Gebed eerder as entstof

Henriette Lamprecht – Byna die helfte van Namibiërs glo gebed is meer doeltreffend teen Covid-19 as 'n entstof. Sowat 80% is ook bekommerd maatskappye wat dié entstowwe vervaardig, gaan probeer om dit op Namibiërs uit te toets, selfs al is dit nog nie as veilig bewys nie. Net die helfte van Namibiërs wat aan 'n telefoniese opname deur Afrobarometer deelgeneem het, sê hulle sal waarskynlik probeer om ingeënt te word. Minder as 40% van respondente vertrou die regering “net 'n bietjie” om te verseker dat enige Covid-19-entstof wat ontwikkel of aan Namibiërs gebied word, veilig is voordat dit plaaslik gebruik word. Volgens die opname wat vanaf Desember verlede jaar tot Februarie vanjaar uitgevoer is, het byna alle volwasse Namibiërs erken hulle is bekommerd oor die uitwerking van die pandemie op hul huishoudings, die land en die toekoms van hul kinders. Die meerderheid se grootste kommer was egter oor die veiligheid van entstowwe en verkies om eerder op gebed as entstowwe staat te maak om te keer dat hulle Covid-19 opdoen.Sowat nege uit tien volwasse Namibiërs sê hulle is “ietwat” of “baie bekommerd” dat 'n lid van hul huishouding Covid kan opdoen (86%) en dat die pandemie die ekonomie (94%), hul huishouding se ekonomiese situasie (92%) en die toekoms van die land se kinders (94%) negatief kan raak. Volgens die opname vertrou twee derdes (65%) nie die regering oor die entstowwe wat gebruik word nie, terwyl 50% sê selfs al sê die regering die entstowwe is veilig, gaan hulle hul nie laat inent nie. Meer as drie uit vier Namibiërs (77%) is bekommerd entstofvervaardigers gaan probeer om dit op hulle te toets, selfs as dit nie as veilig bewys nie. Byna twee derdes glo gebed is meer doeltreffend (46%) of bietjie meer doeltreffend (17%) as 'n entstof om hulle teen Covid te beskerm. Die opname het 1 200 onderhoude oraloor streke en landelike en stedelike gebiede ingesluit. Onderhoude is in Engels, Afrikaans, Oshikwanyama, Otjiherero of Rukwangali tussen 11 Desember 2020 en 10 Februarie 2021 gevoer.Intussen het Gallup in 'n wêreldwye opname oor inwoners se gewilligheid om teen Covid ingeënt te word, Namibië uitgesonder as een van die lande in Afrika waar die meerderheid gesê het hulle sal nie die entstof neem nie. Die ander meerderhede in Afrika sluit Senegal en Togo in. Volgens Gallup het 51% van Namibiërs teen immunisering gestem, teenoor Gaboen se 66% en Kameroen se 65%. Togo en Namibië was twee van die land waar 2% of minder van die bevolking teen laat April reeds een dosis van die entstof ontvang het. Volgens die Gallup-opname het die meerderheid van volwassenes wêreldwyd (68%) gesê hulle sal instem om ingeënt te word sou die entstof gratis wees. Soos die globale aantal het die persentasies in die meeste lande te kort geskiet van die beraamde 70% tot 90% wat volgens sommige kenners nodig gaan wees om kudde-immuniteit in 'n bevolking te bereik. Sou elkeen wat volgens die opname gesê het hulle was gewillig om ingeënt te word, sal net 38 van die 116 lande wat Gallup deur die laaste helfte van 2020 geëvalueer het, die minimum 70%-drumpel vir kudde-immuniteit bereik. Net een land, Mianmar, sal die uiteindelike beraming van 90% bereik. – henriette@republikein.com.na

Gebed eerder as entstof

Kommentaar

Republikein 2026-02-03

Meld asseblief aan om kommentaar te lewer

Gebed eerder as entstof

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.