Facebook stel blink nuwe funksies bekend

Mark Zuckerberg, Facebook se hoof, het Dinsdag op die maatskappy se jaarlikse konferensie, bekend as F8, ’n reeks nuwe funksies bekend gestel.

Dit sluit in ’n afspraakdiens, soortgelyk aan Tinder, ’n manier om jou doen en late op die platform vinnig van Facebook se bedieners uit te wis, sowel as video-oproepe in Instagram. Groot veranderinge kom ook vir WhatsApp en Facebook Messenger.

Van die hoogtepunte wat volgens Zuckerberg in die volgende jare kom, is:

Wis jou Facebook-bedrywighede dadelik uit.

Dit is deel van Facebook se poging om sy reputasie in ere te herstel ná die Cambridge Analytica-skandaal vroeër vanjaar. Facebook het reeds ’n string nuwe funksies beskikbaar gestel waardeur gebruikers hul privaatheid kan nagaan. Eersdaags sal hulle hul doen en late dadelik kan uitwis sodra hulle die platform verlaat.

Die nuwe funksie staan as Clear History bekend en werk soortgelyk aan die bestaande funksie in gewone webblaaiers.

“Daar is ’n eenvoudige manier om jou cookies en geskiedenis in jou webblaaier te skrap,” sê Zuckerberg.

“Die idee is dat baie webwerwe cookies benodig om te werk, maar jy moet dit steeds kan uitwis as jy wil.”

Cookies verwys na klein stukkies data wat vanaf ’n webwerf gestuur word en op die gebruiker se rekenaar geberg word. Dit sluit onder meer in op watter skakels die persoon gekliek het en op watter webwerwe daar aangemeld is. Dit speel ook ’n rol in die soort advertensies wat gebruikers aanlyn sien.

Clear History gaan aan Facebook-gebruikers die opsie bied om inligting oor hul aktiwiteite op die platform maklik uit te wis. Gebruikers sal ook kan kies watter soort inligting die platform oor jou berg.

Zuckerberg waarsku egter dat die uitwis van dié inligting jou ervaring kan belemmer aangesien die data help bepaal hoe jou nuusstroom gesorteer word, sowel as die soort advertensies wat jy sien.

“Die platform sal jou voorkeure van voor af moet aanleer.”

Jy kan die liefde van jou lewe ontmoet.

Staan opsy, Tinder. Facebook betree binnekort die wêreld van aanlyn afsprake.

Só gaan dit werk: Jy skep ’n nuwe profiel, totaal apart van jou bestaande een, maar steeds gekoppel daaraan. Dit beteken geen van jou vriende sal kan sien wat jy in die “afspraakwêreld” aanvang nie. Moontlike pasmaats sal geïdentifiseer word danksy algoritmes gegrond op gemeenskaplike belangstelling en vriende.

Belangstellendes kan dan in Facebook ’n geselsie aanknoop, maar sal net teksboodskappe kan stuur. Met ander woorde, geen smerige foto’s nie.

“Daar is 200 miljoen mense wat op Facebook aandui hulle is enkellopend,” sê Zuckerberg.

“So daar is duidelik iets wat ons hier kan doen.”

Facebook se afspraakdiens is volgens hom gemik op betekenisvolle, langtermynverhoudings en nie op ’n vinnige vryery nie.

Maak video-oproepe in Instagram.

Facebook besit reeds ’n geruime tyd die fotoplatform Instagram. Zuckerberg het ook aangekondig dat gebruikers binnekort met tot drie vriende oor video sal kan klets.

Dié funksie is reeds beskikbaar op sy mededingers Skype en FaceTime, asook op Facebook se eie Messenger. Maar iets wat Instagram s’n dalk onderskei, is die feit dat jy die gesprek eenkant toe kan skuif en steeds saamgesels, maar terselfdertyd kan aanhou om na die foto’s in jou nuusstroom te kyk.

Groepoproepe in WhatsApp.

Soortgelyk aan sy planne met Instagram, wil Facebook ook binnekort video-oproepe vir groepe in WhatsApp moontlik maak. Jy kan reeds geruime tyd ’n oproep na een persoon maak, maar met die nuwe funksie sal jy verskeie gebruikers by dieselfde oproep kan betrek.

“Pas klere aan” in Messenger.

Al ooit gewens jy kan sien hoe jy in daai nuwe somerrokkie lyk wat jy aanlyn sien? Moenie vrees nie, want Messenger sal jou binnekort toelaat om items in die app “aan te pas”.

Facebook het bekend gemaak dat handelsmerke gou danksy virtuele werklikheid met die klets-app sal kan integreer om gebruikers ’n virtuele koopervaring te bied. Die funksie sal ingebou word in Messenger se kamera. Só sal jy enigiets van skoene tot grimering kan “toets” voordat jy dit koop. – Netwerk24