Europa slyp Namibiese diamante vir Spele

Tielman van Lill – Beatrice Masilingi en Christine Mboma sal vroeg vandeesweek op uitnodiging onderskeidelik in Switserland en Pole vir die 200- en 400 meter-naellope aantree.Masilingi het twee Sondae gelede in Chorzów, Pole, by die 67ste Orlen Janusz Kusocinski-gedenkbyeenkoms die 400 gemaklik onder 50 sekondes gewen sonder dat 'n opponent haar hard gedruk het.Mboma het die Saterdagaand in Spanje by die Madrid-byeenkoms in haar 200 met 21.82 sekondes in die eerste plek uitgeblink.Die twee 18-jarige tienersensasies se rolle word vandeesweek in Luzern en Bydgoszc omgeruil. Masilingi sal by die Luzern-byeenkoms in die Allmend-stadion vir die 200 onder andere teen Mujinga Kambundji van Switserland in die wegspringblokke sak.Kambundji (29) is dalk net die regte geelwortel vir om die beste uit Masilingi te haal.Kambundji het in 2019 by die wêreldkampioenskap in Doha, Katar, 'n bronsmedalje in die 200 met 22.51 sekondes verwerf. Haar persoonlike beste tyd is 'n blitsige 22.26. Haar huidige seisoenbeste is 'n haastige 22.61 in Firenze, Italië, waarmee sy sedert 10 Junie spog.Masilingi, wat deesdae trots met Adidas as haar hoofborg pronk, sal beslis môreaand opnuut die internasionale atletiekwêreld se verbeelding aangryp indien sy die 200 in die Allmend-stadion kan wen. Sy word nie verniet deur Wêreldatletiek as die 33ste vinnigste senior vrou vanjaar met 22.72 gereken nie, terwyl Kambundji (22.61) die 22ste vinnigste vrou sover vanjaar is.Dié Namibiër het vanjaar al vinniger tye in die 200 behaal wat egter vanweë 'n ontoelaatbare wind van meer as twee meter per sekonde van agter in die pylvak nie vir rekorddoeleindes tel nie.Dalk breek die tyd môre vir Masilingi aan om haar werklik sonder teenspraak as een van die wêreld se vinnigste vroue in die halwe baanrondte aan te kondig.MBOMA IN A-BYEENKOMSMboma, wat die junior wêreldrekordhouer in die 400 met 49.22 sekondes is, sal Woensdag by die 3de Irena Szewinska-gedenkbyeenkoms in die Zdzislaw Krzyszkowiak-stadion vir die 400 aantree.Dié byeenkoms is die eerste met goue status van Wêreldatletiek se kontinentale toer waaraan Mboma sal deelneem, ná die Namibiërs se verskynings die afgelope weke in silwer-byeenkomste. Die Diamantliga is die beheerliggaam se enigste hoër vlak van kompetisie.Afgesien van die Olimpiese en wêreldkampioen Shaunae Miller-Uibo (49.08) van die Bahamas het geen senior vrou al vanjaar vinniger in die 400 as Mboma gehardloop nie – met Masilingi (49.53) derde op dié lys. Mboma het twee naweke gelede vir die eerste keer in die kleure van haar nuwe hoofborg Nike deelgeneem.Mnr. Henk Botha, afrigter van beide Masilingi en Mboma, sê uit Rome daar is 'n horde byeenkomste waaraan sy atlete kan deelneem.“Die atletiekseisoen in Europa is in volle swang en daar is hope byeenkomste waaraan hulle op uitnodiging kan hardloop. “Ons moet egter daarteen waak om Beatrice en Christine te veel bloot te stel. Dis elke keer 'n berekende risiko-oorweging. “Ons is geweldig ingenome met die uitslae en hoe sake tans vir hulle verloop. Die wêreld weet nou beslis Namibië is terug as 'n faktor in die naellope. “Ons het dit te danke aan Beatrice en Christine wat tans werklik uitstekend op peil is.“Beatrice hardloop Dinsdag teen die bronsmedaljewenner van die 2019 wêreldkampioenskap. Sy is sielkundig reg vir dié uitdaging en gereed om haar beste tyd vir 2021 aan te teken.”Gemeet aan hul persoonlike en seisoenbeste tye, lyk Mboma (49.22) inderdaad vinniger as enige van haar uitdagers in die 400, wat die 23-jarige Amerikaner Kaylin Whitney (50.29) insluit.“Maar dit maak nie saak nie. Elke byeenkoms is 'n leerskool vir haar. “Baie dankie aan almal vir die ondersteuning en aanmoediging. Dit beteken die wêreld vir Beatrice en Christine,” het Botha gesê.Bykans al Switserland se topsterre en opkomende juniors sal op Luzern toesak. Vir talle atlete is dit die laaste geleentheid om vir die 2021 Olimpiese Spele in Tokio te kwalifiseer. Heelwat internasionale atlete van die Switsers se buurlande word ook by dié kompetisie verwag.Die byeenkomsrekords in die Namibiërs se visier:Luzern 200 m-rekord: Charonda Williams (VSA, 22.32) met wind van 0.8 m/s van agter, op 14 Julie 2015.Pole-byeenkoms 400 m rekord: Amina Seyni (Niger, 49.19) in 2019.– tielman@republikein.com.na

Europa slyp Namibiese diamante vir Spele

Kommentaar

Republikein 2026-05-05

Meld asseblief aan om kommentaar te lewer

Europa slyp Namibiese diamante vir Spele

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.