Eerstewêreldprobleme

14 January 2020 | Rubrieke
Party keer is ryk mense se prioriteite so verkeerdom.

Mense in eerstewêreldlande leef soms met oogklappe in die wêreld wat so onderstebo is. Hulle is totaal onbewus van ons probleme, uitdagings en rampe.

Verlede week is ’n vliegtuig in Iran glo per ongeluk deur hul eie missiel afgeskiet met geen oorlewendes aan boord nie.

In Australië woed verwoestende veldbrande al sedert September met vele menselewens wat al geëis is. Duisende mense het hul huise verloor en nog meer moet vlug. Meer as 10 miljoen hektaar het al afgebrand en ’n miljard diere het al omgekom – tragies en hartseer.

Die onlangse welkome reën het verligting en lafenis vir Namibië gebring, maar daar is tog dele wat nog onder die droogte steier.

Daar is steeds duisende Namibiërs wat saans honger gaan slaap en nie ’n ordentlike dak oor hul koppe het nie. Duisende Namibiërs het steeds nie toegang tot skoon, lopende water en sanitêre geriewe nie. Weens ’n gebrek hieraan het Namibië ’n hepatitis E-epidemie.

Eerstewêreldlande het ander probleme as ons. Die arme Britte probeer nog oor Brexit kom, toe tref Megxit hulle.



In Brittanje gons dit oor Meghan Markle eers hul liewe prins Harry se hart gesteel het en hom nou van hulle wil wegrokkel.

Die paartjie het verlede week aangekondig hulle gaan as senior lede van die koninklike gesin uittree. Dít nogal sonder om dit eers met koningin Liesbet te bespreek. Hulle kondig dit sommer net so op sosiale media aan, ook dat hulle hul tyd tussen Brittanje en Noord-Amerika gaan verdeel. Hoe arrogant van hulle, sê die Ingelse.

Die koningin is glo in ’n toestand van teleurstelling en haar hart is seer. Arme ouma Liesbet het gedog 2019 was haar annus horribilis met haar lieflingseun, prins Andrew, wat by die seksskandaal van Jeffrey Epstein betrek word. Andrewtjie moes ook sy kantoor by die paleis ontruim.

Nou pluk Meghan en Harry die koningin se mat so vroeg in 2020 onder haar voete uit. Boonop is haar hoogsbejaarde man, prins Phillip, ook met een voet op ’n piesangskil en die ander een in die graf.

Almal “oe” en “a” en “sies tog” oor die koninklike drama.

Die Kardashians wik en weeg nog of hulle een van hul hordes miljoene dollar vir die dapper Australiese brandbestryders gaan weggee. Dis nou nadat een van die bedorwe Botox-susters vir haar eenjarige dogtertjie ’n diamantring vir Kersfees gegee het.

Geen celebrity oorweeg dit om vir Namibië se duisende armes, boere in droogtegeteisterde gebiede of teenstroperyveldtogte een dollar te gee nie.

Hulle weet nie eens waar Namibië is nie. Ons sit mos glo aan die agterkant van die wêreldatlas en suig aan die agterspeen.

Dis waarom ek nie veel ooghare vir ryk mense, veral snobs, koninklikes en celebrities het nie. Ek glo ook nie meer aan prinse op wit perde nie. Hulle het ook maar voete van klei.

Al prins wat ek ooit ontmoet het, was prins Willempie toe hy in 2018 in Namibië by ons en ons bedreigde swartrenosters kom kuier het. Ek wonder of hy weet dis ons eie staatsamptenare wat in die howe van renosterstropery aangekla word.

Die ander prinse wat ek ken, is die paddas wat my gesoen het en toe nie in prinse op wit perde verander het nie, maar dis eerstewêreldprobleme.

Soortgelyk

 

Twee 'renosterstropers' verskyn in Gobabis-hof

28 minute gelede | Howe

Twee vermeende renosterstropers het vandag in die landdroshof op Gobabis verskyn.Mnre. Alberto Mbwale en Joseph Matheus het op klagte van die onwettige jag van spesiaal...

Pastoor Babi steeds agter tralies

4 ure gelede | Howe

Pastoor Jackson Babi (30) van die House of Joy Ministries en sy medebeskuldigde, mnr. Friza Dumeni (25), bly steeds agter tralies.Landdros Linus Samunzela het vanoggend...

25ste Covid-19-geval bevestig

6 ure gelede | Gesondheid

'n Vroulike gesondheidswerker (32) is Namibië se jongste Covid-19-geval. Dit bring die aantal bevestigde Covid-19-gevalle in Namibië op 25 te staan. Volgens die minister van...

Hof hoor president is 'mislei' oor arbeidsregulasies

16 ure gelede | Howe

Ronelle Rademeyer - Pres. Hage Geingob is “verkeerd geadviseer” met die opstel van die gewraakte arbeidsregulasies waarvan die grondwetlikheid Vrydag in die hoërhof deur Namibiese...

Namibiërs in haglike omstandighede onder SA-kwarantyn

16 ure gelede | Gesondheid

Twee vroue van Windhoek en die een se 16-jarige dogter meen die vervalle staatshospitaal by Nababeep naby Springbok in die Noord-Kaap waar hulle in kwarantyn...

'Profeet' Babi se borgaansoek vandag

16 ure gelede | Misdaad

Francoise Steynberg – Die bekende, charismatiese en selferkende profeet van die House of Joy Ministries, pastoor Jackson Babi (30), en sy medebeskuldigde, mnr. Friza Dumeni,...

Twee bemanningslede positief vir Covid-19

16 ure gelede | Gesondheid

Henriette Lamprecht & Leandrea Louw – Walvisbaai huisves tans drie aktiewe gevalle van Covid-19 ná ‘n 51-jarige man Saterdag positief vir die virussiekte getoets het....

Fishrot-manne skarrel vir borgtog

16 ure gelede | Misdaad

Augetto Graig – Die Windhoek-landdroshof het Vrydag met verskeie Fishrot-sake gewemel, met borgtogaansoeke wat met aansoeke vir die verlenging van tyd vir verdere ondersoek, meegeding...

Weer, Maandag 1 Junie 2020

16 ure gelede | Weer

BINNELAND: Gedeeltelik bewolk en baie warm in die Zambezi- en Kavangostreek. Elders sonnig en warm tot baie warm. Winderige weer sal oor die binneland heers....