Folau steek voelers uit na Bulle
Rugby
Cobus Claassen - Die gedagte van die oud-Wallaby Israel Folau in 'n Bulle-trui op Loftus Versfeld sou ondersteuners in dié kontrei sekerlik geesdriftig maak.
So ook was Alfons Meyer, die Blou Bulle Maatskappy (BBM) se uitvoerende hoof, baie opgewonde toe iemand in die Folau-kamp onlangs die Bulle se belangstelling getoets het.
“Ek is nie seker of dit Folau se prokureur is nie, maar 'n prokureur het ons genader om te hoor of ons sou belangstel om hom te kontrakteer.
“Dit het my aanvanklik opgewonde gemaak, maar as jy nugter oor die saak dink, is dit eenvoudig nie die risiko werd nie.
“Hy is net té omstrede en jy stel jou bloot deur hom te kontrakteer,” sê Meyer.
Folau sou nietemin 'n groot aanwins gewees het. Die Bulle soek juis 'n buitesenter met internasionale ervaring nadat Jesse Kriel weg is Japan toe.
Die 30-jarige Folau het in die verlede dikwels vir Australië en die Waratahs buitesenter gespeel.
'n Agterlyn met Folau, Warrick Gelant, Rosko Specman en Cornal Hendricks sou moles gemaak het op die aanval.
“Dit is jammer, want hy is 'n baie spesiale speler. Folau tel waarskynlik onder die voorste twee, drie spelers ter wêreld.
“Was dit nie vir sy (homofobiese) uitsprake nie, sou ons wat wou gee om 'n speler met sy vermoë in die groep te hê,” sê Meyer.
Rugby Australië (RA) het vandeesweek 'n vertroulike skikkingsooreenkoms met Folau bereik. RA het Folau ná 'n marathon-onderhandelingsproses verskoning gevra vir “enige pyn of skade” wat hy en sy gesin gely het.
Folau het aangevoer hy is in Mei vanjaar onwettig afgedank weens sy geloofsoortuigings en hy was oorgehaal om RA in die hof te pak.
• Meyer sê intussen hulle het probeer om die Skotse senter Huw Jones na Pretoria te lok vir die Superreeks.
“Ons soek steeds na 'n senter wat op toetsvlak gespeel het en ons wou met Huw onderhandel het, maar hy wil eerder Kaap toe gaan.”
Die Bulle-kaptein, Burger Odendaal, en Johnny Kotze lyk na die span se voorkeur-senterpaar vir volgende jaar se Superreeks.
Dylan Sage sal ook in Januarie weer by die span aansluit nadat hy by die Blitsbokke diens gedoen het.
'n Blink toekoms word vir die Junior Springbok Marnus Potgieter voorspel, maar hy is net 20 en sal nie oorhaastig aan Superrugby blootgestel word nie.
– Netwerk24
So ook was Alfons Meyer, die Blou Bulle Maatskappy (BBM) se uitvoerende hoof, baie opgewonde toe iemand in die Folau-kamp onlangs die Bulle se belangstelling getoets het.
“Ek is nie seker of dit Folau se prokureur is nie, maar 'n prokureur het ons genader om te hoor of ons sou belangstel om hom te kontrakteer.
“Dit het my aanvanklik opgewonde gemaak, maar as jy nugter oor die saak dink, is dit eenvoudig nie die risiko werd nie.
“Hy is net té omstrede en jy stel jou bloot deur hom te kontrakteer,” sê Meyer.
Folau sou nietemin 'n groot aanwins gewees het. Die Bulle soek juis 'n buitesenter met internasionale ervaring nadat Jesse Kriel weg is Japan toe.
Die 30-jarige Folau het in die verlede dikwels vir Australië en die Waratahs buitesenter gespeel.
'n Agterlyn met Folau, Warrick Gelant, Rosko Specman en Cornal Hendricks sou moles gemaak het op die aanval.
“Dit is jammer, want hy is 'n baie spesiale speler. Folau tel waarskynlik onder die voorste twee, drie spelers ter wêreld.
“Was dit nie vir sy (homofobiese) uitsprake nie, sou ons wat wou gee om 'n speler met sy vermoë in die groep te hê,” sê Meyer.
Rugby Australië (RA) het vandeesweek 'n vertroulike skikkingsooreenkoms met Folau bereik. RA het Folau ná 'n marathon-onderhandelingsproses verskoning gevra vir “enige pyn of skade” wat hy en sy gesin gely het.
Folau het aangevoer hy is in Mei vanjaar onwettig afgedank weens sy geloofsoortuigings en hy was oorgehaal om RA in die hof te pak.
• Meyer sê intussen hulle het probeer om die Skotse senter Huw Jones na Pretoria te lok vir die Superreeks.
“Ons soek steeds na 'n senter wat op toetsvlak gespeel het en ons wou met Huw onderhandel het, maar hy wil eerder Kaap toe gaan.”
Die Bulle-kaptein, Burger Odendaal, en Johnny Kotze lyk na die span se voorkeur-senterpaar vir volgende jaar se Superreeks.
Dylan Sage sal ook in Januarie weer by die span aansluit nadat hy by die Blitsbokke diens gedoen het.
'n Blink toekoms word vir die Junior Springbok Marnus Potgieter voorspel, maar hy is net 20 en sal nie oorhaastig aan Superrugby blootgestel word nie.
– Netwerk24
Kommentaar
Republikein
Geen kommentaar is op hierdie artikel gelaat nie