El Niño ongewoon laat

Elvira Hattingh - Australiese weerkenners sê die kanse dat El Niño midsomer ontwikkel, is laer as vir ander tye van die jaar. Boonop het dit nog nooit, sedert rekordhouding begin het, gebeur dat ‘n El Niño in Januarie vorm nie.Terselfdertyd bly atmosferiese toestande steeks, wat verhoed dat volwaardige El Niño-toestande nou inskop.Volgens ‘n verklaring wat gister deur die Australiese Buro vir Meteorologie uitgereik is, het El Niño steeds nie gevorm nie. Hiervolgens is Enso-toestande steeds neutraal, ten spyte daarvan dat die see se oppervlaktemperature in die Stille Oseaan reeds El Niño-vlakke bereik het. “Dus hou ons ons uitkykstatus op ‘n El Niño-waarskuwing,” het die buro geskryf.Dié voorspelling verskil van die Amerikaanse Weervoorspellingsentrum en die internasionale Navorsingsinstituut vir Klimaat en Samelewing se ‘n uitkykstatus van verlede week. Volgens die Amerikaners is die kans dat ‘n swak El Niño vorm tans 90%. Hulle verwag dat dit hierdie somer nog sal vorm, met ‘n 60%-kans dat dit tot die komende herfs voortduur. Die Amerikaners sê ook neutrale Enso-toestande het tydens November voortgeduur, ten spyte van bonormale seeoppervlaktemperature oraloor die ekwatoriale Stille Oseaan. WERK NIE SAAMEnso staan vir die El Niño Suidelike ossilasie-klimaatspatroon en verwys na die interaksie tussen die tropiese Stille Oseaan en oorliggende atmosferiese toestande in die gebied, wat gesamentlik ‘n invloed op wêreldwye weer- en klimaatpatrone het, het die Australiese Buro vir Meteorologie verduidelik.“Terwyl die see se oppervlaktemperature warm genoeg is en reeds El Niño-vlakke bereik het, staan ander atmosferiese aanwysers soos wolkvorming, weerdrukstelsels, passaatwinde en die Suidelike ossilasie-indeks (SOI) steeds op neutraal.“Dit beteken die see en die atmosfeer versterk mekaar nog nie. Eers wanneer die twee sáám werk en lank genoeg daarmee volhou, het dit wydverspreide veranderinge in wêreldwye weer- en klimaatpatrone tot gevolg,” lui die verklaring. KANS OP EL NIÑO VERMINDERDie Australiërs meen vanweë die natuurlike seisoenale siklus van die tropiese Stille Oseaan se seeoppervlaktemperature en wolkvorming is die kanse minder dat El Niño midsomer sal ontwikkel as enige ander tyd van die jaar. “Dit is omdat die verskil in die seetemperature oraloor die Stille Oseaan tydens die laatsomer, en begin van die herfs verminder. “Dit gebeur soms dat El Niño-toestande láát ontwikkel, soos dit in die 2006-’07- en weer in die 2009-’10-seisoen gebeur het. Maar daar is geen rekord van ‘n El Niño wat eers in Januarie begin het nie,” skryf die Australiërs.“Die meeste weermodelle dui aan seeoppervlaktemperature in die tropiese Stille Oseaan sal waarskynlik tot die middel van 2019 naby of bo El Niño-vlakke bly. Tog is hierdie modelle geneig om minder akkurate voorspellings in die herfs te maak,” sê die buro.“As die seeoppervlaktemperature so warm tydens die somer bly, verbeter dit die kans dat El Niño-toestande in 2019 kan inskop.”

El Niño ongewoon laat

Kommentaar

Republikein 2025-08-05

Meld asseblief aan om kommentaar te lewer

El Niño ongewoon laat

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie