Esau, skoonseun appelleer teen borguitspraak

Denver Kisting – Die oudminister van visserye en mariene hulpbronne, mnr. Bernhard Esau, en sy skoonseun, mnr. Tamson Hatuikulipi, gaan nie die stryd gewonne gee teen hul onlangse onsuksesvolle aansoek om borgtog nie.Dié mans, lede van die sogenaamde Fishrot-beskuldigdes, gaan hulle met behulp van hul regsverteenwoordigers, mnre. Richard Metcalfe en Florian Beukes, tot die hoërhof wend om teen die bevinding van landdros Duard Kesslau te appelleer.Kesslau het verlede maand in die Windhoek-landdroshof gesê Esau en Tamson Hatuikulipi het die hof met meer vrae as antwoorde gelaat.Dít kom nadat hulle hul nie tydens hul formele aansoek om borgtog aan kruisondervraging laat onderwerp het nie.In hofstukke meen die mans Kesslau het ’n fout begaan om hul aansoek om borgtog van die hand te wys.Volgens hulle was Kesslau verkeerd om af te lei hulle het van beëdigde verklarings gebruik gemaak om die aansoek te bring in ’n poging om nie aan kruisondervraging onderwerp te word nie.Dit was ook ’n fout om af te lei sulke verklarings het ten doel om die proses te bespoedig of vanweë die dringendheid van die aangeleentheid, lui die stukke.Die regsverteenwoordigers is voorts van mening die hof het wel by hulle klarigheid bekom wat die skynbaar onbeantwoorde vrae betref.Volgens die regspan het Kesslau ook die rol van die vervolging oorgeneem en was dus bevooroordeeld jeens die twee beskuldigdes.Die hofstukke lui verder die landdros het bespiegel wat verskeie kwessies in die saak betref en “wat hy verkeerdelik as feite aanvaar het”.Volgens die regsverteenwoordigers het Kesslau glo ook nie deeglik aandag geskenk aan die hofverrigtinge nie en antwoorde wat staatsgetuies onder kruisondervraging verskaf het, geïgnoreer.Geen bewyse is voorgelê oor betogings wat glo by die hof sou plaasgevind het, lui die stukke.Die regsverteenwoordigers meen ook Esau en Tamson Hatuikulipi het wel die hof in hul vertroue geneem met hul uitgebreide beëdigde verklarings – in teenstelling met die landdros se bevinding.Kesslau het tot ’n verkeerde gevolgtrekking gehaas sonder om in ag te neem die ondersoek het reeds in 2014 begin en die staat het geen aanduiding wanneer die saak afgehandel sal word nie.Die landdros het in sy bevinding op 22 Julie Metcalfe se betoog verwerp dat beweerde oortreders van witboordjiemisdaad altyd op borgtog vrygelaat moet word. Volgens hom is dit juis hoekom die publiek vertroue in die regstelsel verloor het.“Dit is absoluut nie ’n boodskap wat dié hof wil uitdra nie. Derhalwe bevind ek daar is geldige gronde om borgtog te weier.”Maar, het Kesslau gesê, die hof sal nie ’n onskuldige mens in aanhouding hou sonder dat die staat ’n sterk saak het nie.Ernstige klagteVolgens die landdros staar ’n reeks ernstige klagte, waarby openbare fondse soos nog nooit vantevore in ’n strafsaak in Namibië betrokke was nie, die mans in die gesig.Kesslau het bygevoeg die beskuldigdes het na bewering almal ’n rol vertolk in die omkoopskema – wat na bewering met Esau begin het sonder wie dit nie moontlik sou wees nie.Die landdros het gesê Esau het na bewering sy rol as oudminister vir dié doel ingespan.Onbeantwoorde vraeVolgens Kesslau het Esau en sy skoonseun se weiering om aan kruisondervraging onderwerp te word, talle vrae onbeantwoord gelaat.Die landdros het gesê ofskoon beëdigde verklarings tydens dringende aansoeke gebruik word om tyd te bespaar, het die tweetal genoeg tyd gehad om vrae tydens kruisondervraging te beantwoord sodat die hof meer insae kon kry.Hy meen die mans het vrae om te beantwoord veral rondom onduidelike oordragte van geld.Die hof is nie oortuig hulle sal nie óf op die vlug slaan óf met die ondersoek inmeng nie.Die mans word saam met mnre. Sacky Shanghala, die oudjustisieminister, James Hatuikulipi, Ricardo Gustavo en Pius Mwatelulo, van die grootskaalse plundering van Namibiese viskwotas ten bedrae van etlike miljoene Namibiese dollar beskuldig.- denver@republikein.com.na

Esau, skoonseun appelleer teen borguitspraak

Kommentaar

Republikein 2026-07-17

Meld asseblief aan om kommentaar te lewer

Esau, skoonseun appelleer teen borguitspraak

Kommentaar

Republikein 2026-07-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.