Geen aksie oor hoë koste van oliefasiliteit

Catherine Sasman - Kabinetsekretaris George Simataa en die Teenkorrupsiekommissie (ACC) se direkteur, mnr. Paulus Noa, word daarvan beskuldig dat hulle nie stappe gedoen het teen moontlike bedrog in die nasionale oliebergingsfasiliteitprojek nie.The Villager van 3 tot 9 Maart berig dat die prokureur-generaal, Sacky Shanghala, in September vir Simataa beveel het om die permanente sekretaris van die Nasionale Beplanningskommissie (NPC), mnr. Leevi Hungamo, te skors en aan te kla oor die toenemende koste van die oliebergingsfasiliteit wat tans op Walvisbaai gebou word.The Villager het verder berig dat Shanghala in Desember vir Noa gevra het om ondersoek in te stel na potensiële korrupsie rondom dié projek.Shanghala het na bewering ook vir Noa gevra vir 'n ondersoek na mnr. Vaino Nghipondoka en sy maatskappy, Babyface Civils, wat in 'n gesamentlike onderneming met China Harbour Engineering Company (CHEC) onder die naam “CBR” die bergingsfasiliteit bou.Noa het op 6 Maart ontken dat enige saak van korrupsie deur die ACC geloods is. “Ek het nie 'n brief van die prokureur-generaal nie,” het Noa gesê.Simataa het op 3 Maart nie ontken dat Shanghala hom beveel het om stappe teen Hungamo te doen nie, maar het gesê alle stappe wat gedoen word, sal afhang van 'n ondersoek deur Shanghala se kantoor.Hy het gesê Shanghala het verskeie verslae oor die bergingsfasiliteit opgestel en ook dat die regering bewus is van die projek se finansieringstruktuur en die finansiële gevolge daarvan.Simataa het gesê daar was 'n ooreenkoms oor die maatreëls om belanghebbendes te betrek sodat die regering ook by enige verdere “finansiële blootstelling” betrek kan word.“Die regering het ook gesê prosedures in die toekenning van die tender moet nagegaan word om te verifieer of daar enigsins afwykings was. Indien wel, sal dié kwessie deur bestaande wetgewing hanteer word,” het Simataa gesê.Hy het bygevoeg 'n besluit is nog nie oor die volgende stappe “in ooreenstemming met grondwetlike bepalings” geneem nie.Shanghala, wat tans in die buiteland is, het gesê hy sou “mettertyd” op vrae reageer.Toenemende kostesDie Nasionale Petroleumkorporasie (Namcor) het in 2008 en 2009 besluit om 'n oliebergingsfasiliteit te bou om die petroleumtoevoermark te betree. Namcor het sedert 2003 oor 'n 50% invoermandaat beskik, wat in 2010 deur die oudminister van myne en energie, mnr. Isak Katali, opgehef is. Namcor, wat tot destyds 'n toevoerooreenkoms met Glencore gehad het, het groot verliese gely en is tegnies bankrot verklaar.Vandag word alle petroleumprodukte weer deur private oliemaatskappye ingevoer.Teen 2010 het Namcor die ontwerpe vir die nuwe bergingsfasiliteit opgeteken, 'n omgewingsimpakstudie is voltooi en die prekwalifikasie van tenders is gefinaliseer. Die koste van die totale projek het in 2010 'n geskatte N$800 miljoen beloop. Daar is toe ook beoog om die projek teen 2012 te voltooi.Na verwagting sal die projek teen die middel van 2017 voltooi wees. Wat kommer wek is dat die beraamde koste nou N$5,5 miljard beloop.“Hierdie onverwagse toename is krimineel,” het 'n anonieme bron gesê.“Daar is geen manier dat die koste vir dieselfde ding só kon styg nie. Aanvanklik was die projek koste-effektief. Wat het intussen gebeur dat dit nou skielik N$5,5 miljard kos? Dis die belastingbetaler se geld. Mense wil weet waarvoor hulle betaal.”Van die redes wat in die verlede vir die drastiese toename gegee is, is dat die ontwerp verander het van 'n ru-oliefasiliteit na 'n bergingsfasiliteit vir verskillende petroleumprodukte soos petrol, diesel en paraffien.Die NPC, aan wie die projek oorhandig is, het alle vrae na die ministerie van myne en energie verwys. Teen druktyd het die ministerie nie op navrae reageer nie.

Geen aksie oor hoë koste van oliefasiliteit

Kommentaar

Republikein 2026-02-05

Meld asseblief aan om kommentaar te lewer

Geen aksie oor hoë koste van oliefasiliteit

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.