'Ek sal moordenaar vergewe'

Augetto Graig - Sy kleindogter sou nie saam met iemand in 'n motor geklim het wat sy nie ken nie. Sy was 'n baie slim kind, sê pastoor Seth Kaimu oor sy negejarige kleindogter, Avihe Cheryl Ujaha, wie se geskende liggaam Dinsdagoggend langs 'n gewilde bospaadjie langs die Saamstaan-buurt in Khomasdal en digby Shanghaistraat se sirkel gevind is. Avihe was “iemand met haar eie wil” en ernstig oor haar skoolwerk by die Laerskool Gammams.“Net Vrydag het sy my nog kom wys, omdat dit nie die vorige kwartaal so goed was nie. Sy het die laaste kwartaal baie goed gedoen,” vertel Kaimu. Avihe het elke naweek by haar oupa en ouma gekuier en saam met hulle kerk toe gegaan.Deur die week het sy by haar ma, me. Sylvia Pekakarua Kaimu, in Clemence Kapuuostraat in Katutura gebly. pa binnekort terugAvihe het Saterdag vanuit haar ouerhuis by 'n maatjie gaan kuier en het nie weer teruggekeer nie. Sy is dieselfde dag omstreeks 13:00 by die polisie as vermis aangemeld. Emosie oorval Sylvia telkemale gister tydens Republikein se besoek. “Sy het altyd gesê sy sal 'n groot huis en 'n motor vir my koop, en ons sal in die stad gaan bly,” het sy gesê. “Sy was baie slim, spraaksaam en spelerig. Avihe het dit geniet om krieket te speel. Maar sy was ook baie hardkoppig. As sy iets nie wou doen nie, het sy dit nie gedoen nie,” het die verpletterde ma vertel. Avihe se pa werk in Engeland en word teen vandag in Namibië terugverwag.Sylvia se buurvrou, me. Jessica Kazondjandja, vertel Avihe het voor haar grootgeword. “Sy was 'n baba toe hulle van oorsee af gekom het. Ons was baie geheg aan haar. Sy bly net hier voor my oë. Ek is baie seer,” het sy gesê. Kazondjandja het Avihe verlede Vrydag die laaste keer gesien toe sy by haar huiswinkel kom lekkers koop het. “Sy het haar eie lekkers gekies en sy was baie goed in Engels. Dit was die laaste keer dat ons saam was,” vertel sy.Avihe se ouer suster, me. Jessicah Kaimu, onthou haar kleinsus as “baie bekkig, uitgesproke, besig, slim, maar ook soms stout”.“Sy was lief vir kos, veral ietsie vleiserig, nie so veel lekkers nie,” sê Jessicah. Avihe was, nes haar oupa, ook lief vir die kerk en het gereeld kerk of Sondagskool toe gegaan. Sy het ook aan verskeie toneelopvoerings by haar skool deelgeneem en was lief vir sing. Een van haar gunstelingliedjies was “You raise me up”, onthou Jessicah, omdat dit haar kleinsus jare geneem het om al die woorde te leer. Sy geloof is sterk, nes sy geliefde kleindogter s'n, sê Kaimu, wat as pastoor aan El Shadai Ministeries verbonde is. “Ek sal daardie man, of wie dit ookal gedoen het, heeltemal vergewe. Ek sou graag met hom wou praat as hy gevang word. Dit is my werk in die tronk, wat ek ook doen om mense te help rehabiliteer,” het hy gesê.Die Namibiese polisie is intussen steeds op soek na die mens wat vir Avihe se grudood verantwoordelik was. Polisievoertuie het gister voor beide Avihe se ouerhuis en dié van haar grootouers gestaan. Lede van die gemeenskap word ook ondervra. Volgens Nampol se koördineerder van misdaadondersoeke in die Khomasstreek, adj.komm. Abner Agas, is die nadoodse ondersoek gister voltooi.Albei Avihe se hande, haar voorarms, een voet, ribbes, een bobeen en haar nek word vermis. Volgens Agas is haar ontbrekende liggaamsdele nog nie gevind nie. Hy het voorts gesê die vermoede bestaan dat die skending van haar liggaam nie plaasgevind het op die toneel waar haar liggaam gevind is nie. “Die liggaam is net daar gestort, die moord het iewers anders gebeur,” het hy gesê.Volgens Kaimu beplan die familie om Avihe se begrafnis Saterdag of Sondag in Windhoek te hou.

'Ek sal moordenaar vergewe'

Kommentaar

Republikein 2025-09-15

Meld asseblief aan om kommentaar te lewer

'Ek sal moordenaar vergewe'

Kommentaar

Republikein 2025-09-15

Meld asseblief aan om kommentaar te lewer

MELD AAN

Advertensie