Filibus van Nigerië lei Lutherane

Estelle de Bruyn - Eerwaarde Musa Panti Filibus, aartsbiskop van die Lutherse kerk in Nigerië (LCCN), is tot president van die Lutherse Wêreldfederasie (LWF) verkies.Dit tydens die twaalfde algemene vergadering van die LWF, wat in Windhoek aangebied word.Filibus is die dertiende persoon en die tweede leier uit Afrika wat dié pos beklee sedert die LWF in 1947 tot stand gekom het.Filibus is reeds in die eerste stemronde verkies met 274 stemme uit 303. Tydens sy intreerede het hy gesê hy wil op gemeenskapsverhoudinge, sendingwerk, geslagsgeregtigheid, die diakonie, die kerk se jongmense en intergeloofbetrekkinge vir vrede en geregtigheid fokus.“Samehorigheid is ‘n geskenk,” het Filibus gesê en bygevoeg dat dit gekoester moet word. Dit moet ook met ‘n sin van universele aanspreeklikheid geskied, het hy gesê.Filibus, wat voorheen met die ontwikkeling van die LWF se geslagsgeregtigheidsbeleid gemoeid was, sê hy is toegewy aan die implementering daarvan. Hy het ook ’n groot rol gespeel in proses wat tot die inwyding van die eerste vroulike pastoor van die kerk in 1996 gelei het. Daar moet ook toewyding aan die jongmense van die kerk wees, het Filibus gesê. Hy het gevra dat die Globale Jeughervormingsnetwerk op plaaslike kerkvlak geïmplementeer moet word.“My droom is dat die LWF ‘n relevante en sleutel- internasionale diakoniese speler sal wees om menslike tragedie te oorkom,” het hy bygevoeg.Twee jaar gelede moes kerklike werk in baie gemeentes in die noordooste van Nigerië, waar Filibus vandaan kom, opgeskort word om aanvalle deur die Islamitiese militante Boko Haram tydens aanbiddingsdienste te voorkom. “Daar is ’n groot behoefte om aandag te skenk aan geweldpleging wat deur godsdiens gemotiveer word,” het hy gesê.Filibus het ook kerklike groei in die globale suide en ‘n afname in lidmaatskap in die globale noorde uitgewys as gebiede waar die LWF se bystand benodig word. “Ons het ‘n verpligting om na mekaar te luister en mekaar te ondersteun in hierdie moeilike tye. Geen kerk behoort alleen te voel nie,” het hy gesê.Die nuwe president is geen nuweling wat die werksaamhede van die LWF betref nie. Van 2002 tot 2010 was hy Afrika se sekretaris in die departement van sending- en ontwikkelingswerk (DMD). Hy is in 2010 as direkteur van die DMD aangestel.In 2013 het hy biskop van die Lutherse Kerk van Nigerië se Mayo Belwa-gemeente geword, en in 2016 is hy as aartsbiskop van die kerk verkies.Filibus (57) is in 1994 as leraar ingeseën. Hy het teologie in Nigerië en Amerika studeer, waar hy ook ‘n doktorsgraad in pastorale teologie verwerf het. Die LWF het ook ‘n nuwe raad, bestaande uit 48 lede, verkies.Die raadslede verteenwoordig die sewe LWF-streke. Tien kom uit Afrika en 10 uit Asië, Sentraal-Oos-Europa word deur vyf lede verteenwoordig, Sentraal-Wes-Europa het agt lede, die Nordiese lande het ses, Latyns-Amerika en die Karibiese eilande het vier en Noord-Amerika vyf.Die helfte van dié nuwe raadslede is vroue en 13 verteenwoordig die jeug.Dit strook met die LWF se beleid oor geslag- en jeugverteenwoordiging wat bepaal dat bestuursliggame uit 40% vroue, 40% mans en 20% jongmense moet bestaan.

Filibus van Nigerië lei Lutherane

Kommentaar

Republikein 2025-11-05

Meld asseblief aan om kommentaar te lewer

Filibus van Nigerië lei Lutherane

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.