Fury se geveg in Desember van die baan

Skaars ’n maand nadat die Britse swaargewig-bokser Tyson Fury gesê het dat sy volgende geveg op 5 Desember in Londen sou wees, het hy sy deuntjie verander en bevestig dat hy nie vanjaar weer deur die toue sal klim nie.
Dié 32-jarige kampioen van die Wêreldboksraad (WBC) was laas in Februarie in aksie, toe hy Deontay Wilder in Las Vegas in die sewende ronde tot oorgawe gedwing het.
“Die Gypsy King keer in 2021 terug. Net diegene wat my 100% sedert my terugkeer ondersteun het, sal saam met my wees vir die glorie,” het Fury in ’n kriptiese boodskap op Twitter gesê.
Fury het geen rede gegee waarom die beplande geveg in Desember (teen ’n onbekende teenstander) nie meer sal plaasvind nie. Hy het ook nie onthul wie hy volgende in die kryt gaan pak nie.
Wilder wil ’n derde keer teen Fury veg. Hul eerste geveg, in 2018, het gelykop geëindig. Die Brit weier egter om tot nog ’n kragmeting in te stem nadat Wilder hom daarvan beskuldig het dat hy verneuk het in hul ontmoeting in Februarie.
– Reuters, Netwerk24