Freyer, Adrian wen nasionale titels

Andrew Poolman - Martin Freyer en Vera Adrian is gister as nasionale kampioene bekroon nadat hulle die padresies van die Namibiese Fietsryfederasie en die hoofborg Pupkewitz Megabuild gewen het.Die 22-jarige Freyer, 'n student aan die Universiteit van Kaapstad, het 'n uitmergelende resies oor 145 km gewen deur die finale aanslag van Drikus Coetzee (tweede) en Dan Craven (derde) af te weer.Die vroueresies oor 107 km is ook in 'n naelrit eindstreep toe beklink, waar Vera Adrian net-net voor Michelle Vorster klaargemaak het om die titel te behou wat sy ook verlede jaar ingepalm het.Die roete wat by Carin Park naby Brakwater begin en geëindig het, het die ryers ook op die Westelike Verbypad en die Daan Viljoen-pad geneem, met twee rondtes waar die bulte van Matchless-myn bestyg moes word voordat hulle weer terug gedraai het. Takties sou dit dus waarskynlik altyd neerkom op 'n finale naelrit, eerder as dat iemand te vroeg en tevergeefs sou probeer wegbreek.Freyer het agterna aan die media gesê die roete was perfek uitgelê en dat hy dit geniet het om met die mees gedugte ryers in die land kragte te meet.“Dit was 'n voorreg om saam met die ervare Dan Craven te ry, want ek het nog nie dikwels tevore die voorreg gehad nie. Die weer het mooi saamgespeel en hoewel ek teen van die klimdele gesukkel het, het ek genoeg oor gehad om te versnel toe ons binne sig van die eindstreep was.”Craven moes twee maal papwiele omruil en het boonop 'n los sitplek oor die laaste 60 km gehad, maar was agterna vol lof vir die voorste groep van tien ryers wat ná 145 km saam-saam oor die eindstreep geseil het.Adrian, wat ook vroeg in die seisoen reeds goed op dreef is, het gesê sy is bly om haar nasionale trui te kon behou, maar dat dit ook net die begin van harde werk vir die jaar is. Sy sien uit om ná afwesigheid in onlangse jare vir komende naweek se Nedbank Cycle Challenge aan te tree.As voormalige kontinentale fietsrykampioen sal Adrian ook weer een van die sterk aanspraakmakers wees by die Afrika-kampioenskap wat vanaf 14 tot 20 Februarie in Kigali, Rwanda aangebied word.Alex Miller was die naweek afwesig, maar met goeie rede – die jongman van die suide het sy junior mansresies by die SA bergfietsreeks op Stellenbosch gewen as deel van sy doelwit om vanjaar soveel as moontlik punte op die UCI-ranglys te verdien.Die Namibiese span na die Afrika-kampioenskap in Rwanda bestaan uit Vera Adrian (elite vroue), Drikus Coetzee, Dan Craven, Martin Freyer, Chiponeni (Fiffy) Kashululu, Xavier Papo, Loto Petrus (elite mans) en die viertal junior mans Charl du Plooy, Dieter Koen, Alex Miller en Schalk van der Merwe.Die ryers sal deur Hans du Toit (afrigter) en Rolf Adrian (spanbestuurder) vergesel word. TYDTOETSDrikus Coetzee en Irene Steyn het Vrydag met die elite titels weggestap na afloop van die individuele tydtoets wat oor 44 km vir die mans en 22 km vir die vroue beslis is.Coetzee (55 minute 18 sekondes) het sy hoofdoelwit van die naweek behaal en het sy stempel afgedruk deur 'n wentyd op te stel van meer as 'n minuut vinniger as Martin Freyer wat tweede was (56:47). Derde was André de Klerk (58:30), gevolg deur Dan Craven (59:18), Horst Neumann (59:30) en Gerhard Mans junior (1:00:22).In die vroue tydtoets het Vera Adrian met tegniese probleme tyd verloor en moes met die silwermedalje tevrede wees. Die vinnigste tyd is deur Michelle Döman opgestel (33 minute 00 sekondes), maar haar Namibiese burgerskap is nog nie uitgeklaar nie en sy kwalifiseer dus nie vir die medaljes nie. Irene Steyn (33:39) het die goud opgeraap terwyl Adrian in 33:48 klaargemaak het.

Freyer, Adrian wen nasionale titels

Kommentaar

Republikein 2025-07-18

Meld asseblief aan om kommentaar te lewer

Freyer, Adrian wen nasionale titels

Kommentaar

Republikein 2025-07-18

Meld asseblief aan om kommentaar te lewer

MELD AAN

Advertensie