Epidemie rol voort

Jana-Mari Smith - Geen aanduiding bestaan dat die verspreiding van hepatitis E in Namibië, waarvan die eerste uitbreking twee jaar gelede voorgekom het, in die nabye toekoms gaan afneem nie. In 2019 is 19 mense dood aan die siekte en ’n styging van 65% in nuwe gevalle is aangeteken, waarvan ongeveer 7 000 gevalle teen die einde van verlede jaar aangemeld is. Aan die begin van Januarie 2019 is ’n totaal van 40 sterftes aangeteken, wat teen 15 Desember tot 59 sterftes gestyg het. Tussen Januarie en Desember verlede jaar het die aantal vermoedelike gevalle van die siekte, asook dié wat deur ’n laboratorium bevestig is, met 2 747 gestyg. Die 4 227 gevalle wat tot 6 Januarie aangemeld is, het tot 6 947 gevalle teen middel-Desember gestyg.Die jongste verslag oor die hepatitis E-situasie in Namibië tot 15 Desember 2019 waarsku beperkte sanitêre geriewe en swak toegang tot skoon water bemoeilik pogings om die siekte te bekamp.Volgens dié verslag is te min toilette tot die gemeenskap se beskikking en ontlas baie mense steeds in die oopte. ’n Verdere rede tot kommer is die gebrek aan geld om toegang tot skoon water te vergemaklik.“Nie almal het toegang tot die beskikbare water by openbare krane nie, aangesien iemand die water moet koop en die meeste gemeenskapslede dit nie kan bekostig nie. Dus word rivierwater dikwels gebruik,” lui die verslag.Verlede jaar het dr. Bernard Haufiku, leier van die span wat die uitbreking probeer bekamp, gefokus op die feit dat die hepatitis E-kwessie wyer as die gesondheidsektor strek.“Ek het dit al baie gesê. Hepatitis E is ’n siekte van armoede en lae sosioëkonomiese status waar ’n gebrek aan skoon water en persoonlike higiëne bestaan.” Volgens hom moet sanitasie, watervoorsiening en persoonlike higiëne gepak word om uitbrekings te beëindig.ImpakDie verslag bevestig die meerderheid van die 6 974 geïnfekteerdes is mans (59%), terwyl 72% van alle aangemelde gevalle onder mense tussen 20 en 29 jaar voorgekom het.Uit die 59 sterftes wat sedert die eerste uitbreking in September 2017 aangemeld is, was 24 swanger vroue of vroue wat onlangs geboorte geskenk het.Dr. Lilliane Kahuika-Crentsil, ’n voormalige lid van die nasionale noodspan, het verlede jaar gesê: “Sedert die aanvang van die uitbreking is virale hepatitis E as die hoofoorsaak van sterftes bevestig onder swanger vroue of vroue wat pas geboorte geskenk het.”Die Desember-verslag sê ook die meerderheid van hepatitis E-gevalle het onder werkloses voorgekom, terwyl 74% van die geïnfekteerdes op openbare krane moes staatmaak. Volgens dié verslag was daar ’n dramatiese afname in nuwe gevalle tussen 2 en 15 Desember, in vergelyking met die vorige twee weke.’n Totaal van 51 hepatitis E-gevalle is in dié tydperk aangemeld, teenoor die 92 gevalle tussen 18 November en 1 Desember.Die Khomasstreek se armste informele nedersettings word die hardste getref. Van al die aangemelde gevalle het 4 311 (62%) in die Khomasstreek voorgekom en 1 511 in die Erongostreek. Die res van die gevalle is in ander streke oraloor die land aangemeld.Ver en wydDie feit dat die siekte wydverspreid in Namibië voorkom, is betekenisvol.Dr. Eric Dzuiban, Namibië se provinsiale direkteur van die sentrum vir siektebeheer en -voorkoming (CDC), het gesê Namibië se uitbreking is die enigste geval van ’n landswye uitbreking van die siekte. Gewoonlik is uitbrekings beperk tot die geografiese gebiede waar dit ontstaan, het hy gesê.Hoewel die siekte nog nie as endemies geklassifiseer kan word nie waarsku kenners die uitbreking sal verder versprei indien die infeksiesiklus nie verbreek word nie.’n Plan vir inentings teen die siekte is in Desember aan die ministerie van gesondheid en maatskaplike dienste voorgelê. – jana@namibiansun.com

Epidemie rol voort

Kommentaar

Republikein 2025-12-17

Meld asseblief aan om kommentaar te lewer

Epidemie rol voort

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.