Fishrot-ses vier Oujaar agter tralies

Denver Kisting – Iemand wat oor die inperking van sy vryheid kla, behoort met dringendheid op te tree.Só het waarnemende hoërhofregter Kobus Miller Vrydag gesê toe hy ’n dringende aansoek om vrylating deur die sogenaamde Fishrot-ses van die rol geskrap het. “Die verduideliking vir die vertraging en die gebrek aan spoedigheid aan die kant van die aansoekers om dié aansoek voor die hof te bring, is vaag en laat die deur vir twyfel oop,” lui die uitspraak wat Vrydag in die hoërhof in Windhoek gelewer is.Volgens Miller het mnre. Bernhard Esau, Sacky Shanghala, James Hatuikulipi, Ricardo Gustavo, Tamson “Fitty” Hatuikulipi en Pius Mwatelulo die hof op ’n “gemoedelike” (leisurely) manier genader.Dié benadering, het hy gesê, druis in teen dringendheid in ’n poging om uit polisieaanhouding vrygelaat te word.Die sestal word sedert 27 November by die Seeis-polisiekantoor aangehou weens hul beweerde aandeel in die plundering van viskwotas.Die uitspraak het presies een maand ná hul inhegtenisnemings en twee dae ná hul eerste Kersfees agter tralies gekom.Esau het ook onlangs sy 62ste verjaardag in polisieaanhouding deurgebring.Miller het Vrydagoggend gelas die mans moet die respondente se regskostes betaal.Hulle het die saak gebring teen ’n landdros wat die lasbriewe vir hul inhegtenisnemings uitgereik het, die direkteur-generaal van die Teenkorrupsiekommissie (ACC), ’n ACC-ondersoekbeampte, die aanklaer-generaal, die inspekteur-generaal van die Namibiese polisie en die stasiebevelvoerder van Seeis.Die mans het aangevoer die lasbriewe vir hul inhegtenisnemings was ongeldig en hul aanhouding gevolglik onregmatig.Agtergrond’n Storm het verlede maand om die mans se koppe losgebars toe dit onthul is hulle het na bewering etlike miljoene dollar se omkoopgeld ontvang by ’n Yslandse maatskappy in ruil vir Namibiese viskwotas.Tot in daardie stadium was Esau die minister van visserye en mariene hulpbronne, terwyl Shanghala die minister van justisie was.Hulle het sedertdien bedank – ’n dag nadat ’n Engelse dagblad die beweerde korrupsie aan die kaak gestel het.James en Tamson “Fitty”, Esau se skoonseun, is neefs.Hulle verskyn weer op 20 Februarie in die Windhoek-landdroshof op aanklagte van korrupsie, bedrog en geldwassery.Hulle het kort ná hul inhegtenisnemings ’n vorige formele aansoek om borgtog in dié hof laat vaar. – denver@republikein.com.na

Fishrot-ses vier Oujaar agter tralies

Kommentaar

Republikein 2025-07-16

Meld asseblief aan om kommentaar te lewer

Fishrot-ses vier Oujaar agter tralies

Kommentaar

Republikein 2025-07-16

Meld asseblief aan om kommentaar te lewer

MELD AAN

Advertensie