Egpaar kan nie surrogaatbabas huis toe bring
Jana-Mari Smith
'n Namibiese pa van drie het 'n dringende aansoek by die Windhoekse hoërhof ingedien nadat immigrasie-owerhede sy tweelingdogters, wat vandeesmaand in Suid-Afrika gebore is, staatloos verklaar het en hulle verbied het om saam met hom huis toe te kom.
Die tweeling, Maya en Paula Delgado Lühl, is via surrogaatskap gebore aan die Namibiese burger, mnr. Phillip Lühl, en sy Meksikaanse man, mnr. Guillermo Delgado Castañeda, wie se selfdegeslag huwelik nie in Namibië erken word nie.
Die tweeling-babadogtertjies, wat op 13 Maart in Durban gebore is, kan nie reisdokumente bekom sodat Lühl met hulle na Namibië kan terugkeer nie.
Lühl was van plan om so gou as moontlik terug te keer huis toe waar Delgado Castañeda en hul tweejarige seun, Yona, op hulle wag. Yona is ook uit surrogaatskap gebore en is net soos die tweeling hul wettige kind.
Die minister van binnelandse sake, immigrasie, veiligheid en sekuriteit, mnr. Frans Kapofi, weier egter om reisdokumente aan die tweeling uit te reik om na Namibië te kom.
Dus word hulle “staatloos en haweloos” gelaat, verduidelik die hofdokumente.
Dit is gegrond op die ontkenning van Lühl se vaderskap van Yona, Paula en Maya.
Lühl se beëdigde verklaring beklemtoon dat dié besluit van binnelandse sake 'n “poging is om my met geweld van my kinders te skei en hulle sodoende onversorg, verlate en staatloos te laat. Niks kan verder van die kinders se beste belange wees nie.” Lühl sê die ministerie aanvaar nie die geboortesertifikaat wat deur die Suid-Afrikaanse owerhede uitgereik is wat hom en Delgado Castañeda as die ouers van die tweeling identifiseer nie, omdat hulle nie Suid-Afrikaanse burgers is nie. Om huis toe te kan kom, het hulle 'n paspoort of 'n nooddokument nodig en terwyl kinders gewoonlik die nasionaliteit van hul ouers aanneem, weier die Namibiese owerhede in dié geval om dit te doen. Volgens Lühl hou hierdie weiering die gesin uit mekaar, wat in stryd met die Namibiese en internasionale reg is.
“Die ministerie is so gesteld daarop om my en my gesin te teister dat hulle en hul amptenare bereid is om bykans elke reg wat my kinders het, te skend in terme van nie net die Namibiese Grondwet nie, maar ook die internasionaal-bindende wet op kinderregte en -welsyn,” het hy gesê.
Die ministerie weier ook om hul seun se burgerskap deur afkoms en Delgado Castañeda se verblyfreg, in stryd met die behandeling van heteroseksuele gades in soortgelyke situasies, te erken.
Lühl se regspan sal aanvoer dat hy en sy man die reg op 'n gesin het. Lühl word deur die advokaat Unomwinjo Katjipuka-Sibolile van die Nixon Marcus Openbare Regskantoor verteenwoordig, terwyl die minister van binnelandse sake deur die regeringsadvokaat Jabulani Ncube verteenwoordig word.
Die Namibiese Gelykheidsbeweging, wat alle ander vorme van diskriminasie veroordeel, gaan eerskomende Donderdag 'n optog vanaf die ministerie se hoofkantoor in Onafhanklikheidslaan na die hoërhof hou waar die aansoek om 09:00 deur regter Thomas Masuku gehoor sal word. - [email protected]
- [email protected]
'n Namibiese pa van drie het 'n dringende aansoek by die Windhoekse hoërhof ingedien nadat immigrasie-owerhede sy tweelingdogters, wat vandeesmaand in Suid-Afrika gebore is, staatloos verklaar het en hulle verbied het om saam met hom huis toe te kom.
Die tweeling, Maya en Paula Delgado Lühl, is via surrogaatskap gebore aan die Namibiese burger, mnr. Phillip Lühl, en sy Meksikaanse man, mnr. Guillermo Delgado Castañeda, wie se selfdegeslag huwelik nie in Namibië erken word nie.
Die tweeling-babadogtertjies, wat op 13 Maart in Durban gebore is, kan nie reisdokumente bekom sodat Lühl met hulle na Namibië kan terugkeer nie.
Lühl was van plan om so gou as moontlik terug te keer huis toe waar Delgado Castañeda en hul tweejarige seun, Yona, op hulle wag. Yona is ook uit surrogaatskap gebore en is net soos die tweeling hul wettige kind.
Die minister van binnelandse sake, immigrasie, veiligheid en sekuriteit, mnr. Frans Kapofi, weier egter om reisdokumente aan die tweeling uit te reik om na Namibië te kom.
Dus word hulle “staatloos en haweloos” gelaat, verduidelik die hofdokumente.
Dit is gegrond op die ontkenning van Lühl se vaderskap van Yona, Paula en Maya.
Lühl se beëdigde verklaring beklemtoon dat dié besluit van binnelandse sake 'n “poging is om my met geweld van my kinders te skei en hulle sodoende onversorg, verlate en staatloos te laat. Niks kan verder van die kinders se beste belange wees nie.” Lühl sê die ministerie aanvaar nie die geboortesertifikaat wat deur die Suid-Afrikaanse owerhede uitgereik is wat hom en Delgado Castañeda as die ouers van die tweeling identifiseer nie, omdat hulle nie Suid-Afrikaanse burgers is nie. Om huis toe te kan kom, het hulle 'n paspoort of 'n nooddokument nodig en terwyl kinders gewoonlik die nasionaliteit van hul ouers aanneem, weier die Namibiese owerhede in dié geval om dit te doen. Volgens Lühl hou hierdie weiering die gesin uit mekaar, wat in stryd met die Namibiese en internasionale reg is.
“Die ministerie is so gesteld daarop om my en my gesin te teister dat hulle en hul amptenare bereid is om bykans elke reg wat my kinders het, te skend in terme van nie net die Namibiese Grondwet nie, maar ook die internasionaal-bindende wet op kinderregte en -welsyn,” het hy gesê.
Die ministerie weier ook om hul seun se burgerskap deur afkoms en Delgado Castañeda se verblyfreg, in stryd met die behandeling van heteroseksuele gades in soortgelyke situasies, te erken.
Lühl se regspan sal aanvoer dat hy en sy man die reg op 'n gesin het. Lühl word deur die advokaat Unomwinjo Katjipuka-Sibolile van die Nixon Marcus Openbare Regskantoor verteenwoordig, terwyl die minister van binnelandse sake deur die regeringsadvokaat Jabulani Ncube verteenwoordig word.
Die Namibiese Gelykheidsbeweging, wat alle ander vorme van diskriminasie veroordeel, gaan eerskomende Donderdag 'n optog vanaf die ministerie se hoofkantoor in Onafhanklikheidslaan na die hoërhof hou waar die aansoek om 09:00 deur regter Thomas Masuku gehoor sal word. - [email protected]
- [email protected]
Kommentaar
Republikein
Geen kommentaar is op hierdie artikel gelaat nie