Eerste mense al 65 000 jaar gelede in Australië

Een van die rykste argeologiese terreine van inheemse Australiërs wys nou die eerste mense het 65 000 jaar gelede al op dié vasteland aangekom.Dit is veel langer gelede as die 47 000 jaar wat sommige argeoloë aanvoer.Dié opgrawings onder leiding van dr. Chris Clarkson aan die Queensland Universiteit is pas in die vakjoernaal Nature gepubliseer. Die terrein, wat bekend staan as Madjedbebe, is geleë op tradisionele grond van die inheemse Mirarr-mense, en is omring deur 'n Wêrelderfenisgebied.Dit is in die noorde van die land en bestaan uit 'n rotsskuiling waar daar onder meer 10 000 artefakte gevind is in die laagste sedimente, dus die oudste neerslag.Prof. Zenobia Jacobs van die Universiteit van Wollong, wat die datering gelei het, verwys in die navorsing na die kakebeen van 'n Tasmaanse tier wat gevind is. Dit was met rooi oker gekleur. Die navorsers het ook “okerkryte” gekry wat die mense gemaak het vir simboliese gebruik.In die lae is plat klippe gevind waarop die oker gemaal is. Daar word vermoed dit is gebruik in die skep van rotskuns.Klein klipgereedskap is gevind wat mense gebruik het om sade mee te maal, luidens 'n verklaring. 'n Wye verskeidenheid ander gereedskap en byl- en pylpunte is ook gevind.Die tegniek wat gebruik is vir die datering, staan bekend as opties gestimuleerde luminessensie (OSL) om klein kwartskorrels wat diep in die neerslae by die artefakte lê, te toets om sodoende te bepaal hoe lank hulle in algehele donker was. Dit bepaal presies wanneer die korrels laas aan sonlig blootgestel was – dus wanner die artefak begrawe is. Elke sandkorrel se datum kan bepaal word.Toe mense vir die eerste keer na Australië gegaan het, was die seevlak baie laer as nou en was dit baie makliker om van die eilande van Suidoos-Asië na Australië te gaan, luidens navorsing.– Netwerk24

Eerste mense al 65 000 jaar gelede in Australië

Kommentaar

Republikein 2025-06-19

Meld asseblief aan om kommentaar te lewer

Eerste mense al 65 000 jaar gelede in Australië

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie