Entoesiastiese vegters blaas nuwe lewe in amateurboks

Tielman van LillDie 12 Round Boxing-akademie van Riaan Coetzee in Windhoek het Vrydagaand by Wanderers in samewerking met die Khomasboksvereniging (KBV) ‘n uiters suksesvolle en goed georganiseerde bokstoernooi aangebied.Nege gevegte is voor ‘n volgepakte saal waarderende toeskouers afgehandel waar vier van 12 Round se eie aspirantkampioene in aksie was. Al vier van Coetzee (12 Round) se boksers het hul gevegte gewen en ‘n tekort aan bloed en opwinding was daar geen sprake van nie.Die 15-jarige Patrick Karsten was eerste aan die beurt om die 20-jarige David David van Salute Boks-akademie oor drie rondes in die weltergewigafdeling te pak. Alhoewel Karsten in die eerste ronde die verpligte telling moes aanhoor, het hy met ‘n bloeiende mond en neus teruggeveg om David met twee rondes teen een te klop. Karsten is ná die toernooi deur die beamptes aangewys as die bokser wat die meeste durf en hart gewys het. Karsten spog na dese met ‘n rekord van twee gevegte en twee oorwinnings. Ben Horn, ook 15, was volgende teen Arno Jacobs (17) in die ligswaargewigafdeling in die kryt. Horn kon weens water op die knie nie behoorlike voetwerk uitstal nie, maar het sy teenstander met reguit houe op ‘n afstand gehou. Horn se tekort aan voetwerk het hy met goeie kopbeweging geabsorbeer en aanhou vorentoe beweeg om sy opponent onder druk te plaas. Die uitslag was dalk ietwat vreemd vir Jacobs wat duidelik nie tevrede met die uitslag van 2-1 in Horn se guns was nie. Maar Horn (2 gevegte, 2 oorwinnings) was beslis die beste vegter van die twee. SeniorsGerhard Liebenberg (26 jaar) is sekerlik die bokser wat vir die meeste opwinding van die aand in sy eerste geveg teen Johannes Ndengu (Salute) in die swaargewigafdeling gesorg het. Liebenberg, wat sy teenstander uitstekend opgesom het, het in die eerste ronde die hele kryt gebruik om Ndengu met lyfhoue sag te maak.In die tweede ronde het Ndengu nog goed in die kryt gevaar, maar ná 'n fop- lyfhou het Liebenberg hom onkant gevang en met ‘n brutale regterhou op die kennebak planke toe gestuur. Paramedisie wat aan diens by die kompetisie was, was blitsig by om na Ndengu se welstand om te sien. Alhoewel ietwat wankelrig, kon hy ‘n paar minute later self die die kryt verlaat.In ‘n regte woeste en wildeweste Meksikaanse vuisgeveg het die 23-jarige DG Wiese en Isack Majola die toeskouers in nog ‘n swaargewiggeveg vermaak. Die twee boksers het mekaar in ‘n wilde sessie gepak en bykans elke sekonde is houe verwissel wat die toeskouers luidkeels aangemoedig het.Wiese het Majola by twee geleenthede goed getref waar Majola die verpligte telling ontvang het, maar dit was in die derde ronde wat ‘n moeë Majola finaal deur ‘n ewe moeë Wiese uitgeslaan is. Beide boksers het houe gevat en met mening uitgedeel sonder om ‘n tree terug te staan. Wiese het na dese twee gevegte en twee oorwinnings behaal.“Ons het vier manne in die kryt gesit en al vier het gewen. Ek is geweldig trots en bly wat ons in ‘n baie kort tydperk kon bereik. Ons werk saam met Salute wat vanaand ook heelwat boksers in die kryt gestoot het, en ons wil so gou as moontlik nog toernooie aanbied om amateurboks weer ‘n lewendige sport te maak. Baie dankie aan elke persoon wat ons Vrydagaand kom ondersteun het. ‘n Goot dankie aan ons borge Mikel Jes vir die klank, Distell vir die wyn, Voltelect Namibia Electrical Contractors, Highway Importers, Etosha helicopter services cc, 7 Stars energiedrankies en Republikein wat die aand ‘n sukses help maak het,” het Coetzee trots gesê.Ander uitslae: Andreas Indongo wen met 3 rondes teen 0 vir Johannes Gideon. Immanuel Nghilongwa wen 3-0 teen Leon Kavanab. Fillipus Johannes wen 3-0 teen Arnold Jacobs. Marvin Nehemia klop Shonena Paulus 3-0 en Bernard Bernard wen 2-1 teen Josef Haimbodi.

Entoesiastiese vegters blaas nuwe lewe in amateurboks

Kommentaar

Republikein 2025-08-08

Meld asseblief aan om kommentaar te lewer

Entoesiastiese vegters blaas nuwe lewe in amateurboks

Kommentaar

Republikein 2025-08-08

Meld asseblief aan om kommentaar te lewer

MELD AAN

Advertensie