Entstofpaspoort nog nie gegewe

Henriette Lamprecht – As 'n regering is Namibië nie in die posisie om 'n entstofpaspoort as 'n voorvereiste vir internasionale reisigers in te stel en die verpligte vereistes van 'n PCR- of blitstoets vir toegang tot die land te wysig nie. Die uitvoerende hoof van die Gasvryheidsvereniging van Namibië (HAN), me. Gitta Paetzold, het verwys na 'n antwoord van die Namibiese Toerisme-herlewingsinisiatief oor die kwessie ná navraag hieroor aan die regering.Die motivering was dat Namibië 'n stelsel in plek moet hê om die egtheid van die entstof-sertifisering te verifieer.Volgens Paetzold is die Afrika-unie waarvan Namibië 'n lid is, se standpunt dit kan nie tans as 'n reisvereiste afgedwing word wanneer daar ongelyke verspreiding van entstowwe en minder immuniseringsdekking in Afrika is nie. Die Namibiese regering voel ook dat so 'n besluit gegewe die veranderende omstandighede en verskeie muterings van Covid-variante wêreldwyd voortydig is. “Aangesien entstowwe steeds nie gelyk aan die wêreld en veral in Afrika beskikbaar gestel is nie, kan ons dit nie as 'n vereiste stel nie,” het sy gesê.Volgens Paetzold het 'n groep mense wat in die toerismebedryf reeds voordat Namibië met sy amptelike inentingsveldtog begin het, by Vaccines for Hope aangesluit, omdat hulle besef het om kudde-immuniteit in die land te bereik, sal dit die nodige boodskap die wêreld instuur “dat ons as land en reisbestemming alle maatreëls volg om 'n veilige omgewing vir gaste én ons mense te bied”.Met verwysing na 'n entstofpaspoort of vrypas vir internasionale reise vir mense wat ingeënt is, sê sy van die internasionale toeroperateurs en agente het dit reeds maande gelede met plaaslike vennote in Namibië opgeneem. “Een vereiste wat al hoe meer gestel word, is dat dié wat in direkte kontak met gaste is, ingeënt moet wees om 'n sekere vlak van veiligheid te waarborg. Sedert die begin van April het vele plaaslike toeroperateurs hulself laat inent en foto's van hul entstofsertifikate op sosialemediaplatforms geplaas om te wys die toerismebedryf is bereid om die regte ding te doen,” het sy gesê.Sy erken groot kommer heers oor Namibiërs se huiwering om ingeënt te word.“Ons doen baie moeite om die regte feite en inligting aan personeel deur te gee om fopnuus en wanindrukke uit die weg te ruim.”Paetzold verwys in dié verband na besighede soos Ultimate Safaris wat strooibiljette saamgestel het, Ongava Lodges wat gereeld inligting op Vaccines for Hope deel, terwyl Natural Selection 'n inentingsveldtog in die Sesfontein-gebied georganiseer het waaraan talle lodges, bewaringsgebiede en gemeenskappe sal deelneem. In HAN se uitvoerende bestuur is agt uit die tien ingeënt, met net twee wat weens mediese redes nog moet wag.Paetzold reken tot 33% van mense wat reeds teen Covid-19 ingeënt is, is uit die toerismebedryf. Met Covid-getalle wat aanhou styg, is die bedryf se groot vrees dat Namibië weer as 'n hoërisiko-bestemming gelys sal word.“Ons sien klaar van die besprekings vir Julie tot September word nou stuk-stuk gekanselleer. Ons móét positiewe boodskappe uitstuur dat ons land alles in sy vermoë doen om kudde-immuniteit te verseker en inentings is een van die maniere om dit te kry. Ons moet ook met feite en die regte inligting waninligting en dié teen immunisering teenwerk,” het sy beklemtoon. – henriette@republikein.com.na

Entstofpaspoort nog nie gegewe

Kommentaar

Republikein 2026-06-29

Meld asseblief aan om kommentaar te lewer

Entstofpaspoort nog nie gegewe

Kommentaar

Republikein 2026-06-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.