Facebook kondig groot veranderinge aan

Nadat Mark Zuckerberg, die hoof van Facebook, in ’n emosiebelaaide Nuwejaarsboodskap belowe het om Facebook “reg te ruk”, is die eerste stappe gedoen om daardie veranderinge teweeg te bring.Die wêreld se grootste sosiale netwerk het Donderdag begin om inskrywings van ondernemings, handelsname en media-instansies op gebruikers se nuusstroom te beperk en die fokus te verskuif na nuus en inskrywings wat deur hul vriende en familie gedeel word.Dit beteken dat organisasies wat nie regstreeks op die platform adverteer nie, voortaan minder blootstelling gaan geniet. In ’n Facebook-inskrywing verduidelik Zuckerberg dat veral inhoud wat gesprekvoering tussen familielede en vriende bewerkstellig, nou voorkeur sal kry.Daar word verwag dat die nuwe filtrering gaandeweg oor die volgende paar weke toegepas sal word.“Ons het terugvoering van die gemeenskap ontvang dat openbare inhoud – inskrywings van ondernemings, handelsname en die media – persoonlike oomblikke tussen vriende totaal oorskadu,” sê Zuckerberg.Hy sê dit is sy en sy span se verantwoordelikheid om seker te maak Facebook bly ’n lekker plek om op te sosialiseer. “Ek verwag dat die tyd wat jy op Facebook deurbring, voortaan van meer waarde vir jou sal wees.”Gevorderde algoritmesFacebook, wat ook die fotoplatform Instagram besit, gebruik reeds jare lank ’n komplekse algoritme om inskrywings te prioritiseer wat ’n rekenaarprogram dink die meeste interaksie met gebruikers sal ontlok in die vorm van “likes” en kommentaar.Volgens Zuckerberg gaan dít nie meer Facebook se doelwit wees nie.“Ek wil eerder daarop fokus om jou te help om relevante inhoud te vind wat sal lei tot meer betekenisvolle sosiale interaksie,” verduidelik die 33-jarige uitvoerende hoof.Zuckerberg gee toe dat die veranderinge waarskynlik sal beteken dat mense vir eers minder tyd op Facebook gaan deurbring en dat ondernemings gaan sukkel om noemenswaardige reaksie op hul inskrywings te kry.Advertering gaan egter nie deur dié skuif geraak word nie, het John Hegeman, ’n afgevaardigde van Facebook, bevestig.“Dis beslis ’n noemenswaardige verandering,” sê Laura Hazard Owen van die Harvard-universiteit. “Dit gaan veral uitgewers raak omdat ons al hoe minder nuus organies in ons nuusstroom gaan sien.”Fel kritiekFacebook en sy mededingers in die sosiale media het die afgelope paar jaar onder fel kritiek deurgeloop omdat hul produkte gebruikers se sienings oor sosiale en politieke kwessies versterk en lei tot “verslawende gewoontes”. Die owerhede het ook begin wonder of sosiale netwerke gereguleer moet word om die lewensvatbaarheid in die langtermyn te verseker.Facebook is byvoorbeeld in 2016 daarvan beskuldig dat sy “gevorderde algoritmes” waarskynlik vals nuus en leuens in gebruikers se nuusstroom laat beland het. Talle meen hierdie inligting het die uitkoms van die Amerikaanse presidentsverkiesing beïnvloed.Die maatskappy het verlede jaar erken dat Russiese agente die platform gebruik het om opruiende inskrywings te plaas om Amerikaanse kiesers te verdeel.Die Amerikaanse kongres gaan na verwagting vandeesmaand die rol wat sosialemediaplatforms soos Facebook, Twitter en YouTube in die verspreiding van propaganda speel, bespreek.Die jongste veranderinge by Facebook kan dalk ’n doodskoot wees vir nuusorganisasies wat baie afhanklik is van verkeer wat gegenereer word deur skakels wat hulle op die platform deel.Zuckerberg meen baie van dié inskrywings was “ongesond”.“Ons voel verantwoordelik om nie net die platform lekker te maak om te gebruik nie, maar ook goed vir mense se welstand,” skryf hy.Met sy meer as 2 miljard maandelikse gebruikers is Facebook verreweg die wêreld se gewildste aanlyn sosiale netwerk. Die maatskappy het ook die afgelope boekjaar tot einde September ’n inkomste van US$36 miljard gegenereer, hoofsaaklik uit advertensies. - Netwerk24/Bronne: BBC, Reuters, Bloomberg

Facebook kondig groot veranderinge aan

Kommentaar

Republikein 2025-06-19

Meld asseblief aan om kommentaar te lewer

Facebook kondig groot veranderinge aan

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie