Forensiese ondersoek kom ná brand

Jessica Botes - Die omvang van die skade aan die Dolphin-apteek op Swakopmund, wat Dinsdag in 'n reusebrand verswelg is, is nog nie bepaal nie.Volgens 'n betroubare bron sal dr. Paul Ludik, ’n forensiese deskundige, die ondersoek na die oorsaak van die brand lei. 'n Span word glo ook van Windhoek af gestuur om 'n private ondersoek namens die betrokke versekeringsmaatskappye te doen. Mnr. Adri Goosen, Swakopmund se brandweerhoof, het gister vir Republikein gesê hy het die noodoproep oor die brand om 14:34 ontvang. Hy het bevestig al die brandweerlorries was binne 10 minute op die toneel en hul watertenke was vol.Goosen het beweringe ontken dat 'n foutiewe brandkraan op die toneel die brandbestrydingspogings benadeel het.“Een van die geboue is onder konstruksie en die brandkraan voor hierdie gebou is dus nog nie deur ons getoets of goedgekeur nie. Ek het gedink daar sou water in dié kraan wees, maar hulle moes 'n stopkraan toegedraai het omdat die waterdruk baie swak was. Ek wou egter nie die stopkraan oopdraai nie omdat dit groot skade aan die gebou kon veroorsaak.“Ek het toe onmiddellik die pyp aan die brandkraan om die hoek (sowat 30 m verder) gekoppel waar daar genoeg druk en water was. Ons het op geen tydstip tydens die voorval ’n tekort aan water gehad nie,” het Goosen gesê.Volgens hom was die brandweer se grootste uitdaging om die reusevlamme te blus. Bykans 14 000 l water is hiervoor gebruik. Goosen het gesê hoewel dit 'n groot brand was, was hy nooit bekommerd dat enige ontploffings sou plaasvind of dat die brand na die petrolstasie oorkant die pad sou versprei nie. “Ons kon vinnig daarin slaag om die vlamme onder beheer te kry. Al wat ontplof het, was 'n paar sproeibotteltjies wat harde geluide gemaak het en op die pad te lande gekom het,” het hy gesê.Die vlamme is om 15:30 geblus en die brandweer het die toneel om 19:30 verlaat.“Ons het lank ná die brand geblus is op die toneel gebly om kole en brandpunte te blus.”Goosen het sy waardering vir die hulp van lede van E-Med Rescue, Swakopmund se buurtwag en die publiek uitgespreek. Werkers was gisternamiddag besig om die gate waar die apteek se vensters was, met houtpanele toe te maak.Boodskappe van medelye met die eienaar van die apteek het op sosiale media ingestroom. Opknapwerk ter waarde van nagenoeg N$3 miljoen aan die binnekant van die apteek is ’n paar maande gelede begin en was byna voltooi. Volgens Goosen is beweringe nie bevestig dat die brand in dr. Ruediger Moisel se aangrensende praktyk ontstaan het nie.

Forensiese ondersoek kom ná brand

Kommentaar

Republikein 2026-01-02

Meld asseblief aan om kommentaar te lewer

Forensiese ondersoek kom ná brand

Kommentaar

Republikein 2026-01-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.