Gedig vir Leanne

SOFIA JULIUS SKRYF:

Die gedig is geskryf deur Leon Lombaard vir sy dogter Leane op haar kroonverjaardag op 11 Mei 2021. Dit is regtig pragtig.

Met twee klein pienk voetjies het jy deur my hart kom huppel en

Klein spoortjies kom los,

My gewys die rigting wat jy wou vat

Net om te weet, ek sal altyd jou spoor kan sny waar jy verdwaal

Voetjies wat die mat vuil sou kon trap om my ruggie te kom krap

En soms 'n kortpad vat, wetend of onwetend

Kon hardloop na en van

Die spore van toe en van dan...

Nou is jou treetjies langer en jou voetjies harder

Om eersdaags hulle rigting te gee aan 'n groter wêreld daar buite, spore nou jou eie…

Wens ek vir jou net reguit, oopgekapte paaie

Om te keer vir die seermaak draaie

Kyk mooi na jou rigting van jou voete my kind

Hulle loop nie altyd soos die rigting van die wind

Die branders gaan soms jou spore toe spoel, maar

Onthou dan net daar sal nuwe spore kan kom, waar die branders nie sal kan bykom

En eendag gaan jou voetjies my verruil vir 'n kansel wandel

’n paadjie wat jy sal wil vat

Dan sal ek onthou die spoortjies deur my hart

As hulle maar tog net weer eenkeer die mat vuil wou trap…