Franse toeriste trek vuur

Tanja BauseBietjie meer as 'n jaar nadat drie Franse en een Kanadese burger die Garub-treinstasie buite Aus asook padtekens met graffiti bemors het, het vier jong Franse toeriste nou bome by die Erongo Plateau Camp beskadig. Volgens me. Conny Kayser, eienaar van die kamp, het die twee mans en twee vroue wat Parys, Frankryk, as hul stad van herkoms aangegee het, op 29 April by die kampeerplek ingeboek. “Hulle was ons enigste gaste vir die aand en toe Paulus (Lameck, opsigter) by die kampeerplek aangekom het, het hy my onmiddellik gebel en van die skade ingelig. Ek het gedink hulle het 'n paar droë takke afgebreek om vuur te maak. Ek kon dit nie glo toe ek die foto's sien nie; hulle het dik, groen, gesonde boomtakke afgebreek. “Ek kan glad nie verstaan hoe iemand so iets kan doen nie. Wat gaan deur jou kop terwyl jy dit doen?”Daar is vier kampplekke en by drie daarvan is bome beskadig. “Hulle al vier moes bo-op die takke gestaan of daaraan gehang het en met krag die goed verniel het. Geen geld kan dit regmaak nie; die skade is gedaan. Dit is nie asof die bome hier by ons vinnig groei nie.”Mnr. Achille Pons, een van die toeriste, het by navraag per WhatsApp geantwoord hulle het op een tak probeer klim om 'n foto van die sonsondergang te neem toe dit deels meegegee het. “Ons moes dit nie probeer het nie, maar onnoselheid is menslik en ek vra verskoning. Ons wou die eienaar waarsku, maar ons het hom nie weer gesien nie en het die tak net so gelos omdat ons gedink het hy sal beter weet wat om te doen,” het hy gesê. Volgens hom het die klaers dieselfde tak vanuit verskeie hoeke afgeneem sodat dit soos baie takke lyk. “By nommer 3 waar hulle gekamp het, het hulle 'n tak van 'n baie groot boom afgebreek; so ook by kamp 2. By die ander kampplek het hulle takke van 'n kleiner boom gebreek,” sê Lameck egter.“Ek is die volgende oggend na die kampplek toe om te kyk of alles reg is, maar toe hulle my sien aankom, het hulle weggery.”Volgens Lameck het hulle ook tot laatnag musiek gespeel en geraas, maar dit was nie erg ontstellend nie, omdat hulle die enigste gaste was.Pons het bygevoeg: “Ek dink die kommentaar in die sosiale media is buite verband geruk. Ons optrede in Namibië was nie betreurenswaardig nie. Ek wil selfs noem dat ons ons goeie daad gedoen het deur vrywilligerswerk vir minderbevoorregte op Otjiwarongo. Ek vra verskoning namens almal wat betrokke was.”Kayser het op die veiligheidskameras 'n foto van die vier gekry toe hulle by die kamp aangery gekom het. Hulle het ook op die hoofpad op die daktente gesit. Pons antwoord: “Hieroor het ek geen kommentaar nie, omdat dit nie baie gebeur het nie en ons nie geweet het dit sou probleme in Namibië veroorsaak nie. Miskien was net ons veiligheid 'n probleem, maar dit is persoonlik en maak nie vir jou saak nie.”Volgens mnr. Abduhl Ismael, hoofbestuurder van Britz Car Rental Namibia, het die mense die volgende dag (1 Mei) die voertuig teruggegee. “Ons is afhanklik van toeriste, maar hulle moet ook verantwoordelik wees nie net in Namibië nie, maar in enige land wat hulle besoek,” het hy gesê. Pons het sy misnoeë uitgespreek oor die skending van sy privaatheid in die sosiale media en eis die plasings moet verwyder word. By die Desert Hills Lodge naby Sesriem het dieselfde vier volgens me. Tuli Mwapopi op 19 April ook in die nag harde musiek gespeel en op mekaar geskree.“Ek en die bestuurder het oorgestap en gesê hulle moet die ander gaste om verskoning vra vir hul gedrag, maar hulle het botweg geweier. Ons twee het die volgende dag namens hulle verskoning gaan vra nadat hulle vroeg weg is.” – tanja@republikein.com.na

Franse toeriste trek vuur

Kommentaar

Republikein 2025-05-01

Meld asseblief aan om kommentaar te lewer

Franse toeriste trek vuur

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie