Eersteliga T20-trofee bly by Wanderers

Andrew Poolman Die ondervinding van Ewald Steenkamp as aanvangskolwer was deurslaggewend in Samsung FNB Wanderers-krieketklub se tweede span se verowering van die T20 eersteliga van Krieket Namibië die afgelope Saterdag.Steenkamp het die ankerrol gespeel om te verseker dat Wanderers uiteindelik met redelike gemak die eindstryd teen Zebras-krieketklub met ses paaltjies beklink. Dis hul tweede titel in twee seisoene.Die 30-jarige Steenkamp, wat in sy jonger dae ook die nasionale o.19-span en senior span verteenwoordig het, het die T20-liga met ses vyftigtalle op 'n streep afgesluit. Sy telling in die finaal was 61 nie uit nie van 48 balle, wat vyf viere en 'n ses ingesluit het.In die jaagtog na 'n beskeie teiken van 131, het hy vroeg sy kaptein en aanvangsvennoot Tiaan Louw vir 6 verloor. Die jong Sheron Rossouw as nommer drie het 'n ses en 'n vier geslaan voordat hy vir 13 lopies (ses balle) uitoorlê en skoongeboul is.Dieselfde Zebras-bouler, Asif Shuja, het kort daarna ook vir Andrew Forrest vir 'n nulletjie laat terugstap, ná 'n vangskoot van sy eie boulwerk af.Die gesoute veteraan Niel Rossouw het Steenkamp vir 'n wyle geselskap kom hou vir 17 lopies van 13 balle (1x4 1x6), voordat JC Balt die oorblywende lopies help afkolf het met 'n onoorwonne 30 van 24 balle (2x4).Zebras se Asif Shuja het 2/29 in sy drie boulbeurte geneem, maar die span se halfhartige veldwerk het verhinder dat hulle groter druk op die gasheerspan kon plaas.Vroeër was Zebras se aanvangskolwer Tuqeer Raza in dieselfde mate die uitblinker vir sy span, met 59 lopies van 53 balle (5x4). Sy enigste steun het egter van Asad Ali (21 van 14 balle) en Asif Shuja (17 van 14 balle) gekom. Zebras het hul twintig boulbeurte op 130/9 afgesluit.As boulers het Tiaan Gerber (2/27 in 4 bb) en Herschelle van Schalkwyk (2/18 in 2) vir Wanderers toegeslaan. SEMIFINAALWanderers II het vroeër die dag sy semifinaal op sy tuisveld teen Mariental met vyf paaltjies beklink.Jaco van Zyl was die staatmaker vir Mariental met 62 lopies van 40 balle (5x4 4x6). Ongelukkig kon niemand anders behalwe nommer nege D. van der Merwe (14 van 10 balle, 1x4 1x6) dubbelsyfers bydra nie.Die giftigste Wanderers-bouler was Tiaan Gerber (4/15 in 4 bb), asook Andrew Forrest (2/27 in 4).Met twee balle van hul kolfbeurt oor, was Mariental almal uit vir 120.Ewald Steenkamp se vyftigtal (51 van 59 balle) het ingeklim met vier sesse en 'n vier, totdat AJ de Klerk hom van Basjan van der Merwe se boulwerk uitgevang het. Kaptein Tiaan Louw het 22 bygedra (36 balle, 3x4) voordat hy geboul is. Sheron Rossouw het een ses geslaan in sy 17 van 13 balle, met 'n vier en 'n ses. TWEEDELIGA FINAALDie Windhoekse klub Groen Mambas het Saterdag feesgevier met die verowering van hul eerste trofee sedert die klub drie jaar gelede gestig is.“Ons het nou reeds meer as dertig aktiewe spelers,” sê Hannes van Vuuren, speler en stigter van die klub, wat nog die begindae goed onthou toe hulle net vyf of sewe spelers was. Die groen span gebruik die Doc Jubber-veld as sy basis vir sy oefeninge twee maal per week en het heelwat selfvertroue in elke aspek van sy spel opgebou.Volgens Van Vuuren is die Groen Mambas voorbereid vir die dag wanneer hulle dalk 'n promosie-relegasiewedstryd teen die onderste span in die eersteliga moet speel, want hul beplanning is om op te skuif.In Saterdag se T20-finaal het die Mambas met agt paaltjies teen Oranjemund gewen.Oranjemund, wat vroeër verras het deur Outjo se Northern Leopard in die semifinaal uit te skakel, het sy kolfbeurt op 159/2 afgesluit.Sean Silver was die aggressiewe kolwer vir Oranjemund met 119 nie uit nie van net 72 balle. Silver het elf viere oor die CCD-veld se grenstou laat rol en ook ses sesse geslaan.Met 74.8% van sy ganse span se lopies was dit 'n besonder dominerende kolfvertoning deur Silver, 'n gewese nasionale o.19-speler. F. Mouton het 18 van 33 balle bygedra en L. Botha 7 van 17 balle, voordat beide uitgehardloop is.Morné du Plessis was die mees ekonomiese bouler (0/18), hoewel die boulers afgesien van twee uithardlope nie paaltjies kon neem nie.Die Mambas-kolfbeurt het redelik bestendig verloop ondanks die verlies van Rowan Erasmus (12 van 16 balle), met Jaco Strauss se vyftigtal (66 van 40 balle, 7x4 2x6) en Kat Steenkamp se onoorwonne 40 van 30 balle (1x4 2x6) wat die span tot op die rand van 'n oorwinning gebring het.Saam met Steenkamp was Heinz Feddersen (24 nie uit nie van 15 balle, 1x6) voor die penne toe die wenlopie gekom het met net 16.3 boulbeurte verby.Die Groen Mambas het vroeër hul halfeindstryd teen Zebras II met 81 lopies beklink, deur 173/5 op te stel en hul opponente vir 92 in 16 boulbeurte uit te boul. Rowan Erasmus (57) en Hannes van Vuuren (34) het lopies aangeteken, terwyl Kat Steenkamp (3/13 in 2), Norman Glen-Spyron (2/15 in 2) en Cobus du Toit (2/14 in 2) skade met die boulwerk aangerig het.

Eersteliga T20-trofee bly by Wanderers

Kommentaar

Republikein 2025-11-06

Meld asseblief aan om kommentaar te lewer

Eersteliga T20-trofee bly by Wanderers

Kommentaar

Republikein 2025-11-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.