Elisenheim-inwoners in duister geul
Die munisipaliteit het gister bontgestaan met onder meer ‘n foutiewe kabel wat sekere dele van die stad letterlik in die donker gelaat het.
Elvira Hattingh - Teen saktyd gistermiddag het die Windhoekse munisipaliteit gesê dit hoop dat die Elisenheim-landgoed, asook besighede soos NaTIS in die noordelike nywerheidsgebied, se kragtoevoer voor die einde van die dag herstel sou wees.
Gister om 15:00 het Elisenheim-inwoners reeds vir 24 uur sonder elektrisiteit gesit, met talle wat geskarrel het om kragopwekkers te huur om onder meer die inhoud van hul ys- en vrieskaste te red.
‘n Inwoner het ‘n SMS aan Republikein gewys waarin ‘n sekuriteitsmaatskappy laat weet het kragtoevoer na hul huis in Elisenheim is reeds om 14:59 op Dinsdag 8 Januarie onderbreek.
Die Windhoek-munisipaliteit se bestuurder van korporatiewe kommunikasie, bemarking en openbare deelname, mnr. Harold Akwenye, het aan Republikein gesê Elisenheim ontvang krag van ‘n tydelike toevoerlyn, wat ook vir NaTIS in die noordelike nywerheidsgebied van elektrisiteit voorsien.
Volgens Akwenye is dit ‘n enkellyn, wat beteken daar is geen alternatief om die gebiede van krag te voorsien nie.
“Die kraglyn het verskeie foute en ons span is besig om dit te probeer herstel. Een fout is reggemaak, maar toe is verskeie ander probleme ontdek.”
Hy het gesê hulle hoop om kragtoevoer teen gisteraand te herstel het.
“Die onlangse swaar reën in die gebied het veroorsaak dat die kabel se isolering beskadig is, wat bygedra het tot die huidige probleme met die ondergrondse kabel,” het Akwenye verduidelik.
Hy sê die foutiewe kabel is van die ou Pax-tipe, wat probleme gee wanneer defekte opgespoor en reggemaak moet word. Akwenye sê die munisipaliteit is terselfdertyd besig om die ou kabels te vervang.
In ‘n brief wat gister deur die die landgoed se bestuurder, mnr. Schalk Kruger uitgestuur is, word inwoners ingelig dat die kabel wat Elisenheim van krag voorsien, aanvanklik tydens grondverskuiwingswerke by Natis se kantoor in die noordelike nywerheidsgebied beskadig is.
Volgens die brief het die munisipaliteit Dinsdag tot 22:00 gewerk om die kabel te herstel, toe hulle bykomende probleme teëgekom het. Kruger sê die kantoor wag nog op bevestiging dat die landgoed se watertoevoer nie ook geraak sal word nie.
Inwoners is ook aangeraai om kragopwekkers te gebruik of alternatiewe planne te maak om te keer dat die kos in hul ys- en vrieskaste bederf.
NamPower het intussen laat weet daar is geen foute aan sy kant wat tot die kragonderbreking bydra nie.
NamPower se woordvoerder, me. Rosa Nikanor, het aan Republikein gesê die beheersentrum het laat weet alles is in orde wat die verskaffer se stelsel betref.
WATER
Die Windhoekse munisipaliteit het gister ook op sy Facebookblad laat weet ‘n waterpyp het in Chasie-straat in Kleine Kuppe gebars, wat die woonbuurt in die omtrek van die Grove-inkoopsentrum sonder water gelaat het. Die watertoevoer sou teen die einde van gister herstel word.
Gister om 15:00 het Elisenheim-inwoners reeds vir 24 uur sonder elektrisiteit gesit, met talle wat geskarrel het om kragopwekkers te huur om onder meer die inhoud van hul ys- en vrieskaste te red.
‘n Inwoner het ‘n SMS aan Republikein gewys waarin ‘n sekuriteitsmaatskappy laat weet het kragtoevoer na hul huis in Elisenheim is reeds om 14:59 op Dinsdag 8 Januarie onderbreek.
Die Windhoek-munisipaliteit se bestuurder van korporatiewe kommunikasie, bemarking en openbare deelname, mnr. Harold Akwenye, het aan Republikein gesê Elisenheim ontvang krag van ‘n tydelike toevoerlyn, wat ook vir NaTIS in die noordelike nywerheidsgebied van elektrisiteit voorsien.
Volgens Akwenye is dit ‘n enkellyn, wat beteken daar is geen alternatief om die gebiede van krag te voorsien nie.
“Die kraglyn het verskeie foute en ons span is besig om dit te probeer herstel. Een fout is reggemaak, maar toe is verskeie ander probleme ontdek.”
Hy het gesê hulle hoop om kragtoevoer teen gisteraand te herstel het.
“Die onlangse swaar reën in die gebied het veroorsaak dat die kabel se isolering beskadig is, wat bygedra het tot die huidige probleme met die ondergrondse kabel,” het Akwenye verduidelik.
Hy sê die foutiewe kabel is van die ou Pax-tipe, wat probleme gee wanneer defekte opgespoor en reggemaak moet word. Akwenye sê die munisipaliteit is terselfdertyd besig om die ou kabels te vervang.
In ‘n brief wat gister deur die die landgoed se bestuurder, mnr. Schalk Kruger uitgestuur is, word inwoners ingelig dat die kabel wat Elisenheim van krag voorsien, aanvanklik tydens grondverskuiwingswerke by Natis se kantoor in die noordelike nywerheidsgebied beskadig is.
Volgens die brief het die munisipaliteit Dinsdag tot 22:00 gewerk om die kabel te herstel, toe hulle bykomende probleme teëgekom het. Kruger sê die kantoor wag nog op bevestiging dat die landgoed se watertoevoer nie ook geraak sal word nie.
Inwoners is ook aangeraai om kragopwekkers te gebruik of alternatiewe planne te maak om te keer dat die kos in hul ys- en vrieskaste bederf.
NamPower het intussen laat weet daar is geen foute aan sy kant wat tot die kragonderbreking bydra nie.
NamPower se woordvoerder, me. Rosa Nikanor, het aan Republikein gesê die beheersentrum het laat weet alles is in orde wat die verskaffer se stelsel betref.
WATER
Die Windhoekse munisipaliteit het gister ook op sy Facebookblad laat weet ‘n waterpyp het in Chasie-straat in Kleine Kuppe gebars, wat die woonbuurt in die omtrek van die Grove-inkoopsentrum sonder water gelaat het. Die watertoevoer sou teen die einde van gister herstel word.
Kommentaar
Republikein
Geen kommentaar is op hierdie artikel gelaat nie