Erfenisbegraafplaas vol

Augetto Graig – Die hoofstad se historiese Ou Lokasie-begraafplaas is vol. Windhoek se munisipaliteit (CoW) het Donderdag toestemming gekry om die verkoop en toekenning van nuwe grafte te staak. Dié besluit is tydens 27 Februarie se stadsraadsvergadering geneem. Afgestorwenes kan steeds in voorafbespreekte grafte begrawe word, en die begrawe van ’n tweede liggaam in ouer, groter grafte word steeds toegelaat. Tans is 40 voorafbespreekte grafte nog leeg en 500 grafte kan weer gebruik word indien die oorledenes se familielede hul goedkeuring daarvoor gee. Me. Lydia Amutenya, munisipale woordvoerder, sê die Ou Lokasie-begraafplaas bestaan sedert 1928, maar is in 1968 met die verskuiwing van Ou Lokasie-inwoners na Katutura gesluit. Ná onafhanklikwording is dit in 1995 heropen toe sy grense uitgebrei is. Sedertdien het 725 begrafnisse daar plaasgevind ondanks die reël dat niemand wat ná 1959 gebore is daar te ruste gelê mag word nie.Mnr. Uakazuvaka “Wacca” Kazombiaze, CoW se hoof van parke, begraafplase en sportgronde, sê begrafnisse by dié nasionale erfenisterrein sal voortgaan. Die gebruik van die grond in die begraafplaas word beperk deur ondergrondse water en buitengewoon harde rotsformasies, sê hy. Die gedeelte met ondergrondse water kan nie gebruik word nie omdat die risiko van besmetting van die nabygeleë Arebbuschrivier bestaan. Altesaam 10 grafte kon op sekere plekke nie gegrawe word, waar kontrakteurs ondergrondse rots nie met swaar toerusting kon deurdring nie. Die gebruik van dinamiet word nie toegelaat nie sodat grafstene nie beskadig word nie, sê Kazombiaze. Volgens hom sal die Pionierspark-begraafplaas, ook bekend as die Gammams-begraafplaas, na verwagting teen die middel van volgende jaar ook vol wees. “Mense kan nog by die Oponganda-begraafplaas begrawe word,” sê hy. Die Oponganda-begraafplaas was teen 2017 dubbel sy grootte ná Uitbreiding B oorkant Burgstraat in gebruik geneem is. ’n Nuwe begraafplaas in Rocky Crest, wat pas goedgekeur is, sal die probleem van beskikbare plek help oplos, sê hy.Volgens Kazombiaze is die eerste fase van dié projek tussen een en twee hektaar groot, en word tussen vyf en sewe fases van uitbreiding beoog, afhangende van die beskikbaarheid van befondsing. Hy sê omgewingsevaluering word tans gedoen en die verkrygingsbestuurprosedure word gevolg. – augetto@republikein.com.na

Erfenisbegraafplaas vol

Kommentaar

Republikein 2025-11-05

Meld asseblief aan om kommentaar te lewer

Erfenisbegraafplaas vol

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.