Eerste migrasieprofiel vir Namibië bekend gestel
Estelle de Bruyn
Die meeste onwettige immigrante na Namibië wat gedeporteer is of 48 uur gegun is om die land te verlaat, was Angolese gevolg deur Zambiërs, Zimbabwiërs en Chinese.
Tussen 2010 en 2014 het 2 717 Angolese, 899 Zambiërs, 541 Zimbabwiërs en 114 Chinese Namibië onwettig binnegekom.
Dit blyk uit die eerste migrasieprofiel vir Namibië wat Vrydag in Windhoek deur die minister van binnelandse sake en immigrasie, me. Pendukeni Iivula-Ithana, bekend gestel is.
Volgens die migrasieprofiel is beperkte data en ’n gebrek aan digitale data ’n ernstige leemte in Namibië en gevolglik is die volledige omvang van migrasie moeilik om te bepaal.
’n Grensbeheer-bestuurstelsel is in 2011 ingestel om ingang- en uitgangdata te versamel, maar dit moet nou opgegradeer word. Werk het in 2014 begin om ’n beheerstelsel vir vreemdelinge op te stel. Hierbenewens is ’n ooreenkoms met ’n onafhanklike diensverskaffer aangegaan om ’n sogenaamde geoutomatiseerde burgerskapstelsel in te stel, wat migrasiedata soos aansoeke om burgerskap in digitale formaat sal vaslê. Volgens die migrasieprofiel is ’n vertroulikheidsklousule deel van die memorandum van verstandhouding (MOU) tussen die diensverskaffer en die ministerie en gevolglik is die digitale data hieroor nie tot die beskikking van derde partye nie.
Uit die inligting wat wel deur die ministerie bekend gemaak is, blyk dit dat altesaam 21 116 draers van permanente verblyfpermitte in 2013-2014 die land binnegekom het; 51 793 mense is in besit van tydelike verblyfpermitte, werkpermitte en spesiale permitte; 408 161 is toeriste, 409 940 is mense wat familie of vriende in Namibië kom besoek het; 143 208 mense het in Namibië kom sake doen, konferensies kom bywoon of om professionele redes die land besoek; 4 681 is diplomate en 659 657 is mense wat weens ander ongespesifiseerde redes die land binnegekom het.
In 2013 was 137 498 Namibiërs migrante in ander lande.
Die meeste buitelanders van een land wat Namibië in 2014 binnegekom het, 519 191 in totaal, was Angolese, gevolg deur 329 850 Suid-Afrikaners en 167 407 Zambiërs. Altesaam 91 900 besoekers uit Duitsland het Namibië in 2014 besoek. In totaal het 1 477 593 buitelanders Namibië in dié jaar besoek van wie 1 320 062 (89,3 persent) toeriste was.
Uit statistiek uit die nasionale sensus van 2011 blyk dit dat in daardie jaar nagenoeg 68 000 buitelanders in Namibië woonagtig was.
Volgens die migrasieprofiel bestaan onvoldoende data oor Namibiërs in die diaspora en iets sal gedoen moet word om meer akkurate syfers te kry.
Volgens me. Anita Kiki Gbeho, die Verenigde Nasies se verteenwoordiger in Namibië, migreer mense om verskillende redes en begrip is nodig vir die mense en hul omstandighede. Volgens Gbeho is heelwat voordele aan migrasie verbonde en migrante kan in ’n groot mate tot die buitelandse verdienste van hul lande van herkoms finansieel bydra.
Mnr. Josiah Ogina, die streeksdirekteur in Suider-Afrika vir die Internasionale Organisasie vir Migrasie (IOM), het op sy beurt gesê Namibië het in 2009 ’n lid van die IOM geword. Die afgelope 18 maande is hard gewerk om Namibië se migrasieprofiel op te stel. Só ’n profiel bied die geleentheid om interne, streek- en internasionale data te versamel en regerings te help om migrasie te bestuur en daarvoor te beplan.
Iivula-Ithana het met die bekendstelling van die migrasieprofiel gesê ’n migrant is iemand wie se geboorteplek verskil van die plek waar hy hom tans bevind en dat regerings voorbereid moet wees om die uitdagings wat dit meebring, die hoof te bied. Gevolglik het die regering die opstel van ’n migrasieprofiel vir Namibië goedgekeur. Die profiel is die eerste stap in die opstel van ’n beleid oor migrasie en dit dui die Namibiese konteks aan terwyl dit ook toon watter vordering gemaak is, waar leemtes bestaan asook om tendense van aankomste en vertrekke in en uit die land te bepaal.
Die meeste onwettige immigrante na Namibië wat gedeporteer is of 48 uur gegun is om die land te verlaat, was Angolese gevolg deur Zambiërs, Zimbabwiërs en Chinese.
Tussen 2010 en 2014 het 2 717 Angolese, 899 Zambiërs, 541 Zimbabwiërs en 114 Chinese Namibië onwettig binnegekom.
Dit blyk uit die eerste migrasieprofiel vir Namibië wat Vrydag in Windhoek deur die minister van binnelandse sake en immigrasie, me. Pendukeni Iivula-Ithana, bekend gestel is.
Volgens die migrasieprofiel is beperkte data en ’n gebrek aan digitale data ’n ernstige leemte in Namibië en gevolglik is die volledige omvang van migrasie moeilik om te bepaal.
’n Grensbeheer-bestuurstelsel is in 2011 ingestel om ingang- en uitgangdata te versamel, maar dit moet nou opgegradeer word. Werk het in 2014 begin om ’n beheerstelsel vir vreemdelinge op te stel. Hierbenewens is ’n ooreenkoms met ’n onafhanklike diensverskaffer aangegaan om ’n sogenaamde geoutomatiseerde burgerskapstelsel in te stel, wat migrasiedata soos aansoeke om burgerskap in digitale formaat sal vaslê. Volgens die migrasieprofiel is ’n vertroulikheidsklousule deel van die memorandum van verstandhouding (MOU) tussen die diensverskaffer en die ministerie en gevolglik is die digitale data hieroor nie tot die beskikking van derde partye nie.
Uit die inligting wat wel deur die ministerie bekend gemaak is, blyk dit dat altesaam 21 116 draers van permanente verblyfpermitte in 2013-2014 die land binnegekom het; 51 793 mense is in besit van tydelike verblyfpermitte, werkpermitte en spesiale permitte; 408 161 is toeriste, 409 940 is mense wat familie of vriende in Namibië kom besoek het; 143 208 mense het in Namibië kom sake doen, konferensies kom bywoon of om professionele redes die land besoek; 4 681 is diplomate en 659 657 is mense wat weens ander ongespesifiseerde redes die land binnegekom het.
In 2013 was 137 498 Namibiërs migrante in ander lande.
Die meeste buitelanders van een land wat Namibië in 2014 binnegekom het, 519 191 in totaal, was Angolese, gevolg deur 329 850 Suid-Afrikaners en 167 407 Zambiërs. Altesaam 91 900 besoekers uit Duitsland het Namibië in 2014 besoek. In totaal het 1 477 593 buitelanders Namibië in dié jaar besoek van wie 1 320 062 (89,3 persent) toeriste was.
Uit statistiek uit die nasionale sensus van 2011 blyk dit dat in daardie jaar nagenoeg 68 000 buitelanders in Namibië woonagtig was.
Volgens die migrasieprofiel bestaan onvoldoende data oor Namibiërs in die diaspora en iets sal gedoen moet word om meer akkurate syfers te kry.
Volgens me. Anita Kiki Gbeho, die Verenigde Nasies se verteenwoordiger in Namibië, migreer mense om verskillende redes en begrip is nodig vir die mense en hul omstandighede. Volgens Gbeho is heelwat voordele aan migrasie verbonde en migrante kan in ’n groot mate tot die buitelandse verdienste van hul lande van herkoms finansieel bydra.
Mnr. Josiah Ogina, die streeksdirekteur in Suider-Afrika vir die Internasionale Organisasie vir Migrasie (IOM), het op sy beurt gesê Namibië het in 2009 ’n lid van die IOM geword. Die afgelope 18 maande is hard gewerk om Namibië se migrasieprofiel op te stel. Só ’n profiel bied die geleentheid om interne, streek- en internasionale data te versamel en regerings te help om migrasie te bestuur en daarvoor te beplan.
Iivula-Ithana het met die bekendstelling van die migrasieprofiel gesê ’n migrant is iemand wie se geboorteplek verskil van die plek waar hy hom tans bevind en dat regerings voorbereid moet wees om die uitdagings wat dit meebring, die hoof te bied. Gevolglik het die regering die opstel van ’n migrasieprofiel vir Namibië goedgekeur. Die profiel is die eerste stap in die opstel van ’n beleid oor migrasie en dit dui die Namibiese konteks aan terwyl dit ook toon watter vordering gemaak is, waar leemtes bestaan asook om tendense van aankomste en vertrekke in en uit die land te bepaal.
Kommentaar
Republikein
Geen kommentaar is op hierdie artikel gelaat nie