Gambiese polisie ondersoek verdwynings

Die polisie in Gambië ondersoek meer as 30 gevalle van mense wat onder Yahya Jammeh se voormalige heerskappy in aanhouding verdwyn het. Ondersoekers het ook geheime grafte ontdek.Die koördineerder vir misdaadbestuur, Babucarr Sarr, sê 33 sake is sedert Januarie geopen, met nog wat verwag word. Tien mense, ingesluit lede van Jammeh se Jungler-moordbende, is reeds in hegtenis geneem. “Tot op hede is 33 sake geopen,” het Sarr gesê. “Ons het in sewe van die gevalle reeds leidrade.”Dit is die eerste keer dat die Gambiese polisie ’n getal koppel aan gedwonge verdwynings sedert Jammeh in Januarie vanjaar nie meer in beheer is nie, ná hy die land vir 22 jaar met ’n ystervuis regeer het. Jammeh het die leisels aan president Adama Barrow oorhandig ná ’n uitgerekte krisis in die klein Wes-Afrikaanse landjie.Die oorskot van vier mans is tot dusver opgegrawe en sluit in die liggaam van die opposisie-aktivis Solo Sandeng en drie mans wat onsuksesvol probeer het om Jammeh in 2014 in ’n staatsgreep uit die kussings te lig. Momodou Njie, wie se neef, Lamin Sanneh, verlede week naby die voormalige president se tuisdorpie, Kanilai, gevind is, sê families wil hê die regering moet hul geliefdes se oorskot oorhandig sodat hulle behoorlik begrawe kan word. “Ek sou graag wou hê hulle moet op ’n plek begrawe word, op ons Moslem-manier, en die plek moet as ’n nasionale monument gemerk word,” het Njie gesê.Hy het gesê hy het doodsdreigemente teen hom en sy vrou ontvang, en ook dreigemente teen sy eiendom. Volgens hom moet die regering intimidasie deur Jammeh-ondersteuners stopsit.Kolonel Lamin Sanneh, wat in Jammeh se presidensiële wag gedien het, asook Alagie Nyass en Njaga Jagne, wat vir die Amerikaanse weermag in Irak diens gedoen het, is onder dié wat probeer het om die voormalige president se regering in Desember 2014 omver te werp. Die drie mans is in die onmiddellike nadraai van die poging tot ’n staatsgreep dood, maar die ware omstandighede van hul dood is steeds onduidelik. Lede van Jammeh se uiters lojale moordbende, bekend as die Junglers, word reeds vir jare deur die Verenigde Nasies en menseregtegroepe van onwettige moorde en martelings beskuldig. Verskeie lede van dié bende is in aanhouding en werk volgens Sarr saam met die owerhede in hul ondersoek na ’n lang lys onopgeloste verdwynings.“Ons moet verseker dat ’n behoorlike meganisme en stelsel bestaan om omvattend ondersoek in te stel na die ongelukkige voorvalle wat sedert 1994 in die land voorgekom het,” het die minister van justisie, Abubacarr Tambadou, aan die nuusagentskap AFP gesê. Tambadou is aan die voorpunt van pogings om ’n waarheids- en versoeningskommissie op die been te bring wat binne die volgende ses maande met hul verrigtinge sal begin. Die verrigtinge sluit die aanhoor van slagoffers se getuienis en die besluit oor toekomstige vervolgings in. – AFP/News24

Gambiese polisie ondersoek verdwynings

Kommentaar

Republikein 2025-11-05

Meld asseblief aan om kommentaar te lewer

Gambiese polisie ondersoek verdwynings

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.