Fitty se prokureurs braak gal

Denver Kisting – Die Namibiese polisie en die Teenkorrupsiekommissie (ACC) het die onlangse beslaglegging op ’n spogmotor van een van die Fishrot-beskuldigdes in “’n ware sirkusspektakel” omskep. Só vaar die prokureur mnr. Richard Metcalfe namens mnr. Tamson (Fitty) Hatuikulipi uit in ’n vier bladsy lange brief aan die owerhede. Metcalfe sê die gekonfiskeerde Mercedes Benz SL 65 AMG met die nommerplaat, FITLAS NA, is al sedert Hatuikulipi en kie se inhegtenisneming op 27 November 2019 in onbruik. “Hierdie verbluffende ondersoektegniek en verkwisting van polisiehulpbronne verstom selfs die stompste regspraktisyn en denkende lede van die publiek." Volgens Metcalfe het ’n beampte verbonde aan die ACC die prokureur se vennoot, mnr. Florian Beukes, Vrydag 23 Oktober om 17:00 weens die beplande beslaglegging gebel. Beukes het toe die beampte na Hatuikulipi se vrou verwys.Dieselfde aand het komm. Nelius Becker, vroeër verbonde aan die ACC, ook glo vir Metcalfe gebel en hom ingelig die teenkorrupsieliggaam se adjunk-direkteur, adv. Erna van der Merwe, is op die spogmotor se sleutel se spoor. Voor en sedert Becker se oproep het hy egter geen woord van Van der Merwe gehoor nie, sê Metcalfe.Boonop, het die prokureur voorts uitgevaar, die ACC het nie onlangs eers die spogmotor "ontdek" het nie. Hatuikulipi het reeds tydens sy aansoek om borgtog in Julie vanjaar al sy bates in 'n beëdigde verklaring uiteengesit, sê Metcalfe.Becker het nie op navrae gereageer nie, terwyl Van der Merwe die koerant na mnr. Paulus Noa, direkteur-generaal van die ACC, verwys het.Noa het Vrydag by navraag gesê: "Wat saakmaak, is dat die voertuig ter sprake in die naam van Tamson Hatuikulipi geregistreer is, wat een van die verdagtes is in die korrupsieaangeleentheid wat tans ondersoek word."Metcalfe kan nie vir die ACC voorskryf hoe om sy ondersoek te behartig nie en buitendien het die prokureurs nog sedert 2014 geen bewyse aan die teenkorrupsieliggaam verskaf nie, sê die ACC-baas.Dít kom ná Metcalfe ook kla oor twee ongeïdentifiseerde prokureurs op wie die ACC behoort te fokus omdat Fishrot-geld glo deur hul trustrekenings gewas is.Enigiemand wat gegrief voel deur die beslaglegging kan hulle tot 'n hof wend, het Noa gesê.Komm. Andreas Nelumbu, die polisiebevelvoerder van die Erongostreek, het gesê hy was nie op kantoor tydens die beslaglegging nie. Derhalwe, sê hy, moet hy aanvullende inligting bekom voor hy kommentaar kan lewer. - denver@republikein.com.na

Fitty se prokureurs braak gal

Kommentaar

Republikein 2025-05-01

Meld asseblief aan om kommentaar te lewer

Fitty se prokureurs braak gal

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie