Eerste vrag beesvleis vertrek na Beijing

Ronelle Rademeyer'n Besending van 24 000 kg beesvleis is gister uit Windhoek na Beijing in China gestuur van waar dit deur 'n groothandelaar aan restaurateurs en in die kleinhandel versprei sal word.Die groothandelaar, mnr. Di Guangtao, was teenwoordig toe die ministers van landbou, water en bosbou, asook nywerheidsontwikkeling, handel en SME-ontwikkeling, mnre. Alpheus !Naruseb en Tjekero Tweya, die voorraad in die verkoelde vraghouer geïnspekteer het. Mnr. Jannie Breytenbach, waarnemende uitvoerende hoof van Meatco, sê dié uitvoerabattoir het benewens dié bestelling ook 40 bestellings van sewe ander klante ontvang.BILATERALE OOREENKOMSHierdie eerste besending beesvleis vir die Chinese mark bestaan uit vakuumverpakte vleis, gevriesde snitte, asook snitte met been in. Afvalprodukte soos beesstert kan nog nie uitgevoer word nie aangesien Namibië se uitvoerooreenkoms met China nog nie daarvoor voorsiening maak nie, het Breytenbach verduidelik.Die bilaterale ooreenkoms met China waarvolgens Namibië die tweede land in Afrika word om beesvleis na China uit te voer, is reeds in 2016 onderteken. Onderhandelinge het al in 2011 begin.'n Uitbreking van knoppiesvelsiekte onder beeste in die noordelike kommunale gebied het egter 'n stok in die wiel gesteek. Die finale ooreenkoms is op 29 Maart verlede jaar onderteken.Mnr. Yang Jun, adjunkhoof van die Chinese ambassade in Windhoek, het gister daarop gewys dat die Chinese mark uit nagenoeg 1,4 miljard verbruikers bestaan.Hy sê hoewel Suid-Afrika Namibië voorgespring het en verlede jaar die eerste Afrikaland geword het om beesvleis na China uit te voer, is dit deur die uitbreking van bek-en-klouseer in die wiele gery.Namibië het in Desember verlede jaar ná onderhandelinge van sowat 'n dekade, uiteindelik ook daarin geslaag om sy eerste toetsbesending beesvleis na die VSA uit te voer. Dit is ook 'n eerste vir Afrika, het Tweya gesê.Volgens die Organisasie vir Ekonomiese Samewerking en Ontwikkeling (OECD) is die beesvleisverbruik in Amerika vier keer hoër as die wêreldgemiddeld. Hulle per capita verbruik is sowat 27 kg per jaar, toon dié organisasie se statistiek vir 2018. Daar woon nagenoeg 328 miljoen mense in die VSA.Daarteenoor toon statistiek van die Amerikaanse department van landbou (USDA) dat China in 2018 'n geraamde 8,5 miljoen ton beesvleis verbruik het, wat dié land die grootste beevleisverbruiker naas Amerika maak. Die verbruik per capita was net meer as 6 kg per jaar.Me. Rosa Thobias, bestuurder van korporatiewe aangeleenthede by Meatco, het vroeër aan Republikein gesê die eerste besending beesvleis na Amerika was 'n merkwaardige prestasie “aangesien die Amerikaanse gesondheids- en doeaneprotokolle groot uitdagings bied”.Mnr. Goliath Tujendapi, bestuurder van handel by die Vleisraad, het by navraag verduidelik die rede waarom dit Namibië so lank gevat het om beesvleis na Amerika uit te voer, is dat dit 'n lang en moeisame proses is om 'n mark in die buiteland vir vleisuitvoere oop te maak.MAATREëLS“Die vordering van die proses hang nie van Namibië af nie, maar van die invoerland.”Hy sê in die eerste plek moet die nodige bilaterale handelsooreenkoms bestaan. Dan moet die invoerland bepaal of die uitvoerland aan al die vereistes van sy sanitêre en fitosanitêre (SPS) maatreëls voldoen. Daardie skakeling geskied tussen die veeartsenyowerhede van die twee lande.Hy sê hoewel die hoeveelheid vleis wat Namibië na die VSA kan uitvoer, gering is - gesien die omvang van dié mark - hou dit groot voordele vir die plaaslike beesvleisbedryf in. “Dit is vir ons voordelig om 'n goed gesegmenteerde uitvoermark te hê. Amerika is vir ons 'n voorkwartmark, terwyl ons snitte met 'n hoë waarde na die Europese Unie en Noorweë uitvoer. Die Amerikaanse mark is grootliks 'n kitskosmark en daarom kan goedkoper snitte daarheen uitgevoer word.” Breytenbach het gister gesê aangesien Meatco se deurset weens die droogte dramaties toegeneem het, behoort voorraad beskikbaar te wees om dié nuwe markte met beesvleis te kan bedien.Tweya het in sy toespraak gesê die volgende mark wat Namibië gaan betree, is die Verenigde Arabiese Emirate (VAE).

Eerste vrag beesvleis vertrek na Beijing

Kommentaar

Republikein 2025-11-05

Meld asseblief aan om kommentaar te lewer

Eerste vrag beesvleis vertrek na Beijing

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.