloor en dit omgeslaan het. Von Dewitz is op die toneel dood verklaar, terwyl RJ, wat langs die bestuurder gesit het, in 'n kritieke toestand in die Lady Pohamba-hospitaal opgeneem is. Volgens die destydse woordvoerder van die Namibiese polisie, inspekteur Slogan Matheus, was die bestuurder van die voertuig nie op die toneel nie, met beweringe dat hy van die toneel gevlug het.In November het Matheus erken “tot op hede is geen persoon bevestig as die bestuurder van die motor tydens die ongeluk nie”. Volgens hom was die eienaar en bestuurder van die voertuig egter aan die polisie bekend, maar glo “te dronk om te onthou aan wie hy sy motorsleutels oorhandig het”.Matheus het toe gesê die polisieondersoek duur voort en alle inligting en wenke word opgevolg.

Geen saak ná polisie sloer

Kommentaar

Republikein 2026-08-12

Meld asseblief aan om kommentaar te lewer

Geen saak ná polisie sloer

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.