Erg verouderde wet op dierebeskerming getakel

Claudia Reiter – Namibiërs maak daarop aanspraak dat die land 'n leier in natuurbewaring is, maar die wet op dierebeskerming is verouderd en nie meer van toepassing nie.“Die wet op dierebeskerming van Namibië is sedert 1962 van krag en is nou al amper 60 jaar oud. Wanneer jy die wet oortree, kan jy 'n boete van hoogstens N$200 kry, ongeag van die erns van die oortreding,” het die aktivis me. Ronél Lewies gesê.Dié kundige in dierewelsyn, wat vertroud is met die wetlike aspekte van die huidige en beplande nuwe wetgewing, het dit tydens 'n werkwinkel in Windhoek gesê. Die #JusticeForAnimals-veldtog het met 'n werkwinkel afgeskop wat na die huidige wetgewing, studies en voorgestelde nuwe wetgewing sal kyk. Die veldtog wat ten minste 'n jaar sal duur, sal mediabydraes, promosievideo's en sosialemediaveldtogte insluit op platforms wat aan die kwessie gewy is. Die doel van die werkwinkel is om belanghebbendes 'n platform te bied om idees uit te ruil en om die wil te gee vir die herlewing van die veldtog, wat bestem is om openbare bewustheid te verhoog en te bevorder.“Ek het die #JusticeForAnimals-veldtog saam met die ministerie van justisie en DBV Namibië as strategiese vennote in 2019 begin. “Die doel was om die wetgewing op dierebeskerming in Namibië te bevorder en veral om 'n hervorming van die wet in Namibië te bepleit,” het Lewis gesê.In daardie stadium het die wet onder die ministerie van justisie geresorteer. Onder leiding van die destydse minister van justisie, mnr. Sacky Shanghala, is die konsepwet op dierebeskerming in 2019 opgestel, maar is dit nooit in die parlement voorgelê nie.Die verouderde wette is vaag, inkonsekwent en onvoldoende om die welsyn van huis-, plaas- en wilde diere te verseker. Gevolglik vrek baie diere volgens die N/a'an ku sê-wildreservaat weens onsekerhede oor die welsyn van diere en hoe om hulle te behandel – veral in konflikte tussen mense en wilde diere.“Hierdie situasie lei tot die voortgesette mishandeling van diere. Dit dra selfs by en skaad Namibië se reputasie as 'n land wat verbind is tot dierebeskerming.“As burgers van Namibië het ons die grondwetlike reg om diere te besit. Hierdie regte is verskans in verskeie artikels van die Namibiese Grondwet, die wet op dierebeskerming en die verdrag van die Wêreldorganisasie vir Dieregesondheid, waarvan Namibië 'n lid is.”Die beginsels onderliggend aan die verdrag sluit egter die “vyf vryhede” in. Dit beskryf die samelewing se verwagtinge van die omstandighede wat diere in menslike sorg moet ervaar: Vryheid van honger, wanvoeding en dors; vryheid van vrees en nood; Vryheid van hittestres of fisieke ongemak; Vryheid van pyn, beserings en siekte; en vryheid om normale gedragspatrone te vertoon, het Lewies gesê.“Ons wil dit duidelik maak dat dit nie 'n diereregte-veldtog is nie. Dit gaan oor dierewelsyn.”Dierewelsyn en diereregte verskil op een betekenisvolle wyse: dierewelsyn is 'n feitelike benadering tot ons verhouding met diere, terwyl diereregte filosofies is. Diereregte beteken dat ons nie diere vir kos, klere, vermaak of eksperimente kan gebruik nie. Dierewelsyn laat hierdie gebruike toe indien “menslike” riglyne gevolg word.– republikein@republikein.com.na

Erg verouderde wet op dierebeskerming getakel

Kommentaar

Republikein 2025-07-08

Meld asseblief aan om kommentaar te lewer

Erg verouderde wet op dierebeskerming getakel

Kommentaar

Republikein 2025-07-08

Meld asseblief aan om kommentaar te lewer

MELD AAN

Advertensie