Gardiner verseël dubbele goud 2 jaar ná Doha
Olimpiese Spele
Tielman van Lill – Die 25-jarige Steven Gardiner van die Bahamas het gister by die Olimpiese Spele in Tokio die 400 meter vir mans in 43.83 sekondes gewen. Dit is sy beste tyd vir die afgelope seisoen.
Die lang en lenige Gardiner (1.93 m) spog nou met Olimpiese goud saam met die goue medalje wat hy in 2019 by die wêreldkampioenskap in Doha, Katar, in 43.48 beklink het.
Wayde van Niekerk van Suid-Afrika, wat die Olimpiese en wêreldrekord van 43.03 in Augustus 2016 in Rio de Janeiro behaal het, se merk sal dus vir minstens nog drie jaar veilig wees voor die volgende Spele in 2024 in Parys, Frankryk, aangebied word.
Van Niekerk moes dié week (vyfde in die derde semifinaal met 45.14) sy drome van 'n tweede Olimpiese titel vaarwel roep. Hy het sy eerste uitdunresies met 'n ewe makkerige 45.25 in die derde plek oorleef.
Anthony Jose Zambrano (23) van Colombia (44.08) en Kirani James (28) van Grenada (44.19) was tweede en derde in die finaal. Isaac Makwala (35) van Botswana, die enigste Afrikaan in die resies, het sewende in 44.94 geëindig. James het sy semifinaal in 43.88 gewen, maar kon nie dié peil herhaal nie.
• Karsten Warholm (25) van Noorweë sal sekerlik ná sy verbysterende Olimpiese rekord in die 400-hekkies heelwat van die wêreld se top 400-atlete sweterige nagmerries gee.
Warholm het sy 400 hekkies-aanslag laas Vrydag met 48.65 in die uitdunronde geopen en dit Sondag tydens die semifinale met 47.30 opgevolg.
Die oomblik van waarheid vir dié Noorweër het egter Dinsdag met die finaal aangebreek. Hy met 'n verstommende 45.94 sekondes sy eie wêreldrekord (46.70, 1 Julie 2021) en die stokoue Olimpiese rekord (46.78) van Kevin Young van die VSA uit die rekordboeke gevee. Young het dié rekord 29 jaar gelede op 6 Augustus 1992 in Barcelona, Spanje, behaal.
Waarnemers wonder tereg wat sal gebeur as Warholm die dag besluit om hom op die gewone 400 toe te spits? Hy het laas op 8 September 2018 die knie in die 400-hekkies gebuig en was sedertdien in 20 opeenvolgende wedlope eerste oor die wenstreep.
Die legendariese Edwin Moses (VSA) se onoorwonne rekord in 122 400 hekkieswedlope en 109 finale kan moontlik in Warholm se visier wees. Moses was vir nege jaar en nege maande baas voor hy geklop is.
Indien die Noorweër die gewone 400 aandurf, sal Van Niekerk se tyd beslis bedreig word.
– [email protected]
Die lang en lenige Gardiner (1.93 m) spog nou met Olimpiese goud saam met die goue medalje wat hy in 2019 by die wêreldkampioenskap in Doha, Katar, in 43.48 beklink het.
Wayde van Niekerk van Suid-Afrika, wat die Olimpiese en wêreldrekord van 43.03 in Augustus 2016 in Rio de Janeiro behaal het, se merk sal dus vir minstens nog drie jaar veilig wees voor die volgende Spele in 2024 in Parys, Frankryk, aangebied word.
Van Niekerk moes dié week (vyfde in die derde semifinaal met 45.14) sy drome van 'n tweede Olimpiese titel vaarwel roep. Hy het sy eerste uitdunresies met 'n ewe makkerige 45.25 in die derde plek oorleef.
Anthony Jose Zambrano (23) van Colombia (44.08) en Kirani James (28) van Grenada (44.19) was tweede en derde in die finaal. Isaac Makwala (35) van Botswana, die enigste Afrikaan in die resies, het sewende in 44.94 geëindig. James het sy semifinaal in 43.88 gewen, maar kon nie dié peil herhaal nie.
• Karsten Warholm (25) van Noorweë sal sekerlik ná sy verbysterende Olimpiese rekord in die 400-hekkies heelwat van die wêreld se top 400-atlete sweterige nagmerries gee.
Warholm het sy 400 hekkies-aanslag laas Vrydag met 48.65 in die uitdunronde geopen en dit Sondag tydens die semifinale met 47.30 opgevolg.
Die oomblik van waarheid vir dié Noorweër het egter Dinsdag met die finaal aangebreek. Hy met 'n verstommende 45.94 sekondes sy eie wêreldrekord (46.70, 1 Julie 2021) en die stokoue Olimpiese rekord (46.78) van Kevin Young van die VSA uit die rekordboeke gevee. Young het dié rekord 29 jaar gelede op 6 Augustus 1992 in Barcelona, Spanje, behaal.
Waarnemers wonder tereg wat sal gebeur as Warholm die dag besluit om hom op die gewone 400 toe te spits? Hy het laas op 8 September 2018 die knie in die 400-hekkies gebuig en was sedertdien in 20 opeenvolgende wedlope eerste oor die wenstreep.
Die legendariese Edwin Moses (VSA) se onoorwonne rekord in 122 400 hekkieswedlope en 109 finale kan moontlik in Warholm se visier wees. Moses was vir nege jaar en nege maande baas voor hy geklop is.
Indien die Noorweër die gewone 400 aandurf, sal Van Niekerk se tyd beslis bedreig word.
– [email protected]
Kommentaar
Republikein
Geen kommentaar is op hierdie artikel gelaat nie