FBI ondersoek bande tussen Trump, Russe
Die FBI het bevestig hulle ondersoek sedert Julie moontlike Russiese pogings om in te meng by die verkiesing, insluitend moontlike samewerking tussen die Trump-span en Rusland.
James Comey, FBI-direkteur, het Maandag bevestig dat dié speurdiens bande tussen pres. Donald Trump en Rusland ondersoek wat dalk 'n invloed op die uitkoms van die Amerikaanse presidensiële verkiesing kon gehad het.
Comey en Michael Rogers van die Amerikaanse veiligheidsagentskap (NSA) het voor die Amerikaanse huis van verteenwoordigers se intelligensiekomitee getuig dat dié ondersoek maande kan duur.
Comey het bygevoeg daar is geen bewyse dat oudpres. Barack Obama ten tyde van die Amerikaanse verkiesingsveldtog op Trump gespioeneer het nie.
“Ek het geen inligting wat die bewerings met betrekking tot die president se twiets kan staaf dat die vorige bedeling hom (Trump) ten tyde van die verkiesingsveldtog laat afluister het nie,” het Comey gesê.
Rogers het ook die bewerings deur Sean Spicer, Withuis-woordvoerder, verwerp dat die Britte namens Obama op Trump gespioeneer het, en gesê dit het die verhouding tussen die twee lande skade berokken.
“Dit (die bewerings) was duidelik baie frustrerend vir een van ons grootste bondgenote,” het Comey gesê.
Dit was egter oor Rusland se moontlike inmenging in Amerika se presidensiële verkiesing dat Comey en Rogers die meeste uitgevra is ten tyde van hul ses uur lange verskyning voor die komitee.
Comey het bevestig die FBI ondersoek sedert Julie moontlike Russiese pogings om in te meng in die verkiesing, insluitend moontlike samewerking tussen die Trump-span en Rusland.
Hy sê terwyl dit wil voorkom of die Russe Hillary Clinton se veldtog skade wou berokken en Trump s'n wou steun, het hulle nog nie beslis of die pogings die resultate van die verkiesing beïnvloed het nie.
Comey het geen besonderhede oor die konfidensiële ondersoek gegee nie en gesê die feit dat dit gedoen word, beteken nie noodwendig dat iemand aangekla sal word nie.
Die intelligensieagentskappe meen egter pres. Wladimir Poetin wou Trump steun deur die Demokrate te ondermyn.
“Ek dink dit is 'n maklike gevolgtrekking. Poetin haat Clinton soveel dat hy 'n duidelike voorkeur sou hê vir wie ook al teen haar sou staan.”
Hy het gewaarsku dat Rusland sal probeer om die volgende Amerikaanse presidensiële verkiesing in 2020 te beïnvloed en moontlik ook volgende jaar se verkiesing vir lede van die kongres.
“Hulle sal weer probeer, in 2020 en moontlik ook in 2018. Een van die lesse wat hulle geleer het, is dat hulle suksesvol kan wees omdat hulle verdeeldheid, onmin en twyfel kon saai oor Amerika, die aard van hierdie wonderlike land, wie ons is en ons demokratiese proses,” het Comey gesê.
– Netwerk24/Nampa/Reuters
Comey en Michael Rogers van die Amerikaanse veiligheidsagentskap (NSA) het voor die Amerikaanse huis van verteenwoordigers se intelligensiekomitee getuig dat dié ondersoek maande kan duur.
Comey het bygevoeg daar is geen bewyse dat oudpres. Barack Obama ten tyde van die Amerikaanse verkiesingsveldtog op Trump gespioeneer het nie.
“Ek het geen inligting wat die bewerings met betrekking tot die president se twiets kan staaf dat die vorige bedeling hom (Trump) ten tyde van die verkiesingsveldtog laat afluister het nie,” het Comey gesê.
Rogers het ook die bewerings deur Sean Spicer, Withuis-woordvoerder, verwerp dat die Britte namens Obama op Trump gespioeneer het, en gesê dit het die verhouding tussen die twee lande skade berokken.
“Dit (die bewerings) was duidelik baie frustrerend vir een van ons grootste bondgenote,” het Comey gesê.
Dit was egter oor Rusland se moontlike inmenging in Amerika se presidensiële verkiesing dat Comey en Rogers die meeste uitgevra is ten tyde van hul ses uur lange verskyning voor die komitee.
Comey het bevestig die FBI ondersoek sedert Julie moontlike Russiese pogings om in te meng in die verkiesing, insluitend moontlike samewerking tussen die Trump-span en Rusland.
Hy sê terwyl dit wil voorkom of die Russe Hillary Clinton se veldtog skade wou berokken en Trump s'n wou steun, het hulle nog nie beslis of die pogings die resultate van die verkiesing beïnvloed het nie.
Comey het geen besonderhede oor die konfidensiële ondersoek gegee nie en gesê die feit dat dit gedoen word, beteken nie noodwendig dat iemand aangekla sal word nie.
Die intelligensieagentskappe meen egter pres. Wladimir Poetin wou Trump steun deur die Demokrate te ondermyn.
“Ek dink dit is 'n maklike gevolgtrekking. Poetin haat Clinton soveel dat hy 'n duidelike voorkeur sou hê vir wie ook al teen haar sou staan.”
Hy het gewaarsku dat Rusland sal probeer om die volgende Amerikaanse presidensiële verkiesing in 2020 te beïnvloed en moontlik ook volgende jaar se verkiesing vir lede van die kongres.
“Hulle sal weer probeer, in 2020 en moontlik ook in 2018. Een van die lesse wat hulle geleer het, is dat hulle suksesvol kan wees omdat hulle verdeeldheid, onmin en twyfel kon saai oor Amerika, die aard van hierdie wonderlike land, wie ons is en ons demokratiese proses,” het Comey gesê.
– Netwerk24/Nampa/Reuters
Kommentaar
Republikein
Geen kommentaar is op hierdie artikel gelaat nie