Fop-polisie kaap vrou op verbypad

Augetto Graig – ’n Jong vrou is Sondag omstreeks 19:45 teen skemertyd by ’n “padblokkade” op die westelike verbypad gestop.Haar twee maande oue seuntjie was saam met haar in die voertuig in sy babastoel. Die verdagtes wat hulself as polisiebeamptes voorgedoen het, het haar in ’n lokval gelei en haar met ’n onbekende voorwerp geslaan.Volgens die polisie se misdaadverslag is ’n saak van roof met verswarende omstandighede aanhangig gemaak.Die voorval het by die kruising van Florence Nightingale-straat en die B1-snelweg gebeur.“Na bewering het onbekende verdagtes hulle as polisielede voorgedoen en die slagofffer met ’n onbekende voorwerp geslaan, en sonder haar toestemming met haar Volkswagen Polo en iPhone op die vlug geslaan,” luidens die verslag. Die voertuig is gevind en die ondersoek duur voort.Die slagoffer – wat gevra het om anoniem te bly – het oor die gebeure vertel.Sy was op pad vanaf Donkerhoek na Doradopark en het aanvanklik nie die voertuig agter die brug se pilare gesien nie. Twee mans geklee in polisie-uniforms het haar ’n ent voor die brug beveel om te stop. “Hulle was soos polisiebeamptes aangetrek; die uniform, die pet, die reflekterende baadjies,” onthou sy. “Hulle het ’n voertuig voor my gestop, maar het hom weer weggewys. Hy het eers gevra dat ek die kattebak moet oopmaak, maar toe ek huiwer, het hy my lisensie gevra. Die ander een was agter die motor terwyl ek my lisensie gesoek het. Die slag het van nêrens gekom nie. Ek weet nie waarmee hy my geslaan het nie; dit kon sy vuiste, of ’n vuurwapen gewees het.“Toe ek langs die pad wakker skrik, was daar ’n man wat my gehelp het. Hy het die babastoel en doeksak langs my verwyder en in sy voertuig gesit. Hy het my na ’n polisiekantoor geneem,” sê sy.Volgens haar was dit nie maklik om die voorval by die Katutura-polisiekantoor aan te meld nie, aangesien ’n saak nie sonder haar voertuig se VIN-nommer aanhangig gemaak kon word nie. Sy moes daarvoor terug huis toe gaan.Intussen het haar suster speurders van die Windhoekse stadspolisie genader en deur onderskepte inligting kon hulle omstreeks 23:00 haar motor in Goreangab opspoor. Verskeie onderdele was reeds gestroop. Sy sê die saak is uiteindelik by die hoofpolisiekantoor in Windhoek geopen nadat haar gestroopte voertuig reeds opgespoor is. Volgens haar is ’n saaknommer egter nog nie uitgereik nie.Namibia Marshall Rangers het gewaarsku soortgelyke taktieke is veral in Suid-Afrika gewild, en misdadigers het in die buurland tot fop-uniforms en voertuie wat soos polisievoertuie lyk. “Sou iemand jou probeer aftrek en jy voel onseker, raai ons aan jy sit die noodligte aan, dui aan dat hulle jou moet volg, en ry dan na die naaste polisiekantoor, vulstasie of iewers in die publiek waar jy veilig kan stop en voor getuies die situasie kan hanteer.” Jy het die reg om vir identifikasie te vra of jy kan die polisie by 10111 kontak, het die Namibia Marshall Rangers gesê.Die nasionale polisiewoordvoerder, adj.komm. Kauna Shikwambi, stem saam, en sê die nabootsing van polisiebeamptes is ’n wêreldwye probleem. Alhoewel sy sê daar was nie onlangs baie soortgelyke insidente nie, word amper elke jaar sulke gevalle aangemeld, sê sy. “Daar is altyd voorvalle soos dié en individue bestaan wel wat hulle as polisiebeamptes voordoen. Hulle is daar,” sê sy, met verwysing na ’n insident verlede jaar toe verdagtes vermom as polisiebeamptes mense probeer afpers het. – augetto@republikein.com.naFOTO’s verskafDie binnekant van die voertuig wat Sondag voor sewe in Windhoek gekaap is.Die hoofligte is uit die voertuig verwyder.Dié polisieklere is verlede jaar by boewe afgeneem nadat hulle gevang is.

Fop-polisie kaap vrou op verbypad

Kommentaar

Republikein 2026-06-19

Meld asseblief aan om kommentaar te lewer

Fop-polisie kaap vrou op verbypad

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.